ထောင်ဆူပူမှုတွေ စုံစမ်းစစ်ဆေးမယ်လို့ သမ္မတရုံး ထုတ်ပြန်ကြေညာ

ပြီးခဲ့တဲ့ ၂ ရက်အတွင်း အကျဉ်းထောင်တချို့မှာ အကျဉ်းသားတွေ ဆူပူခဲ့ကြတာနဲ့ ပတ်သက်ပြီး စုံစမ်းစစ်ဆေးမယ်လို့ နိုင်ငံတော် သမ္မတရုံးက ကြေညာချက်တစောင် မနေ့ညနေက ထုတ်ပြန်လိုက်ပါတယ်။

အဲဒီ ကြေညာချက်မှာ မေလ ၈ ရက်နေ့က ကလေးနဲ့ ဘားအံ၊ ၉ ရက်နေ့က ရွှေဘို၊ မြစ်ကြီးနား၊ ထားဝယ်၊ သာယာဝတီနဲ့ ပုသိမ်အကျဉ်းထောင်တွေမှာ ဆူပူမှုတွေ ဖြစ်ပွားခဲ့ကြောင်း၊ အဲဒီ ဆူပူမှုတွေမှာ ထောင်အသီးသီးက အကျဉ်းသားတွေရဲ့ တောင်းဆိုချက်တွေ ထပ်တူထပ်မျှဖြစ်မှု၊ ဆူပူမှုတွေကို အကျဉ်းသားတွေက လက်ကိုင်ဖုန်းနဲ့ လူမှုကွန်ရက်ကနေ တိုက်ရိုက်လွှင့်တင်ခဲ့မှုတွေရှိခဲ့တဲ့အတွက် ချိတ်ဆက်မှုနဲ့ သွေးထိုးလှုံ့ဆော်မှုတွေရှိနေတယ်လို့ သုံးသပ်ကြောင်း၊ ဒါကြောင့် အဲဒီ ဆူပူမှုတွေကို ထိရောက်စွာ စုံစမ်းစစ်ဆေးမှာ ဖြစ်ကြောင်း ဖေါ်ပြထားပါတယ်။