བོད་མིས་རྒྱ་གར་གྱི་རྒྱལ་ས་ལྡི་ལིར་རྒྱ་ནག་སྲིད་བློན་ལ་ངོ་རྒོལ།

༄༅༎དེ་རིང་གཟའ་ལྷག་པའི་ཉིན་རྒྱ་གར་གྱི་རྒྱལ་ས་ལྡི་ལིའི་ནང་བོད་མི་བརྒྱ་ཕྲག་ཁ་ཤས་ཀྱིས་རྒྱ་ནག་གི་སྲིད་བློན་དབོན་ཅའ་བའོ་རྒྱ་གར་ནང་འཚམས་གཟིགས་སུ་ཕེབས་པ་དང་སྟུན་ནས་རྒྱ་ནག་གཞུང་གིས་བོད་ནང་དབང་བསྒྱུར་བྱེད་བཞིན་པར་ངོ་རྒོལ་གྱི་སྐད་འབོད་བྱས་ཡོད་པ་རེད་

ད་རེས་རྒྱ་ནག་གི་སྲིད་བློན་རྒྱ་གར་ནང་རྒྱལ་དོན་འཚམས་གཟིགས་སུ་ཕེབས་པ་དང་སྟུན་ནས་རྒྱ་ནག་གཞུང་གིས་བོད་ནང་དབང་བསྒྱུར་བྱེད་བཞིན་པར་ངོ་རྒོལ་གྱི་ལས་འགུལ་དེ་བཞིན་བོད་ཀྱི་གཞོན་ནུ་ལྷན་ཚོགས་ནས་གོ་སྒྲིག་གནང་བ་ཞིག་ཡིན་པ་དང་ ངོ་རྒོལ་ནང་ཞུགས་མཁན་གྱི་བོད་མི་དང་བོད་དོན་རྒྱབ་སྐྱོར་བ་ཚོས་ལག་ཏུ་བོད་ཀྱི་རྒྱལ་དར་དང་རྒྱ་ནག་གཞུང་གིས་བོད་ལ་བཙན་འཛུལ་བྱས་པར་ངོ་རྒོལ་གྱི་སྦྱར་ཚིག་འཁོད་པའི་ཤིང་སྦྱང་སོགས་འཁྱེར་ནས་ངོ་རྒོལ་སྐད་འབོད་གནང་ཡོད་པ་དང་ ངོ་རྒོལ་གནང་མཁན་ཚོས་རྒྱ་ནག་གི་སྲིད་བློན་གཟའ་པ་སངས་ཉིན་རྒྱ་གར་ནས་པ་ཀི་སི་ཐན་ཡུལ་དུ་ཕྱིར་ཐོན་མ་བྱས་བར་རྒྱ་གར་གྱི་ས་ཁུལ་ག་པར་ཕེབས་ཀྱང་ངོ་རྒོལ་གྱི་ལས་འགུལ་སྤེལ་རྒྱུ་ཡིན་པ་གསུངས་འདུག  

བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་དབང་རིན་འཛིན་ལགས་ཀྱིས་རྒྱ་གར་གྱི་སྲིད་བློན་མན་མོ་ཧན་སིང་མཆོག་གིས་རྒྱ་ནག་གི་སྲིད་བློན་དབུན་ཅའ་བའོ་དང་ལྷན་དུ་གཟའ་ཕུར་བའི་ཉིན་མཇལ་འཕྲད་གནང་བའི་སྐབས་བོད་ཀྱི་གནད་དོན་གླེང་སློང་གནང་རྒྱུའི་འབོད་སྐུལ་གནང་ཡོད་པ་དང་ཕྱོགས་མཚུངས་བོད་བཙན་བཟུང་གི་ལོ་རྒྱུས་མཇུག་མ་སྒྲིལ་བར་ཁོང་རྣམ་པས་བོད་རང་བཙན་གྱི་འཐབ་རྩོད་མུ་མཐུད་གནང་རྒྱུའི་དམ་བཅའ་འཇོག་རྒྱུ་ཡིན་པ་བོད་ཀྱི་གཞོན་ནུ་ལྷན་ཚོགས་ཀྱི་སྤེལ་བའི་གསལ་བསྒྲགས་ནང་འཁོད་ཡོད་པ་རེད་