ཨ་སམ་ནས་བོད་དོན་རྒྱབ་སྐྱོར།

༄༅།    །དེ་རིང་ཕྱི་ཚེས་ ༡༦ ཉིན་ཨ་སམ་མངའ་སྡེའི་རྒྱལ་ས་གྷོ་ཝ་ཧ་ཀྲིར་བོད་མི་མང་སྤྱི་འཐུས་ལྷན་ཚོགས་ཀྱི་བྱང་ཤར་ཁུལ་གྱི་ཞུ་གཏུག་ལས་འགུལ་ཚོགས་ཆུང་ནས་ཉིན་དྲུག་གི་ལས་འགུལ་མཇུག་བསྒྲིལ་ཞུས་པ་དང་འབྲེལ། གསར་འགོད་མཐུན་ཚོགས་ཀྱི་ཚོགས་ཁང་དུ་གསར་འགོད་ལྷན་ཚོགས་ཞིག་གནང་འདུག ཞུ་གཏུག་ལས་འགུལ་བ་སྤྱི་འཐུས་གསུམ་ནས་ཨ་སམ་མངའ་སྡེའི་ཆབ་སྲིད་དབུ་ཁྲིད་རྣམ་པ་དང་། གཞུང་ཞབས། མཁས་དབང་ཁག་བཅས་ནས་བོད་དོན་འཐབ་རྩོད་ལ་བཅོས་མིན་གྱི་རྒྱབ་སྐྱོར་དང་གདུང་སེམས་མཉམ་བསྐྱེད་ཡོང་བ་ཡིག་ངག་གཉིས་ཐོག་ནས་ཞུས་འདུག    ཕྱོགས་མཚུངས་ཨ་སམ་མངའ་སྡེའི་དབུ་ཁྲིད་རྣམ་པས་བོད་དོན་དཀའ་རྙོག་སེལ་ཐབས་སུ་མཉམ་སྦྲེལ་རྒྱལ་ཚོགས་ཀྱིས་ཐེ་བྱུས་དགོས་སྐོར་དང་། མངའ་སྡེའི་ནང་གི་སྲིད་དོན་ཚོགས་པ་ཚོས་བོད་དོན་གྲོས་ཆོད་གྲོས་ཚོགས་སུ་སླེབས་ཚེ་རྒྱབ་སྐྱོར་གནང་རྒྱུའི་ཞལ་བཞེས་གནང་འདུག
སྤྱི་འཐུས་པདྨ་འབྱུང་གནས་ལགས་དང་།    སྤྱི་འཐུས་ཟླ་སྒྲོན་ཤར་གླིང་ལགས།    དེ་བཞིན་སྤྱི་འཐུས་དབྱངས་ཅན་སྒྲོལ་དཀར་ལགས་བཅས་ནས་ད་རེས་ཀྱི་ལས་འགུལ་དེའི་སྐབས་ཨ་སམ་མངའ་སྡེའི་སྲིད་སྐྱོང་སྐུ་ཞབས་ཇེ་བི་པཊ་ན་ཡེག་(Mr.J B.Patnaik)མཆོག་དང་།    མངའ་སྡེའི་གྲོས་ཚོགས་ཚོགས་གཙོ་གཞོན་པ་སྐུ་ཞབས་བི་མ་ནནྡ་ཏན་ཏི་ (Shri Bhimananda Tanti )མཆོག་གི་དབུས་པའི་མངའ་སྡེའི་དཔོན་རིགས་ཁག་དང་མཇལ་འཕྲད་གནང་ནས་བོད་ཀྱི་དངོས་ཡོད་གནས་སྟངས་ངོ་སྤྲོད་གནང་སྐབས།    ཁོང་རྣམ་པས་རྒྱབ་སྐྱོར་གྱི་རྣམ་པ་ཤུགས་ཆེ་བཏོན་འདུག།