བོད་དུ་ཡུལ་བསྐོར་སྤྲོ་འཆམ་ལས་རིགས་ཀྱི་ལྷན་ཚོགས།

༄༅༎ཕྱི་ཟླ་བཞིའི་ཚེས་༤ཉིན་བོད་རང་སྐྱོང་ལྗོངས་ཡུལ་བསྐོར་སྤྲོ་འཆམ་ལས་རིགས་ཀྱི་ལྷན་ཚོགས་ཤིག་བསྐོངས་ཚོགས་བྱས་ཡོད་པའི་སྐབས་ བོད་རང་སྐྱོང་ལྗོངས་ཡུལ་བསྐོར་སྤྲོ་འཆམ་ལས་ཁང་གི་དཔོན་རིགས་བག་གྲོ་ལགས་ཀྱིས་ རྒྱ་ནག་གཞུང་གིས་བོད་ནང་ལོ་ལྔ་རེའི་འཕེལ་རྒྱས་ཀྱི་འཆར་གཞིའི་ལས་གཞི་འགོ་བཙུགས་པ་ནས་བཟུང་ ལོ་ལྔ་རེའི་འཕེལ་རྒྱས་འཆར་གཞི་ཐེངས་བཅུ་གཅིག་པ་རིང་ བོད་ནང་ཡུལ་བསྐོར་སྤྲོ་འཆམ་གྱི་ལས་རིགས་འཕེལ་རྒྱས་བཏང་ནས་ རྒྱ་ནག་རྒྱལ་ནང་དང་ཕྱི་རྒྱལ་ནས་བོད་ནང་ཡུལ་བསྐོར་སྤྲོ་འཆམ་དུ་ཡོང་མཁན་གྱི་མིའི་གྲངས་འབོར་ས་ཡ་ཉི་ཤུ་རྩ་གཅིག་ཟིན་ཡོད་པ་དང་ ལོ་ལྔའི་འཆར་གཞིའི་ལས་གཞི་སྔོན་མ་ལས་བརྒྱ་ཆ་༣༡ཀྱིས་མང་བ་བྱུང་ཡོད་པ་དང་ མ་དངུལ་མི་མང་ཤོག་སྒོར་དེའི་སྔོན་གྱི་ཐེར་འབུམ་ལྔ་ནས་ ལོ་ལྔའི་འཕེལ་རྒྱས་འཆར་གཞི་ཐེངས་བཅུ་གཅིག་པའི་ནང་ བོད་ནང་ཡུལ་བསྐོར་སྤྲོ་འཆམ་གྱི་ཡོང་འབབ་མི་མང་ཤོག་སྒོར་ཐེར་འབུམ་བཅུ་གསུམ་ཙམ་བྱུང་ལུགས་བརྗོད་འདུག

བོད་རང་སྐྱོང་ལྗོངས་ཡུལ་བསྐོར་སྤྲོ་འཆམ་ལས་ཁང་གི་ལྷན་ཚོགས་དེའི་ཐོག་ད་དུང་བོད་ནང་གི་ཡུལ་ཁོར་སྤྲོ་འཆམ་གྱི་ལས་རིམ་མྱུར་ཚད་མགྱོགས་པོའི་ཐོག་ནས་འཕེལ་རྒྱས་ཕྱིན་ནས་ ད་ཆ་བོད་ནང་རྒྱལ་སྤྱིའི་ཚད་ལྡན་གྱི་རིམ་པ་ལྔ་ཡན་གྱི་མགྲོན་ཁང་ཁག་བཅུ་དྲུག་ཙམ་དང་  རིམ་པ་གསུམ་ཡན་གྱི་མགྲོན་ཁང་༣༡་ དེ་མིན་གྱི་མགྲོན་ཁང་རིགས་འདྲ་མིན་ཡོད་པ་དང་ ཡུལ་བསྐོར་སྣེ་གཤན་པ་མི་གྲངས་༡༠༠ལྷག་ཙམ་དང་ བོད་ནང་ཡུལ་བསྐོར་སྤྲོ་འཆམ་གྱི་ལས་རིགས་དང་ཐད་ཀར་འབྲེལ་བའི་ལས་མི་ཁྲི་བཞི་ལྷག་ཙམ་ཡོད་པ་དང་ ལོ་རེར་ལས་ཁ་སྣེ་གྲངས་གསུམ་སྟོང་ཙམ་ཐོན་གྱི་ཡོད་ལུགས་བརྗོད་པའི་སྐོར་རྒྱ་ནག་མི་མང་ཉིན་རེའི་ཚགས་ཤོག་གི་དབྱིན་ཡིག་དྲ་གནས་ཐོག་གནས་ཚུལ་སྤེལ་འདུག