༸གོང་ས་མཆོག་རྡ་སར་གཏན་ཞུགས་ལོ་༥༠འཁོར་བའི་སྐོར།

༄༅༎བོད་ཀྱི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་རྡ་རམ་ས་ལར་གཏན་བཞུགས་གནང་ནས་ལོ་ངོ་༥༠ཧྲིལ་པོར་འཁོར་བའི་དུས་ཚིགས་ཉིན་བཞུགས་ཡུལ་ཧི་མ་ཅལ་མངའ་སྡེར་ཐུགས་རྗེ་ཆེ་ཞུའི་གཞུང་འབྲེལ་མཛད་སྒོ་ཞིག་ཕྱི་ཟླ་ ༤ཚེས་༣༠དང་ཕྱི་ཟླ་༥པའི་ཚེས་༡བཅས་ཉིན་༢རིང་བཞུགས་སྒར་རྡ་རམ་ས་ལར་གནང་གཏན་འཁེལ་ཡོད་པ་རེད་            ཕྱི་ལོ་༡༩༥༩ལོར་རྒྱ་མི་གུང་བྲན་ཏང་གིས་བོད་ས་ཡོངས་རྫོགས་དྲག་པོའི་དབང་བསྒྱུར་བྱས་རྗེས་༸གོང་ས་མཆོག་སྟོན་འཁོར་དང་བཅས་པ་རྒྱ་གར་འཕགས་པའི་ཡུལ་དུ་བཙན་བྱོལ་དུ་ཕེབས་དགོས་ཆགས་ཡོད་པ་རེད་ ༸གོང་ས་མཆོག་ཐོག་མར་རྒྱ་གར་གཞུང་ཕྱོགས་ནས་གོ་སྒྲིག་ཞུས་པ་ལྟར་མ་སུ་རིར་བཙན་བྱོལ་བོད་གཞུང་གི་འགན་འཁུར་མི་སྣ་ཁག་བསྐོ་བཞག་གནང་བ་སོགས་ཀྱི་མཛད་འཕྲིན་སྐྱངས་ཡོད་པ་རེད་           ཕྱི་ལོ་༡༩༦༠ཕྱི་ཟླ་༤པའི་ཚེས་༣༠ཉིན་༸གོང་ས་མཆོག་མ་སུ་རི་ནས་རྡ་རམ་ས་ལར་གནས་སྤོ་གནང་བའི་རྗེས་རྡ་རམ་ས་ལ་དེ་༸གོང་ས་མཆོག་གི་བཞུགས་སྒར་དང་བཙན་བྱོལ་བོད་གཞུང་གི་ལྟེ་གནས་སུ་གྱུར་ཡོད་པ་རེད་ ཧི་མ་ཅལ་མངའ་སྡེར་ཐུགས་རྗེ་ཆེ་ཞུའི་མཛད་སྒོའི་ཉིན་དང་པོར་༸གོང་ས་མཆོག་ཆིབས་བསྒྱུར་གནང་རྒྱུ་དང་མཛད་སྒོའི་ཐོག་མངའ་སྡེའི་སྤྱི་ཁྱབ་བློན་ཆེན་པེ་རེམ་ཀུ་མར་རྡུ་མལ་མཆོག་སྐུ་མགྲོན་གཙོ་བོར་གདན་ཞུས་ལྟར་ཕེབས་རྒྱུ་མ་ཟད་མཛད་སྒོ་དེ་བཞུགས་སྒར་གྱི་ཉེ་འཁྲིས་རྡ་རི་ཐང་ཆེན་དུ་གནང་རྒྱུ་ཡིན་པ་རེད་            མཛད་སྒོའི་ཉིན་ཀང་ར་རྫོང་གི་འགྲེམས་སྟོན་ཁང་དུ་རྒྱ་གར་གྱི་མེས་པོ་དམ་པ་མ་ཧཏ་མ་གེན་རྡི་དང་༸གོང་ས་མཆོག་གིས་ཞི་བདེ་དང་མཆེད་གྲོགས་ཀྱི་བརྡ་འཕྲིན་སྐུ་དཔར་འགྲེམས་སྟོན་ལམ་ནས་མངོན་པར་གསལ་བ་གནང་རྒྱུ་ཡིན་ཞིང་འགྲེམས་སྟོན་དེའི་དབུ་འབྱེད་དེ་ཧི་མ་ཅལ་མངའ་སྡེའི་བཟོ་ལས་བློན་ཆེན་ཀི་རི་ཤན་ཀ་པུར་མཆོག་གིས་གནང་རྒྱུ་ཡིན་པ་རེད་ ཧི་མ་ཅལ་མངའ་སྡེར་ཐུགས་རྗེ་ཆེ་ཞུའི་མཛད་སྒོའི་ཉིན་གཉིས་པར་རྒྱ་གར་གཞུང་གི་དངས་ལྕགས་བཟོ་ལས་བློན་ཆེན་ལྦིར་བ་རྡ་ར་སིང་མཆོག་གདན་ཞུ་ལྟར་ཕེབས་གཏན་འཁེལ་ཡོད་ཅིང་            ཉིན་དེར་འདས་པའི་ལོ་ངོ་༥༠རིང་བཙན་བྱོལ་བོད་མིའི་སྤྱི་ཚོགས་དང་ཤིན་ཏུ་འབྲེལ་ཆགས་ས་གནས་མི་སྣ་ཁག་ཅིག་ལ་ངོས་འཛིན་ལེགས་སོ་གནང་རྒྱུ་ཡིན་པ་རེད་ ཡང་ཉིན་དེར་བོད་གཞུང་སྨན་རྩིས་ཁང་གིས་རིན་མེད་སྨན་སྦྱིན་གནང་རྒྱུའི་ལས་རིམ་ཞིག་ཀྱང་འཆར་འགོད་གནང་ཡོད་པ་རེད་