འཛམ་གླིང་ཆོས་ཕྱོཌ་ཀྱི་རླབས་ཆེན་དབུ་ཁྲིད་བརྒྱའི་མཚན་གཞུང༌།

༄༅༎ཉེ་ལམ་ལྦཏ་ཀིན་སི་བསྐྱར་ཞིབ་ཞེས་པའི་དུས་དེབ་ཀྱིས་འཛམ་གླིང་ནང་གི་ཆོས་ཕྱོགས་ཀྱི་རླབས་ཆེན་དབུ་འཁྲིད་བརྒྱའི་མཚན་གཞུང་འདོན་སྤེལ་ཞུས་པའི་ཁོངས་ནས་ བོད་ཀྱི་བླ་ན་མེད་པའི་དབུ་འཁྲིད་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གོ་ལ་འདིའི་སྟེང་གི་ཆོས་ཕྱོགས་ཀྱི་དབུ་འཁྲིད་ཨང་གཉིས་པར་འདེམས་ཐོན་ཞུས་འདུག།

Watkins Review འམ་ལྦཏ་ཀིན་སི་བསྐྱར་ཞིབ་དུས་དེབ་འདི་ནི་དབྱིན་ཇིའི་རྒྱལ་ས་ལོན་ཌོན་དུ་རྟེན་གཞི་བྱེད་པའི་ལོ་ངོ་བརྒྱ་ཕྲག་ལྷག་གི་ལོ་རྒྱུས་ཡོད་པའི་ལྦཏ་ཀིན་སི་དཔེ་མཛོད་ཁང་གིས་འདོན་སྤེལ་ཞུས་པའི་དུས་དེབ་ཅིག་ཡིན་ཞིང་ དུས་དེབ་དེའི་རྩོམ་སྒྲིག་པ་ཚོས་ཆོས་ཕྱོགས་ཀྱི་དབུ་འཁྲིད་གྲགས་ཅན་མི་སྣ་བརྒྱའི་མཚན་གཞུང་འདོན་སྤེལ་ཞུས་པའི་དམིགས་ཡུལ་གཙོ་བོ་ནི་ འཛམ་གླིང་འདིའི་སྟེང་གི་ཆོས་ལུགས་ཕན་ཚུན་མཐུན་འབྲེལ་གོང་འཕེལ་གཏོང་ཆེད་བགྲོ་གླེང་ཚད་ལྡན་ཞིག་འབྱུང་ཐུབ་རྒྱུར་རེ་བ་གནང་པ་ཞིག་ཡིན་འདུག།

ཆོས་ལུགས་ཀྱི་དབུ་འཁྲིད་གྲགས་ཅན་མི་སྣ་བརྒྱའི་མཚན་གཞུང་གི་ནང་འཁོད་རྒྱུར་ལྦཏ་ཀིན་སི་དཔེ་མཛོད་ཁང་གིས་གཙོ་བོའི་ཆ་རྐྱེན་གསུམ་བཏོན་ཡོད་པ་དང་ དང་པོ་ནི་ ཆོས་ལུགས་ཀྱི་དབུ་འཁྲིད་དེ་དག་ད་ལྟ་སྐུ་འཚོ་ཞུགས་སུ་ཡོད་པ་དང་ གཉིས་པ་དབུ་འཁྲིད་གང་དང་གང་གིས་འཛམ་གླིང་ནང་ཆོས་ཕྱོགས་ཀྱི་ཐོག་ནས་ཁྱད་དུ་འཕགས་པའི་ལེགས་སྐྱེས་སམ་མཛད་རྗེས་ཇི་བཞག་ གསུམ་པ་ ཆོས་ཕྱོགས་ཀྱི་དབུ་འཁྲིད་དེ་དག་གི་མཚན་ གུ་གལ་དྲ་རྒྱའི་ནང་འཚོལ་ཞིབ་སྐབས་ ནེལ་སན་དྲ་མཛོད་ཀྱི་ནང་ཡོད་དགོས་པ་བཅས་ཡིན་འདུག།

ལྦཏ་ཀིན་སི་བསྐྱར་ཞིབ་དུས་དེབ་ཀྱི་ནང་ཆོས་ལུགས་ཀྱི་དབུ་འཁྲིད་གྲགས་ཅན་བརྒྱའི་མཚན་གཞུང་འདོན་སྤེལ་ཞུས་པའི་ཁོངས་ནས་ཨང་དང་པོ་ ཇར་མན་དུ་འཁྲུངས་པ་རྩོམ་པ་པོ་དང་ཆོས་ཕྱོགས་ཀྱི་འགོ་འཁྲིད་ ཨེ་ཀཏ་ཊོ་ལེ་ཞུ་བ་དེ་ཡིན་ཞིང་ ཨང་གཉིས་པར་༧གོང་ས་༧སྐྱབས་མགོན་ཆེན་པོ་མཆོག་དང་ ཨང་གསུམ་པར་རྩོམ་པ་པོ་གྲགས་ཅན་ ལྦེན་ཌ་ཡར་ཞུ་བ་ཞིག་དང་ ཡང་ཨ་རིའི་མི་སེར་བོད་བརྒྱུད་ནང་བསྟན་གྱི་བཙུན་མ་པདྨ་ཆོས་སྒྲོན་ལགས་ཨང་༣༩པར་འདེམས་ཐོན་ཞུས་ཡོད་པའི་གནས་ཚུལ་ཐོན་འདུག།