བདག་སྐྱོང་ལ་དམངས་གཙོ་དང་ཁྲིམས་ལུགས་དགོས།

དེ་ཡང་རྒྱ་ནག་གི་༼ཡིན་འཚོལ་༽དུས་དེབ་ཀྱིས་ཕྱི་ཟླ་༡པོའི་ཚེས་༢༣ཉིན་སྲིད་བློན་ཝུན་ཅ་པོའོ་ཡིས་རྒྱལ་སྲིད་སྤྱི་ཁྱབ་ཁང་གི་ཚང་འཛོམས་ཚོགས་ཆེན་བརྒྱད་པའི་སྐབས་ཀྱི་གསུང་བཤད་ནང་དོན་ལུང་འདྲེན་བྱས་ཡོད་པ་དང། སྐབས་དེར་ཝུན་ཅ་པོའོ་ཡིས་གཙོ་བོ་རྒྱ་ནག་གཞུང་བཅོས་བསྒྱུར་དང་། འཛུགས་སྐྲུན་ཐད་ཀྱི་གནད་དོན་སྐོར་གླེང་ཡོད་ཅིང། ཁོང་གིས་དབང་ཆ་གང་བྱུང་དུ་སྤྱོད་པ། དབང་ཆ་དང་སྒོ་མོའི་ཉོ་ཚོང་། དཔོན་པོ་དང་ཚོང་པ་ལྐོག་འབྲེལ་སོགས་རུལ་སུངས་ཀྱི་གནད་དོན་རྟག་ཏུ་མཐོང་ཡང་མི་མཚར། འགོ་ཁྲིད་ཁ་ཤས་ཀྱི་དབང་ཆ་བེད་སྤྱད་ནས་སྒེར་དོན་སྒྲུབ་པ། ལྐོག་ཟ་རྔན་སྤྲོད་སོགས་རུལ་སུངས་གྱོད་དོན་གྱིས་ཤུགས་རྐྱེན་ངན་པ་བཞག་ཡོད་ཅེས་དང་། ཡང་ཁོང་གིས་རྒྱལ་ཁབ་སྐྱོང་བ་དང་ཆབ་སྲིད་འཛིན་པ། རྒྱལ་ཁབ་ཡུན་རིང་བདེ་བར་འཁོད་པ་ནི་དུས་རབས་གང་དང། རྒྱལ་ཁབ་སུ་ཡི་དབུ་ཁྲིད་ཡིན་ཡང་ངེས་པར་དུ་བསམ་བློ་གཏོང་དགོས་པ་དང་། ཐག་གཅོད་བྱེད་དགོས་པའི་དོན་དག་གལ་ཆེན་ཡིན་ལ། མདོར་ན་རྒྱལ་ཁབ་ཀྱི་བདག་སྐྱོང་ངེས་པར་དུ་དམངས་གཙོ་དང་ཁྲིམས་ལུགས་ཀྱིས་འཛིན་སྐྱོང་ལ་རྟེན་དགོས་ཞེས་ནན་གྱིས་བརྗོད་འདུག