ཨ་རིའི་གྲོས་ཚོགས་གོང་མའི་ནང་ཆེ་བསྟོད་ཀྱི་གྲོས་འཆར།

༄༅༎ཨ་རིའི་གྲོས་ཚོགས་གོང་མའི་ནང་དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན་རིན་པོ་ཆེ་མཆོག་ལ་ཆེ་བསྟོད་མཚོན་གྲོས་འཆར་ཞིག་བཏོན་འདུག
གྲོས་འཆར་དེའི་ནང༌། དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན་རིན་པོ་ཆེ་མཆོག་གིས་༸གོང་ས་མཆོག་གིས་དམིགས་བསལ་སྐུ་ཚབ་ལ་བསྐོ་བཞག་གནང་སྟེ། རྒྱ་ནག་གཞུང་དང་འབྲེལ་མོལ་སྔ་ཕྱིར་ཐེངས་༩་ཙམ་གནང་ཡོད་པ་དང༌། དུས་ཡུན་དེ་དག་གི་རིང་བོད་ཀྱི་ཐོུང་མ་ཡིན་པའི་ཆོས་དང་རིག་གཞུང་སྲུང་སྐྱོབ་སླད། དབུ་མའི་ལམ་གྱི་ཐོག་ནས་བོད་ལ་དོན་དམ་གྱི་རང་སྐྱོང་ཡོང་ཐབས་སུ་མཁས་མཛངས་ལྡན་པའི་སྒོ་ནས་རྒྱ་ནག་གཞུང་དང་བོད་གཞུང་བར་གོ་དོན་ལེགས་རྟོགས་ཡོང་རེའི་བཀའ་བསྡུར་གནང་ཡོད་པ་དེར།  ཨ་རི་སོགས་རྒྱལ་སྤྱིའི་ཐོག་ནས་ཀྱང་བོད་ཀྱི་བདེན་པའི་གནད་དོན་རྟོགས་པར་ཕན་རླབས་ཆེན་པོ་བྱུང་ཡོད་པ་དང༌། རྒྱ་ནག་གཞུང་དང་རྒྱལ་སྤྱིའི་ཁྲིམས་ལུགས་དང་མཐུན་པའི་བོད་ཀྱི་རྩ་དོན་ཐག་གཅོད་ཡོང་རེའི་ཕྱག་ལས་གཟེངས་སུ་ཐོན་པ་གནང་ཡོད་པ་ངོས་འཛིན་མཚོན་ཆེད་ཡིན་ཞེས་བརྗོད་འདུག
རྒྱ་ནག་གཞུང་གིས་དྲག་གནོན་སྲིད་བྱུས་འོག་བོད་ནང་ཛ་དྲག་གི་གནས་སྟངས་ཇེ་ཞན་ཇེ་སྡུག་ཏུ་ཕྱིན་པ་བརྟེན་ད་ལོ་སྤྱི་ཟླ་༦་ཚེས་༡་ཉིན་ཁོང་དམིགས་བསལ་སྐུ་ཚབ་ཀྱི་མཚན་གནས་ནས་དགོངས་ཞུ་གནང་ཡོད་པ་དང༌། དེ་རྗེས་རྒྱ་ནག་ཕྱོགས་ནས་བོད་རྒྱ་གཉིས་བར་གྲོས་མོལ་གནང་མཁན་རྒྱ་ནག་འཐབ་ཕྱོགས་གཅིག་གྱུར་གི་དཔོན་རིགས་མཐོ་གྲས་གཉིས་ཀྱི་ལས་གནས་ཀྱང་འཕོ་འགྱུར་གཏང་ཡོད་པའི་གནས་ཚུལ་ཡང་ཐོན་ཡོད་པ་རེད།།