ཨུ་རུམ་ཆིའི་ནང་ཡུལ་སྐོར་སྤྲོ་འཆམ་པ་ཉུང་དུ་ཕྱིན་པ།

༄༅༎དེ་རིང་རེས་གཟའ་ཉི་མའི་ཉིན་རྒྱ་ནག་གཞུང་འབྲེལ་ཤིང་ཧཱ་གསར་ཤོག་ཐོག་ལ་གནས་ཚུལ་སྤེལ་བའི་ནང་ཁ་སྔོན་ཕྱི་ཟླ་བདུན་པའི་ཚེས་ལྔ་ཉིན་ཤིན་ཅང་གི་རྒྱལ་ས་ཨུ་རུམ་ཆི་ནང་དུ་དྲག་པོའི་ཟིང་ཆའི་དོན་རྐྱེན་གྱིས་རྗེས་སུ་རྒྱལ་ས་ཨུ་རུམ་ཆི་ནང་གི་ཁྲོམ་ར་གཙོ་བོ་དེ་གནས་སྐབས་སྒོ་རྒྱབ་སྟེ་བསྐྱར་དུ་སྒོ་མོ་ཕྱེ་པ་ནས་ད་བར་ཡུལ་སྐོར་སྤྲོ་འཆམ་པ་ཡོང་མཁན་གྱི་གྲངས་འབོར་ཧ་ཅང་གི་ཉུང་དུ་ཕྱིན་ཡོད་པའི་སྐོར་བཀོད་ཡོད་པ་རེད།

དེ་ཡང་རྒྱལ་ས་ཨུ་རུམ་ཆི་རྒྱལ་སྤྱིའི་ཁྲོམ་རའི་ལས་ཁུངས་ཀྱི་དཔོན་རིགས་ཀྲུའུ་ཨའོ་ལིང་གིས་བཤད་དོན་ལ་ཁྲོམ་ར་དེ་ནི་ཁ་སྔོན་ཕྱི་ཟླ་བདུན་པའི་ཚེས་ལྔ་ཉིན་ཟིང་ཆའི་དོན་རྐྱེན་མ་བྱུང་བའི་སྔོན་དུ་ཉིན་ལྟར་བཞིན་ཡུལ་སྐོར་སྤྲོ་ཆམ་པ་འབུམ་གཅིག་ལྷག་ཡོང་མཁན་ཡོད་པ་དང་ཡིན་ནའང་ཕྱི་ཟླ་བདུན་པའི་ཚེས་ལྔའི་ཟིང་ཆའི་དོན་རྐྱེན་བྱུང་བའི་རྗེས་ཉིན་གྲངས་བཅུ་བདུན་རིང་སྒོ་རྒྱབ་པ་དང་ཕྱི་ཚེས་ཉི་ཤུ་གཉིས་ཉིན་བསྐྱར་དུ་སྒོ་ཕྱེ་ཡོད་ཀྱང་ད་ཆ་སྤྱི་ཡོངས་ཀྱི་ཡུལ་སྐོར་སྤྲོ་འཆམ་པ་ཡོང་མཁན་གྲངས་འབོར་ནི་བརྒྱ་ནས་ཉིས་བརྒྱ་བར་ལས་མེད་ཅིང་ཁྲོམ་ར་དེའི་ནང་དུ་ཡོད་པའི་ཚོང་ཁང་རྣམས་ཀྱི་ཡོང་འབབ་ནི་ཡུལ་སྐོར་སྤྲོ་འཆམ་པའི་ཉིན་རེའི་ཉོ་ཚོང་གི་དཔལ་འབྱོར་རྒྱབ་རྟེན་གཙོ་བོ་ཡིན་པ་བརྟེན་ད་རེས་ཤིན་ཅང་ནང་དུ་འཕྲད་པའི་ཟིང་ཆའི་དོན་རྐྱེན་དེ་ཡིས་ཤིན་ཅང་གི་ཡུལ་སྐོར་སྤྲོ་འཆམ་པའི་ཐོག་ཧ་ཅང་གི་ཤུགས་རྐྱེན་ཆེན་པོ་ཐེབས་ཏེ་ད་ཆ་ཡུལ་སྐོར་སྤྲོ་འཆམ་པ་ཡོང་མཁན་གྱི་གྲངས་འབོར་ཧ་ཅང་གིས་ཉུང་དུ་ཕྱིན་པ་མ་ཟད་ཁྲོམ་ར་སྟོང་པར་ལུས་ཡོད་པའི་འགྲེལ་བརྗོད་བྱས་ཡོད་པ་རེད།

རྒྱལ་ས་ཨུ་རུམ་ཆི་ནང་གི་ཡུལ་སྐོར་སྤྲོ་འཆམ་པ་བསྐྱིད་ཡུལ་གྱི་ཁྲོམ་ར་གཙོ་བོ་དེར་ས་ཁྱོན་མི་ཊར་གྲུ་བཞི་མ་འབུམ་གཅིག་ཡོད་པ་དང་ཚོང་ཁང་དང་ཁྲོམ་སྐྱག་བཞི་སྟོང་ལྷག་ཡོད་ཅིང་ཡིན་ནའང་རྒྱ་ནག་གཞུང་གིས་ཕྱི་ཟླ་བདུན་པའི་ཚེས་ལྔ་ཉིན་གྱི་ཟིང་ཆའི་དོན་རྐྱེན་ནང་མི་གྲངས་༡༩༧རྐྱེན་ལམ་དུ་ཕྱིན་པ་དང་མི་གྲངས་ཆིག་སྟོང་དྲུག་བརྒྱ་ལྷག་རྨས་སྐྱོན་ཕོག་པ་མ་ཟད་ཁྲོམ་དེའི་ནང་གི་ཚོང་ཁང་མང་པོ་གཏོར་བཅོམ་བྱས་པའི་གནས་ཚུལ་བྱུང་བ་བཤད་དེ་ཕྱི་ཟླ་བདུན་པའི་ཚེས་དྲུག་ནས་ཁྲོམ་ར་དེ་སྒོ་རྒྱབ་ཡོད་པ་རེད། ཁྲོམ་ར་དེའི་ནང་དུ་ཚོང་ལས་གཉེར་མཁན་རྒྱ་ཧན་མི་རིགས་ཤིག་གིས་དེང་སྐབས་ཚོང་རྩ་བ་ནས་མེད་པ་དང་ཁྲོམ་ར་དེ་བསྐྱར་དུ་སྒོ་མོ་ཕྱེ་པ་ནས་གཟའ་འཁོར་གཉིས་ཙམ་དེའི་རིང་ལ་ཉིན་རེའི་ཚོང་གི་ཡོང་འབབ་རྒྱ་མིའི་སྒོར་མོ་བཅོ་ལྔ་ལས་མེད་པ་དེ་ཡིས་ཚོང་ཁང་གཡར་གླ་ཡང་ལོན་རྒྱུ་ཁག་པོ་ཡིན་པ་འགྲེལ་བརྗོད་བྱས་ཡོད་པ་རེད༎