བོད་མི་ཞིག་ལ་ལོ་༡༣ ཁྲིམས་བཅད།

༄༅།    །དེ་རིང་ཕྱི་ཟླ་གཉིས་པའི་ཚེས་༨ཉིན་རྒྱ་ནག་གཞུང་འབྲེལ་ཤིན་ཧྭ་གསར་ལས་ཁང་གིས་སྤེལ་བའི་གནས་ཚུལ་ལྟར་ན། མཚོ་སྔོན་ཞིང་ཆེན་རྨ་ལྷོ་བོད་རིགས་རང་སྐྱོང་ཁུལ་མི་དམངས་འབྲིང་རིམ་ཁྲིམས་ཁང་གིས་བོད་མི་འཕགས་པ་ཞུ་བར་ཆེད་མངགས་མི་བསད་པའི་ཉེས་མིང་བཙུགས་ནས་ལོ་དགུ་དང་། རྒྱལ་ཁབ་ཁ་བྲལ་ལ་སྐུལ་སློང་གི་ཉེས་མིང་བཙུགས་ནས་ལོ་ལྔ་བཅས་ཁྱོན་བསྡོམས་ནས་ལོ་༡༣གྱི་བཙོན་འཇུག་ཁྲིམས་ཐག་བཅད་ཡོད་འདུག རྨ་ལྷོ་བོད་རིགས་རང་སྐྱོང་ཁུལ་མི་དམངས་འབྲིང་རིམ་ཁྲིམས་ཁང་གིས་བཅད་པའི་ཁྲིམས་ཐག་ལ་གཞིགས་ན། བོད་མི་འཕགས་པ་ཡིས་མི་གཞན་པས་རང་ལུས་མེར་སྲེག་གཏོང་རྒྱུར་ངན་སྐུལ་དང་། སླུ་འདྲིད། སྐུལ་སློང་བྱས་ཡོད་པས་བྱ་སྤྱོད་དེ་ཆེད་དམིགས་ཀྱི་མི་བསད་པའི་ཉེས་པ་བསགས་པ་དང་། ཁོང་གིས་མི་མང་པོར་ཁྲིམས་འགལ་ཁྲོམ་སྐོར་བྱ་རྒྱུ་འགོ་ཁྲིད་དེ།    བོད་རང་བཙན་གྱི་གཏམ་བསྒྲགས་ནས་རྒྱལ་ཁབ་ཁ་བྲལ་གྱི་ལས་ལ་ཞུགས་ཡོད་སྐོར་ངོ་སྤྲོད་དང་འབྲེལ།    བྱ་སྤྱོད་དེ་རྒྱལ་ཁབ་ཁ་བྲལ་ལ་སྐུལ་སློང་གི་ཉེས་པ་བསགས་ཡོད་ཅེས་བཀོད་འདུག
རྒྱ་ནག་གཞུང་གིས་སྔ་རྗེས་བོད་མིའི་རང་ལུས་མེར་སྲེག་དོན་རྐྱེན་གྱི་ངོ་བོ་ཟེར་བའི་བརྙན་པར་གསུམ་རྒྱ་ནག་དབུས་བརྙན་འཕྲིད་ལས་ཁུངས་ཀྱིས་བསྟུད་མར་བཏོན་ནས་སྐད་ཡིག་ལྔ་དྲུག་ཅིག་གིས་ཕྱི་ཕྱོགས་སུ་ཁྱབ་བསྒྲགས་བྱས་ཡོད་པ་དང་། དེའི་སྔ་རྗེས་སུ་བོད་མིའི་རང་ལུས་མེར་སྲེག་དོན་རྐྱེན་ལ་ངན་སྐུལ་བྱས་པའི་ཉེས་མིང་བཙུགས་ནས་མདོ་སྨད་རྔ་བ་རུ་བོད་མི་གཅིག་ལ་ལོ་གཉིས་དུས་འགྱངས་ཀྱི་སྲོག་ཁྲིམས་དང་གཞན་ཞིག་ལ་ལོ་བཅུའི་བཙོན་འཇུག་ཁྲིམས་ཐག་བཅད་ཡོད་ལ། བླ་བྲང་བསང་ཆུ་རྫོང་དུ་བོད་མི་དྲུག་ལ་ལོ་གསུམ་ནས་༡༢བར་གྱི་བཙོན་འཇུག་ཁྲིམས་ཁག་བཅད་ཡོད་པ་རེད།།