အကျဉ်းသားတွေ လွတ်ငြိမ်းချမ်းသာခွင့် တန်းတူရရှိဖို့ အပါအဝင် ၄ ချက်တောင်းဆို

နိုင်ငံတော်သမ္မတက ၂ လအတွင်း လွတ်ငြိမ်းချမ်းသာခွင့် ၃ ကြိမ်ပေးအပြီးမှာ အကျဉ်းထောင် ၆ ခုလောက်မှာ အကျဉ်းသားတွေက တူညီတဲ့ တောင်းဆိုချက်တွေနဲ့ ဆန္ဒပြတောင်းဆိုမှုတွေ ဖြစ်ပေါ်ခဲ့ပါတယ်။

မေလ ၈ ရက်နေ့စပြီး ကလေးအကျဉ်းထောင်တွင်း အကျဉ်းသားတွေက တောင်းဆိုချက် ၄ ချက်ကို တောင်းဆိုပြီး မနေ့ ညပိုင်းမှာ စစ်ကိုင်းတိုင်း ရွှေဘိုထောင်၊ ကရင်ပြည်နယ်က တောင်ကလေး အကျဉ်းထောင်တို့မှာ ဆန္ဒပြ ခဲ့ကြပါတယ်။ တဆက်တည်းမှာပဲ ဒီနေ့ မနက်ပိုင်းကစပြီး ပဲခူးတိုင်းက သာယာဝတီ အကျဉ်းထောင်၊ ကချင်ပြည်နယ် မြစ်ကြီးနား အကျဉ်းထောင်နဲ့ ဧရာဝတီတိုင်း ပုသိမ်အကျဉ်းထောင်တွေမှာ ဆန္ဒပြတောင်းဆိုမှုတွေ ဖြစ်ခဲ့ပါတယ်။

အကျဉ်းထောင် ၆ ခုလုံးက အကျဉ်းသားတွေဟာ လွတ်ငြိမ်းချမ်းသာခွင့် တန်းတူရရှိဖို့၊ လူ့အခွင့်အရေးကော်မရှင်နဲ့ တွေ့ခွင့်ပေးဖို့၊ မီဒီယာတွေနဲ့ ချိတ်ဆက်ပေးဖို့နဲ့ အစိုးရတာဝန်ရှိသူတွေနဲ့ တွေ့ခွင့်ပေးဖို့ ဆိုတဲ့အချက်တွေကို တောင်းဆိုခဲ့ကြတာပါ။

ဆန္ဒပြဆူပူမှုတွေကို ထိန်းသိမ်းခဲ့တဲ့ ထောင်တွေထဲမှာ စစ်ကိုင်းတိုင်း ရွှေဘိုထောင်မှာတော့ လူသေဆုံးမှုတွေ ဖြစ်ပေါ်ခဲ့ပြီး ရွှေဘိုထောင်အတွင်း သေဆုံးသူတွေကို သွားထုတ်တဲ့ နာရေးကူညီမှုအသင်းရဲ့ ထုတ်ပြန်ချက်အရ လူ ၄ ဦးသေဆုံးပြီး ၂ ဦးဒဏ်ရာရရှိခဲ့တယ်လို့ သိရပါတယ်။

စစ်ကိုင်းတိုင်းဒေသကြီး ဝန်ကြီးချုပ် ဦးမြင့်နိုင် ရွှေဘိုထောင်ကို သွားရောက်ခဲ့ပြီး ဆူပူမှုတွေကို ထိန်းသိမ်းလိုက်နိုင် ပြီဖြစ်ကြောင်းနဲ့ တောင်းဆိုမှုတွေကိုလည်း ဆက်လက်အကောင်အထည်ဖော် ဆောင်ရွက်သွားမှာဖြစ်ကြောင်း သတင်းမီဒီယာတွေကို ပြောခဲ့ပါတယ်။

ကချင်ပြည်နယ် မြစ်ကြီးနားအကျဉ်းထောင်မှာ ဒီနေ့မနက် ၅ နာရီဝန်းကျင်ခန့်ကစပြီး အကျဉ်းသားတွေက တန်းတူညီမျှ လွတ်ငြိမ်းချမ်းသာခွင့်ပေးဖို့ အပါအဝင် အချက် ၄ ချက်ကို ဆန္ဒပြတောင်းဆိုခဲ့ကြပါတယ်။

သတင်း မီဒီယာတွေနဲ့ တွေ့ဆုံခွင့်ပေးဖို့၊ လူ့အခွင့်အရေးကော်မရှင်နဲ့ တွေ့ဆုံခွင့်ပေးဖို့နဲ့ တန်းတူညီမျှ လွတ်ငြိမ်းချမ်းသာရရှိခွင့်နဲ့ ပြည်နယ်ဝန်ကြီးချုပ်နဲ့ တွေ့ဆုံခွင့်ရရှိရေးအတွက် တောင်းဆိုနေကြတာဖြစ်တယ်လို့ သိရပါတယ်။

ထောင်တွင်း ဆန္ဒပြမှုတွေနဲ့ ပတ်သက်ပြီး သက်ဆိုင်ရာ အကျဉ်းဦးစီးဌာန အမြဲတမ်းအတွင်းဝန် ဦးမင်းထွန်းစိုးကို RFA ကဆက်သွယ်ပေမယ့် ဖုန်းလက်ခံဖြေကြားတာ မရှိခဲ့ပါဘူး။ ပြည်ထဲရေးဝန်ကြီးဌာနကို ဆက်လက် ဆက်သွယ်ပေမယ့် အကျဉ်းဦးစီးဌာနကိုသာ မေးဖို့ ပြောခဲ့ပါတယ်။