སུ་ཝེ་ཌེན་གྲོས་ཚོགས་ནང་བོད་དོན་རྒྱབ་སྐྱོར་ཚོགས་འདུ་ཚོགས་འདུག

ཉེ་ཆར་གསར་འཛུགས་གནང་བའི་སུ་ཝེ་ཌེན་གྲོས་ཚོགས་ཀྱི་འཐུས་མིའི་བོད་དོན་རྒྱབ་སྐྱོར་ཚོགས་པས་གོ་སྒྲིག་དང་། སུ་ཝེ་ཌེན་བོད་དོན་རྒྱབ་སྐྱོར་ཚོགས་པ་དང་བོད་རིགས་སྤྱི་མཐུན་ཚོགས་པ་བཅས་ཀྱི་མཐུན་འགྱུར་འོག་ཡུལ་དེའི་གྲོས་ཚོགས་ནང་བོད་དོན་དང་འབྲེལ་བའི་བགྲོ་གླེང་ཚོགས་འདུ་ཞིག་ཚོགས་གནང་འདུག
དེ་ཡང་སྤྱི་ལྔ་བའི་ཚེས ༣༡ ཉིན་ཚོགས་པའི་བགྲོ་གླེང་ཚོགས་འདུ་དེའི་ཐོག་སུ་ཝེ་ཌེན་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ལྕམ་སྐུ་མར་གྷ་རེ་ཊ་Margareta Cederfeltགཙོས་པའི་ལྗང་ཁུ་ཚོགས་པའི་གྲོས་ཚོགས་འཐུས་མི་དང་། གུ་ཡངས་ཚོགས་པའི་གྲོས་ཚོགས་འཐུས་མི་བདུན། སུ་ཝེ་ཌེན་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ Mattias Björnerstedtགཙོས་ས་གནས་ཀྱི་བོད་དོན་རྒྱབ་སྐྱོར་བ་དང་སུ་ཝེ་ཌེན་ཁུལ་གྱི་བོད་མི་བཅས་མཉམ་ཞུགས་གནང་ཡོད་འདུག
སྐབས་དེར་ཡོ་རོབ་དང་། ལྷོ་ཨ་ཧྥེ་རི་ཀའི་བོད་མི་དམངས་སྤྱི་འཐུས་ཐུབ་བསྟན་དབང་ཆེན་ལགས་དང་། ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་རྣམ་གཉིས་ཀྱིས་བོད་དོན་དང་འབྲེལ་བའི་གསུང་བཤད་གནང་འདུག་ཅིང་། གྲོས་ཚོགས་ཀྱི་འཐུས་མི་རྣམ་པར་ཁོང་རྣམ་གཉིས་ནས་སུཝེ་ཌེན་གྲོས་ཚོགས་ནང་བོད་དོན་སྐོར་གླེང་སློང་ཡོང་ཐབས་རེ་འདུན་གནང་འདུག་པར་མ་ཟད། བོད་དོན་ཐོག་མུ་འཐུད་རྒྱབ་སྐྱོར་ཡོང་བའི་རེ་སྐུལ་གནང་འདུག་ལ་སུ་ཝེ་ཌེན་གྲོས་ཚོགས་ཀྱི་འཐུས་མིའི་གྲུབ་པའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ལྕམ་སྐུ་མར་གྷ་རེ་ཊ་ལགས་ཀྱིས་ད་ལྟའི་བོད་ནང་གི་ཛ་དྲག་གནས་སྟངས་སྐོར་དང་བོད་དོན་ཐོག་མུ་མཐུད་རྒྱབ་སྐྱོར་གནང་རྒྱུ་ཡིན་སྐོར་གསུང་འདུག

གསར་འགོད་པ་བསོད་ནམས་ལྷ་མོ། རིག་ལྡན་སྒྲོལ་མ།