སྤྱི་འཐུས་ནང་༸གོང་ས་མཆོག་གི་གསུང་འཕྲིན་ལ་བཀའ་བསྡུར།

༄༅༎བཙན་བྱོལ་བོད་མི་མང་སྤྱི་འཐུས་གྲོས་ཚོགས་སུ་༧གོང་ས་༧སྐྱབས་མགོན་ཆེན་པོ་མཆོག་གི་བགྲེས་ཡོལ་ཕེབས་རྒྱུའི་གསུངས་འཕྲིན་ཐོག་བཀའ་བསྡུར་གནང་འཆར་ཡོད་འདུག

ཁ་ས་ཚེས་བཅུ་གསུམ་ཉིན་བཙན་བྱོལ་བོད་གཞུང་གི་ལྟེ་གནས་བཞུགས་སྒར་རྡ་རམ་ས་ལར་སྐབས་བཅུ་བཞི་པའི་བོད་མི་མང་སྤྱི་འཐུས་གྲོས་ཚོགས་ཀྱི་སྔོན་རྩིས་ཚུགས་དུས་འགོ་ཚུགས་ཡོད་པ་དང་། ཚོགས་གཙོ་མཆོག་གིས་ད་རེས་རྩ་བའི་སྔོན་རྩིས་ཐོག་བཀའ་བསྡུར་གནང་རྒྱུ་ཡིན་ནའང་དམིགས་བསལ་ད་རེས་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་དབང་ལ་བཅོས་བསྒྱུར་གཏོང་དགོས་པའི་གསུངས་འཕྲིན་བསྩལ་གནང་བ་དེའི་ཐོག་དེ་རིང་རེས་གཟའ་མིག་དམར་ནས་བཟུང་གྲོས་བསྡུར་གནང་རྒྱུ་ཡིན་ཞེས་གསུངས་ཡོད་འདུག ལྷག་པར་དུ་ཚོགས་གཙོ་སྤེན་པ་ཚེ་རིང་ལགས་སུ་གསར་འགོད་པས་བཅར་འདྲི་དང་ལན་ཞུས་པའི་སྐབས་ཁོང་གིས། ༧གོང་ས་ཏཱ་ལའི་བླ་མ་མཆོག་གི་གསུངས་འཕྲིན་གནང་བའི་ནང་དོན་ཁག་ལ་ང་ཚོ་གྲོས་ཚོགས་ནང་གྲོས་བསྡུར་གནང་རྒྱུ་དང་ཕལ་ཆེར་གནད་དོན་གསུམ་གྱི་ཐོག་གྲོས་བསྡུར་ཡོང་སྲིད་པ་རེད། དང་པོ་ནི་ཕལ་ཆེར་༧གོང་ས་མཆོག་ལ་སྐུ་དབང་ཐོག་བསྒྱུར་བཅོས་གཏོང་མི་དགོས་པ་ཞེས་བསྐྱར་དུ་འབོད་སྐུལ་ཞུ་རྒྱུ་དང་། གཉིས་པ་ནི་༧གོང་ས་མཆོག་གི་དགོངས་གཞི་དང་བསྟུན་ནས་བསྒྱུར་བཅོས་གཏོང་རྒྱུ་དང་དེ་ལྟར་ཡོང་ཐབས་སུ་ཚོགས་ཆུང་ཟུར་བཙུགས་ཀྱི་གྲོས་བསྡུར་དང་དེར་གཞིགས་པས་ལས་དོན་མང་པོ་ཞིག་སྤེལ་དགོས་ཀྱི་ཡོད་སྟབས་སྤྱི་འཐུས་སྐབས་བཅུ་བཞི་པ་འདིའི་ཐོག་ནས་ཐག་ཆོད་ཡོང་རྒྱུ་ཁག་པོ་རེད། གང་ཡིན་ཟེར་ན་ཕྱི་ཟླ་དྲུག་པ་ནས་གྲོས་ཚོགས་འཐུས་མི་གསར་པ་བསྐོ་འདེམས་ཡོང་གི་རེད་ཅེས་གསུངས་པ་དང་། གནད་དོན་ཡོང་སྲིད་པའི་ཚོད་དཔག་གསུམ་པ་དེ་ནི་དབུ་མའི་ཐབས་ལམ་ཞིག་འདོན་རྒྱུ་དེ་ནི་མི་མང་གིས་འོས་འདེམས་བྱེད་པའི་འཐུས་མིའི་ངོས་ནས་༧གོང་ས་མཆོག་གི་འཛིན་སྐྱོང་གི་ཕྱག་ལས་ཐོག་མཉམ་རུབ་ཞུ་རྒྱུ་དང་། དེ་ལྟར་ཡོང་རྒྱུར་ཡང་བསྐྱར་བཅའ་ཁྲིམས་ལ་འགྱུར་བ་ཕྲན་བུའི་གཏོང་དགོས་པ་ཆགས་ཀྱི་རེད་རིང་མིན་གྲོས་བསྡུར་གནང་བའི་སྐབས་གྲོས་འཆམ་ཡོང་སྲིད་པའི་གནད་དོན་གསུམ་དཔེ་མཚོན་དུ་བཞག་གནང་ཡོད་འདུག་ཀྱང་ཁོང་གིས་ད་རེས་གྲོས་ཚོགས་འདི་ནས་སྤྱི་འཐུས་རྣམ་པའི་གྲོས་བསྡུར་ནས་གསལ་པོ་ཆགས་རྒྱུ་ལས་དམིགས་བསལ་འདི་འདྲ་ཞིག་ཡོང་གི་རེད་ཅེས་གསུངས་ཐུབ་ཀྱི་མེད་ལུགས་ཀྱང་གསལ་བཤད་གནང་ཡོད་པ་རེད། གྲོས་ཚོགས་ཁ་ས་ཚེས་བཅུ་གསུམ་ནས་འགོ་ཚུགས་ཏེ་འདི་ཚེས་ཉི་ཤུ་ལྔ་ཉིན་མཇུག་སྒྲིལ་གནང་གི་ཡོད་པ་རེད།