ཨ་རིས་རྒྱ་ནག་དང་ལྷན་བོད་དོན་གླེང་འདུག

༄༅།    །འདི་ག་རྒྱལ་ས་ཝ་ཤིང་ཀྲོན་དུ་ཨ་རིའི་ཕྱི་སྲིད་དྲུང་ཆེ་ཕྱག་རོགས་མའེ་ཀལ་ པོས་ནར་མཆོག་གིས་སྣེ་འཁྲིད་པའི་འབྲེལ་ཡོད་དཔོན་རིགས་དང་། རྒྱ་ནག་གི་ཕྱི་སྲིད་ལས་ཁུངས་ཀྱི་རྒྱལ་སྤྱིའི་འབྲེལ་མཐུད་སྐུ་ཚབ་དང་། དེ་བཞིན་གཞུང་ཚབ་ལས་བྱེད་བཅས་ཀྱི་དབར་འགྲོ་བ་མིའི་ཐོབ་ཐང་གི་གནད་དོན་ཐོག་གྲོས་མོལ་གནང་ཡོད་པ་དང་།    ཁ་ས་རེས་གཟའ་ལྷག་པའི་ཉིན་ཨ་རིའི་ཕྱི་སྲིད་དྲུང་ཆེ་ཕྱག་རོགས་ཀྱིས་རྒྱ་ནག་གཞུང་ནས་དཔལ་འབྱོར་གྱི་གནས་སྟངས་ཡག་ཏུ་བཏང་བ་ནང་བཞིན་གཞུང་གི་ལས་དོན་སྤེལ་ཕྱོགས་ལ་མི་འགྲིགས་པའི་སྐྱོན་བརྗོད་བྱེད་མཁན་དང་ལྟ་བ་མི་མཐུན་མཁན་ཚོའི་ཐོག་ལའང་བསམ་བློ་གུ་བཤངས་ཀྱི་ཐོག་ནས་སོ་སོའི་བསམ་ཚུལ་བཏོན་ཆོག་པ་བཟོ་དགོས་རྒྱུ་གལ་ཆེན་པོ་ཡིན་ལུགས་བརྡ་ལན་གསལ་པོ་སྤྲད་ཡོད་པ་རེད།    དེས་མ་ཟད་རྒྱ་ནག་གཞུང་ནས་འཛིན་བཟུང་བཙོན་བཅུག་བྱས་པའི་ཁྲིམས་རྩོད་པ་དང་། ཆོས་ཕྱོགས་ཀྱི་མི་སྣ། རྩོམ་པ་པོ་སོགས་མི་སྣ་ཁག་ཅིག་གི་གནས་སྟངས་ཟུར་བཏོན་བྱས་ཡོད་ལུགས་འགྲེལ་བརྗོད་གནང་འདུག རྒྱ་ནག་གི་ཕྱོགས་ནས་ཀྱང་ཨ་མི་རི་ཀ་རང་ཉིད་ཀྱི་འགྲོ་བ་མིའི་ཐོབ་ཐང་དང་། མི་རིགས་དབྱེ་འབྱེད། བཙོན་ཁང་གི་གནས་སྟངས་སོགས་ལ་ལྟ་དགོས་ལུགས་ཚུར་སྐྱོན་འཛུགས་བྱས་པའི་སྐོར་ཡང་ཁོང་གིས་འགྲེལ་བརྗོད་གནང་འདུག