རྒྱ་གར་ལ་ཐུགས་རྗེ་ཆེ་ཞུའི་དུས་སྟོན་གོ་བསྒྲིགས།

༄༅༎བཙན་བྱོལ་བོད་གཞུང་གི་ཕྱི་དྲིལ་ལས་ཁུངས་དང་ལྷོ་གཞིས་ལས་ཁུངས་གཉིས་ཐུན་མོང་གི་ཐོག་ནས་གོ་བསྒྲིགས་གནང་བའི་འོག་རྒྱ་གར་ལྷོ་ཕྱོགས་ཀྱི་གྲོང་ཁྱེར་བྷེང་ལོར་ནང་འདི་ཚེས་ཉི་ཤུ་གཉིས་ནས་བཞི་བར་ཉིན་གྲངས་གསུམ་རིང་བོད་ཀྱི་དུས་སྟོན་ཞིག་ཚུགས་གནང་གི་ཡོད་འདུག་པ་དེ་ནི་རྒྱ་གར་གཞུང་ལ་བོད་མི་ཚོར་འདས་པའི་ལོ་ངོ་ལྔ་བཅུའི་རིང་སྐྱབས་བཅོལ་གྱི་མཐུན་འགྱུར་ཟབ་མོ་གནང་བར་ཐུགས་རྗེ་ཆེ་ཞུ་རྒྱུའི་མཚོན་དོན་ཞིག་ཡིན་པ་རེད།

དུས་སྟོན་དེའི་དབུ་འབྱེད་མཛད་སྒོར་སྐུ་མགྲོན་གཙོ་བོར་ཀར་ན་དྲ་ཀའི་མངའ་སྡེའི་གྲོས་ཚོགས་འཐུས་མི་སྐུ་ཞབས་ན་རེན་དར་བ་བྗུ་མཆོག་ནས་གནང་གི་ཡོད་འདུག ཉིན་གྲངས་གསུམ་གྱི་དུས་སྟོན་དེའི་ནང་བོད་ཀྱི་ཐུན་མོང་མ་ཡིན་པའི་སྒྱུ་རྩལ་དང་ལག་རྩལ་ཕྱི་རྒྱལ་ནས་བཟོ་བཀོད་བྱས་པས་༧གོང་ས་མཆོག་གི་མཛད་རྣམ་དང་གཞན་ཡང་བོད་དང་འབྲེལ་བའི་གློག་བརྙན་རིགས་ཅིག་བཏོན་གནང་འཆར་ཡོད་པ་རེད། དེ་བཞིན་བོད་ཀྱི་གསོ་བ་རིག་པའི་སྨན་དང་བོད་ཁྱིམ་སློབ་ཕྲུག་ཚོས་གཞས་སྣ་འཁྲབ་སྟོན་ལྷག་པར་དུ་བོད་ཀྱི་གནད་དོན་ཐོག་མཁས་དབང་ཁག་ཅིག་གདན་ཞུས་ཐོག་བགྲོ་གླེང་གནང་རྒྱུས་མཚོན་བོད་ཀྱི་རིག་གཞུང་ཁྱབ་སྤེལ་གནང་རྒྱུ་ཡིན་འདུག་ལ་དེ་སྔ་བོད་མི་ཚོ་རྒྱ་གར་ས་ཐོག་འབྱོར་བ་ནས་བཟུང་བརྙན་པར་དང་འདྲ་པར་སོགས་ཀྱང་གཟིགས་འབུལ་ཞུ་འཆར་ཡོད་པ་རེད། རྩ་བའི་འདི་ལོ་བོད་མི་ཚོ་བཙན་བྱོལ་དུ་འབྱོར་ནས་ལོ་ངོ་ལྔ་བཅུ་ཐམ་པ་འཁོར་གྱི་ཡོད་པའི་དུས་དྲན་དང་ལྷག་པར་དུ་རྒྱ་གར་གཞུང་ལ་ཐུགས་རྗེ་ཆེ་ཞུའི་དུས་སྟོན་ཕྱི་ཟླ་གསུམ་པ་ནས་བཟུང་མུ་མཐུད་ནས་རྒྱ་གར་གྱི་ས་ཕྱོགས་གང་སར་གནང་དང་གནང་བཞིན་ཡོད་པ་རེད།