ཨ་རིའི་གཞུང་ནས་སྐྱེ་རྒུ་མདོར་རོགས་སྐྱོར་གནང་།

༄༅༎ད་ལོ་སྤྱི་ཟླ་༤པའི་ཚེས་༡༤ཉིན་བོད་ཡུལ་ཤུལ་སྐྱེ་རྒུ་མདོའི་ཁུལ་དུ་ས་ཡོམ་གྱི་གོད་ཆག་ཅི་ཆེ་བྱུང་བ་ནས་བཟུང་ཨ་མི་རི་ཀའི་གཞུང་གིས་བོད་ནང་ས་ཡོམ་གྱི་གོད་ཆག་ཐད་རོགས་མགོན་མུ་མཐུད་གནང་བཞིན་ཡོད་ཐོག་ད་རེས་ཀྱི་ས་ཡོམ་གྱི་གོད་ཆག་བྱུང་སའི་ཁུལ་དུ་མཁོ་བའི་འཐུང་ཆུ་གཙང་བཟོའི་ཡོ་ཆས་དང་སྨན་བཅོས་ཀྱི་མཐུན་རྐྱེན་ཡོ་ཆས་སོགས་རོགས་སྐྱོར་སྐྱེལ་འདྲེན་གནང་ཡོད་པ་རེད།

རྒྱ་ནག་གི་གྲོང་ཁྱེར་གྲན་རྡུར་བཅའ་བཞུགས་ཨ་རིའི་ཞུང་ཚབ་ཌེ་ལྦི་ཌི་སྦ་རའོན་གྱིས་གསུངས་པར་འཐུང་ཆུ་གཙང་བཟོའི་འཕྲུལ་ཆས་ངོ་རེར་མ་གནས་ཨ་སྒོར་༥༥༠༠༠ཙམ་གནས་ཀྱི་ཡོད་པ་དང་དེས་ཉིན་རེར་མི་གྲངས་ཆིག་ཁྲི་ཙམ་ལ་མི་རེར་ཆུ་ལི་ཌར་༡༥ཙམ་མཁོ་སྤྲོད་བྱེད་ཐུབ་ཀྱི་ཡོད་པའི་སྐོར་དང་དེ་བཞིན་ནད་བཅོས་སྨན་བྱད་ཀྱི་གྲས་སུ་ཁྲག་གཙང་བཟོ་དང་ཕྲུ་གུ་ནད་པ་ཚོར་མཁོ་བའི་སྨན་བཅོས་ཀྱི་མཐུན་རྐྱེན་སོགས་ཆེད་བརྫོངས་གནང་ཡོད་པ་དེ་ཚོ་སྤྱི་ཟླ་༥པའི་ཚེས་༢༥ཉིན་གྲན་རྡུར་འབྱོར་ཡོད་པ་རེད།