གཞིས་ཆགས་ཁག་ཏུ་འཚོ་བའི་རྒྱབ་རྟེན་ཆེད་སོ་ནམ་ལས་གཞི་ནི་གལ་འགངས་ཅན་ཞིག་ཡིན་པ། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་ལགས་ཀྱིས་གསུངས་པ།

ཟླ་བ་འདིའི་ཚེས་ ༢༠ ནས་འགོ་འཛུགས་ཀྱིས་ཉིན་གསུམ་རིང་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱིས་གོ་སྒྲིག་འོག རྒྱ་གར་ལྷོ་ཕྱོགས་སྦེ་ལ་ཀོ་པི་གཞིས་ཁུངས་སུ་ཡོད་པའི་ནང་སྲིད་སྐྱེ་ལྡན་སོ་ནམ་ཉམས་ཞིབ་དང་སྦྱོང་བརྡར་བསྟི་གནས་ཁང་ཁང་། རྒྱ་གར་ལྷོ་ཕྱོགས་དང་དབུས་དང་བྱང་ཕྱོགས། བྱང་ཤར་བཅས་ཀྱི་བོད་མིའི་གཞིས་ཆགས་ཁྱོན་ ༡༢ ཀྱི་ས་གནས་འགོ་འཛིན་དང་སོ་ནམ་སློབ་སྟོན་པ་བཅས་ལྷན་བཞུགས་ཀྱིས། བོད་མིའི་གཞིས་ཆགས་ཁག་གི་སོ་ནམ་ལས་གཞི་ཡར་རྒྱས་གཏོང་ཕྱོགས་ཀྱི་ལྷན་ཚོགས་དབུ་བཙུགས་ཀྱི་མཛད་སྒོ་ཞིག་འཚོགས་ཡོད་པ་དང་། མཛད་སྒོའི་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་སྲིད་སྐྱོང་དང་ནང་སྲིད་བཀའ་བློན་གཅིག་ལྕོགས་སྤེན་པ་ཚེ་རིང་ལགས་ཆེད་ཕེབས་ཀྱིས། བོད་དོན་འཐབ་རྩོད་མུ་མཐུད་རྒྱུན་གནས་ཐུབ་པར་གཞིས་ཆགས་སྲ་བརྟན་དགོས་གལ་ཆེ་ཞིང་། གཞིས་ཆགས་དེ་དག་སྲ་བརྟན་ཡོང་བར་གནས་སྡོད་མི་རྣམས་ཀྱི་འཚོ་བའི་རྒྱབ་རྟེན་ཆེད་སོ་ནམ་ལས་གཞི་གཙོ་བོར་གྱུར་བའི་ལས་གཞི་གཞན་སྤེལ་དགོས་པའི་གཞེན་སྐུལ་གནང་ཡོད་པ་རེད།

རྩ་བའི་ཉིན་གསུམ་རིང་རྒྱ་གར་ལྷོ་ཕྱོགས་སུ་འཚོག་བཞིན་པའི་སོ་ནམ་ཡར་རྒྱས་ཀྱི་ལྷན་ཚོགས་དེའི་ཐོག སོ་ནམ་སྲིད་བྱུས་དང་འབྲེལ་བའི་བརྗོད་གཞི་དུ་མའི་ཐོག་ས་ཁུལ་གཞིར་བཟུང་ཚོགས་ཆུང་ཆ་བགོས་ཀྱིས་གོ་བསྡུར་གནང་སྟེ། ཉིན་མཐའ་མར་གྲོས་ཆོད་གཏན་འབེབས་གནང་འཆར་ཡོད་པ་རེད་འདུག་ལ། དེ་སྔ་ཕྱི་ལོ་ ༢༠༢༣ ལོར་བཞུགས་སྒར་དུ་བོད་མིའི་གཞིས་ཆགས་ཁག་གི་སོ་ནམ་སློབ་སྟོན་པའི་ལྷན་ཚོགས་སྐབས། བཀའ་ཤག་གིས་སོ་ནམ་གྱི་ལམ་སྟོན་དང་སྲིད་བྱུས་རྣམས་གཞིས་ཆགས་སྤྱི་ཡིས་ལག་བསྟར་དགོས་པ་ཙམ་ཞིག་མ་ཡིན་པར། ས་གནས་ཀྱི་གནས་བབ་དང་དགོས་མཁོར་གཞིར་བཞག་གིས་སོ་ནམ་ལམ་སྟོན་ཞིག ས་གནས་ཀྱི་སོ་ནམ་ལམ་སྟོན་པས་གཏན་འབེབས་དགོས་པའི་ལམ་སྟོན་གནང་ཡོད་པ་ལྟར། ཐེངས་འདིའི་ལྷན་ཚོགས་སུ་གྲོས་ཆོད་འདིའི་ཐོག་ཐག་གཅོད་བྱུང་རྒྱུའི་རེ་བ་ཡོད་པ། ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་ཀྱིས་གསུངས་ཀྱི་འདུག

གསར་འགོད་པ། པདྨ་དངོས་གྲུབ།

རྩོམ་སྒྲིག་པ། བདེ་སྐྱིད་ཀུན་སྒྲོལ།

དྲྭ་ཐོག་སྤེལ་མཁན། བསྟན་འཛིན་བསྟན་སྐྱོང་།