བྱང་ཀོ་རི་ཡའི་རྡུལ་ཕྲན་བཟོ་བསྐྲུན་མཚམས་འཇོག་གནད་དོན།

༄༅༎བྱང་ཀོ་རི་ཡའི་རྡུལ་ཕྲན་གོ་མཚོན་བཟོ་བསྐྲུན་ལས་འཆར་མཚམས་འཇོག་གནད་དོན་ཐོག་གི་ཨ་རིའི་དམིགས་བསལ་སྐུ་ཚབ་སྐུ་ཞབས་ཁིརི་སི་ཊོ་ཕར་ཧིལ་མཆོག་དུས་ཡུན་ཉིན་གྲངས་གསུམ་རིང་བྱ་ཀོ་རི་ཡའི་ནང་ཕེབས་ནས་ཡུལ་དེའི་རྡུལ་ཕྲན་གོ་མཚོན་བཟོ་བསྐྲུན་ལས་འཆར་མཚམས་འཇོག་གི་གནད་དོན་ཐོག་གྲོས་མོལ་གནང་བའི་རྗེས་དེ་རིང་གཟའ་པ་སངས་ཉིན་བྱང་ཀོ་རི་ཡ་ནས་ལྷོ་ཀོ་རི་ཡའི་ནང་ཕྱིར་ལོག་ཕེབས་ཡོད་པ་དང༌། ཡིན་ནའི་ལྷོ་ཀོ་རི་ཡའི་ནང་ཕེབས་པའི་སྐབས་གསར་འགོད་པ་ཚོར་བཀའ་མོལ་གང་ཡང་གནང་མེད་ཅིང༌། ཨ་རིའི་དམིགས་བསལ་སྐུ་ཚབ་བྱང་ཀོ་རི་ཡའི་ནང་ཕེབས་ནས་བྱང་ཀོ་རི་ཡའི་འབྲེལ་ཡོད་དཔོན་རིགས་དང་ལྷན་དུ་ཡུལ་དེའི་རྡུལ་ཕྲན་མཚོན་ཆ་བཟོ་སྐྲུན་ལས་འཆར་ཐོག་བཞག་པའི་གྲོས་མཐུན་མུ་མཐུད་ནས་ལག་བསྟར་བྱེད་མིན་གྱི་གནད་དོན་ཐོག་གྲོས་འཆམ་བྱུང་ཡོད་མེད་གནས་ཚུལ་གསལ་པོ་མེད་པ་དང༌། ཡིན་ནའི་ཨ་རིའི་ཕྱི་སྲིད་ལས་ཁང་གི་མགྲིན་ཚབ་པས་གསུང་ན། ད་ཆ་ང་ཚོས་ཕྱོགས་གཉིས་དབར་གྱི་གྲོས་མོལ་དེ་གང་འདྲ་ཞིག་ཏུ་བསྐྱོད་མིན་དེ་བཞིན་བྱང་ཀོ་རི་ཡར་ར་ལུས་ཡོད་པ་གསུང་ཡོད་པ་རེད། དེ་དང་ཕྱོགས་མཚུངས་བྱང་ཀོ་རི་ཡའི་རྡུལ་ཕྲན་མཚོན་ཆ་བཟོ་སྐྲུན་ལས་འཆར་མཚམས་འཇོག་གནད་དོན་ཐོག་གི་ཉི་ཧོང་གི་དམིགས་བསལ་སྐུ་ཚབ་ཨ་ཀི་ཊ་ཀ་ས་ཨི་ཀི་ཡང་གཟའ་པ་སངས་ཉིན་ཉི་ཧོང་ནས་ལྷོ་ཀོ་རི་ཡའི་ནང་ཕེབས་འབྱོར་གནང་ནས་ ཨ་རི་དང་དེ་བཞིན་ལྷོ་ཀོ་རི་ཡའི་དམིགས་བསལ་སྐུ་ཚབ་དབར་བྱང་ཀོ་རི་ཡའི་རྡུལ་ཕྲན་བཟོ་སྐྲུན་གྱི་གནད་དོན་ཐོག་ཕན་ཚུན་བཀའ་བསྡུར་གནང་རྒྱུ་ཡིན་འདུག