རྡོ་རྗེ་ལྷུན་འགྲུབ་ཀྱི་ཨ་ཞང་འཛིན་བཟུང་བྱས་འདུག

དེ་ཡང་བསོད་ནམས་ལགས་ནས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། ཕྱི་ཟླ་༢པའི་ཚེས་༢ཉིན་གྱི་སྔ་དྲོ་རྨ་ལྷོ་རེབ་གོང་གཡེར་གཤོང་དགོན་པའི་རང་ལོ་༤༢སོན་པ་གྲྭ་ཡར་འཕེལ་ལགས་དང་། གཡེར་གཤོང་དགོན་པའི་གྲྭ་རབ་དབྱངས་གཉིས་ས་གནས་མངགས་གཏོང་ཁང་དུ་ཉེན་རྟོག་པས་འབོད་འགུགས་ཀྱིས་འདྲི་བརྩད་ནན་མོར་བྱས་རྗེས་ཡར་འཕེལ་ལགས་གློད་དཀྲོལ་མ་བཏང་བར་མུ་མཐུད་བཀག་གཉེར་དང་། བཙོན་འཇུག་བྱེད་སྲིད་པ་ཡང་བཤད་ནས་ཉིན་དེར་རེབ་གོང་གྲོག་དམར་ཁ་འོག་ཏུ་ཡོད་པའི་བཀག་གཉེར་ཁང་དུ་བཀག་ཡོད་པ་རེད། གནས་ཚུལ་ལྟར་ན། ཡར་འཕེལ་ལགས་ནི་དཔའ་བོ་རྡོ་རྗེ་ལྷུན་གྲུབ་གྱི་ཨ་ཞང་ཡིན་པ་དང་། ཁོང་གཉིས་འཛིན་བཟུང་བྱས་དགོས་དོན་ནི་ལོ་སྔོན་མའི་ནང་རྒྱ་ནག་གི་ཚོགས་ཆེན་བཅོ་བརྒྱད་ཀྱི་སྐབས་དང་སྟབས་བསྟུན་༢༠༡༢ལོའི་ཕྱི་ཟླ་༡༡པའི་ཚེས་༤ཉིན་རང་ལུས་མེར་རུ་བསྲེགས་ནས་རྒྱ་ནག་གི་དྲག་གནོན་དབང་བསྒྱུར་སྲིད་ཇུས་ལ་ཞི་བའི་ངོ་རྒོལ་གནང་མཁན་ཨ་མདོ་རེབ་གོང་ཆུ་མ་ཀློག་གཤོང་སྡེ་བའི་རང་ལོ་༢༥ཡིན་པ་དཔའ་བོ་རྡོ་རྗེ་ལྷུན་འགྲུབ་ལགས་ཀྱི་གདུང་ཐལ་རོང་བོ་དགོན་པའི་རྒྱབ་ངོས་གདོང་རྒྱ་གླད་ནས་ཀློག་གཤོང་སྡེ་བའི་རང་ཁྱིམ་དུ་གདན་འདྲེན་ཞུས་སྐབས་གྲྭ་ཡར་འཕེལ་ལག་ཏུ་དཔའ་བོ་རྡོ་རྗེ་ལྷུན་གྲུབ་ཀྱི་སྐུ་པར་བཟུང་བ་དང་། སྒྲ་དབྱངས ཀྱི་ལག་ཏུ་༧གོང་ས་མཆོག་གི་སྐུ་པར་བཟུང་ནས་དཔའ་བོ་རྡོ་རྗེ་ལྷུན་གྲུབ་ལགས་ཀྱི་སྐུ་ཐལ་གདན་འདྲེན་ཞུས་པས་ཉེས་འཛུགས་འོག་འཛིན་བཟུང་བྱས་བ་བཤད་བཞིན་པ་རེད།