བོད་ནས་བྱིས་བ་རྐུ་མཁན་རྒྱ་མི་ཁ་ཤས་བོད་མིས་འཇུ་བཟུང་བྱས་བ།

ལྷོ་ཁ་ས་ཁུལ་གྲ་ནང་རྫོང་ནས་བྱིས་པ་རྐུ་མཁན་རྒྱ་མི་དྲུག་འཛིན་བཟུང་བྱས་སྐབས། ༢༠༡༥།༨།༡༧

ལྷོ་ཁ་ས་ཁུལ་གྲ་ནང་རྫོང་ནས་བྱིས་པ་རྐུ་མཁན་རྒྱ་མི་དྲུག་འཛིན་བཟུང་བྱས་ཏེ་བྱིས་པ་འགའ་ཤས་ཚུར་ལེན་ཐུབ་པ་བྱུང་ཡོད་པ་རེད།
དེ་ཡང་ཕྱི་ཟླ་བརྒྱད་པའི་ཚེས་༡༧ཉིན་བོད་ལྗོངས་ལྷོ་ཁ་ས་ཁུལ་གྲ་ནང་རྫོང་། གྲ་ཕྱི་ཡུ་ཤོག་ཁྱི་དགུ་ཁྲོད་གྲོང་ཚོའི་མི་དམངས་ཀྱིས་ཕྲུ་གུ་རྐུ་འཁྱེར་བྱེད་མཁན་རྒྱ་མི་དྲུག་འཛིན་བཟུང་བྱས་ཡོད་པ་དང་། ཕྲུ་གུ་རྐུ་འཁྱེར་བྱེད་མཁན་རྒྱ་མི་ཁྱོ་ག་ལྔ་དང་བེུད་༣ཡོད་པའི་ནང་ནས་དྲུག་འཛིན་བཟུང་ཐུབ་པ་ལས་དེ་མིན་གཉིས་བྲོས་ཕྱིན་ཡོད་པ་རེད།
གནས་ཚུལ་དེའི་སྐོར་ངོ་སྤྲོད་བྱས་པར་གཞིགས་ན། ཕྲུ་གུ་རྐུ་འཁྱེར་བྱེད་མཁན་དེ་ཚོ་ནི་ཡུལ་སྐོར་སྤྲོ་འཆམ་ལ་ཁ་གཡར་ཏེ་བོད་ནང་དུ་ཡོང་བའི་རྒྱ་མི་ཤ་སྟག་ཡིན་པ་དང་། ཁོང་ཚོས་ཕྱིར་རྒྱ་ནག་ལ་ལོག་རྩིས་བྱས་ནས་འགྲུལ་སྐྱེལ་རླངས་འཁོར་འབྲིང་བ་ཞིག་གི་སྒེའུ་ཁུང་ཚང་མར་འགྱིག་ཤོག་ནག་པོ་སྦྱར་ཏེ་མོ་ཊའི་ནང་ལོག་མཐོང་མི་ཐུབ་པ་བཟོས་ཡོད་པ་རེད། ས་གནས་བོད་མི་ཚོས་ཁོང་ཚོ་འཛིན་བཟུང་བྱས་ཏེ་རྐུ་འཁྱེར་བྱས་པའི་ཕྲུ་གུ་འགའ་ཤས་སྐྱོབ་ཐུབ་ཡོད་པ་མ་ཟད། ཕྲུ་གུ་རྐུ་འཁྱེར་བྱེད་མཁན་ཉེས་ཅན་པ་རྣམས་ཉེན་རྟོག་པར་རྩིས་སྤྲོད་བྱས་ཡོད་པ་རེད།
སྤྱི་ཚོགས་དྲ་རྒྱའི་བརྒྱུད་ལམ་ཁག་མང་པོ་ཞིག་གི་ནང་། དེང་སྐབས་བོད་ནང་ཕྲུ་གུ་རྐུ་འཁྱེར་བྱེད་མཁན་ཇེ་མང་དུ་འགྲོ་བཞིན་ཡོད་ལུགས་དང་། ཚང་མས་ངེས་པར་དུ་དོ་འཁུར་ཆེར་བསྐྱེད་བྱེད་དགོས་པའི་ཁར་དམིགས་བསལ་དུས་རྒྱུན་ཡུལ་སྐོར་སྤྲོ་འཆམ་པ་ཡིན་ཁུལ་བྱེད་མཁན་དང་ཁྲོམ་ཁུལ་གྱི་སློང་མོ་རྒྱག་མཁན་། དེ་བཞིན་ཉམ་ཆུང་དུ་རྫུས་པའི་མི་དེ་རིགས་ལ་ངེས་པར་དུ་ཡིད་གཟབ་བྱ་དགོས་རྒྱུ་གལ་ཆེན་པོའི་སྐོར་གླེང་བཞིན་ཡོད་པ་རེད།    

གསར་འགོད་པ་ཉི་མ་གཡུ་སྒྲོན།