བོད་ཀྱི་གནད་དོན་རྒྱ་ནག་གཞུང་དང་གླེང་སློང་བྱེད་དགོས།

དེ་ཡང་བཙན་བྱོལ་བོད་མིའི་སྒྲིག་འཛུགས་ཀྱི་དྲ་རྒྱའི་ཐོག་སྤེལ་དོན། ཕྱི་ཟླ་དང་པོའི་ཚེས་༢༥ ནས་༢༧ བར་གྱི་ཉིན་གྲངས་གསུམ་རིང་མཇར་མན་ནང་དུ་ཡོད་པའི་བོད་དོན་རྒྱབ་སྐྱོར་ཚོགས་པའི་འགན་འཛིན་ལྷན་ཚོགས་ཚོགས་འདུའི་སྐབས། ༢༠༠༩ ནས་བཟུང་ད་བར་དུ་བོད་ནང་ནས་བོད་མི་༩༩ རྒྱ་ནག་གཞུང་གིས་བོད་མིའི་ཐོག་འཛིན་པའི་དྲག་གནོན་གྱི་སྲིད་ཇུས་ལ་ངོ་རྒོལ་གནང་སྟེ་རང་ལུས་མེར་བསྲེག་བཏང་བའི་གནད་དོན་ཐད་གྲོས་བསྡུར་གནང་ཡོད་པ་དང་། རྒྱ་ནག་གཞུང་གི་མཁྲེག་འཛིན་སྲིད་ཇུས་ཀྱི་རྐྱེན་པས་བོད་མི་མང་པོ་ཞིག་གིས་རང་ལུས་མེ་བསྲེག་བཏང་བའི་ཛ་དྲག་གི་གནས་སྟངས་ལ་ཧ་ཅང་གི་བློ་འཚབ་ཡོད་པ་བསྟན་ཐོག། བོད་ནང་དུ་ཁ་ཡོད་ལག་ཡོད་ཀྱི་འགྱུར་བ་ཞིག་ཡོང་ཐབས་ལ་ང་ཚོས་མུ་མཐུད་འབད་བརྩོན་བྱ་རྒྱུ་ཡིན་ལ་བོད་མི་ཚོས་འཚེ་མེད་ཞི་བའི་སྒོ་ནས་ངོ་རྒོལ་ལས་འགུལ་སྤེལ་རྒྱུའི་ཐོབ་ཐང་ཡོད་པ་ང་ཚོས་ཁས་ལེན་བྱེད་ཀྱི་ཡོད། ད་ལྟའི་སྐབས་སུ་བོད་ནང་གི་བོད་མི་ཚོའི་དངོས་ཡོད་ཀྱི་དཀའ་ངལ་རྣམས་ཞིབ་ཕྲ་ཤེས་རྟོགས་དཀའ་བར་བརྟེན་ནས་ཁོང་རྣམས་ཀྱིས་ཐག་གཅོད་གང་གནང་བར་ང་ཚོས་བརྩི་བཀུར་ཞུ་བཞིན་ཡོད། འོན་ཀྱང་བོད་མི་ཚོས་རང་ལུས་མེ་བསྲེག་གཏོང་དགོས་པའི་རྒྱུ་རྐྱེན་གང་ལ་ཐུག་ཀྱི་ཡོད་པ་དེ་ངོས་འཛིན་གསལ་པོ་བྱ་རྒྱུ་གལ་འགངས་ཆེན་པོ་རེད། བོད་ནང་གི་གནས་སྟངས་བཟང་ཕྱོགས་སུ་འགྱུར་བ་འགྲོ་རྒྱུར་རྒྱ་ནག་གཞུང་ལ་གནོན་ཤུགས་སྤྲོད་རྒྱུའི་ཐད་ང་ཚོིས་མཇན་མན་གཞུང་དང་རྒྱལ་སྤྱིའི་ཐོག་ལ་འབོད་སྐུལ་ཞུ་ཞོར་མཇར་མི་ནེ་གཞུང་གིས་བོད་ཀྱི་གནད་དོན་རྒྱ་ནག་གཞུང་དང་མཉམ་གླེང་སློང་བྱེད་དགོས་པའི་དགོས་འདུན་བཏོན་ཡོད་འདུག