རྒྱ་ནག་དབུས་ཧན་ནན་ཞིང་ཆེན་ནང་དུ་ངོ་རྒོལ་བྱུང་བ།

༄༅༎རྒྱ་ནག་གི་དབུས་ཧན་ནན་ཞིང་ཆེན་ནང་དུ་ཡོད་པའི་བཟོ་གྲྭ་ཞིག་གི་ལས་བཟོ་བ་སྟོང་ཕྲག་གཅིག་ཙམ་གྱིས་ཁོང་ཚོའི་ལས་ཀའི་གླ་འབབ་སྤྲོད་དགོས་པ་དང་ཉེན་སྲུང་འགན་ལེན་གྱི་དངུལ་འབབ་སྤྲོད་དགོས་ཞེས་རྒྱ་ལམ་ཐོག་ཏུ་ངོ་རྒོལ་ལས་འགུལ་གཞི་རྒྱ་ཆེན་པོ་ཞིག་སྤེལ་ཡོད་པའི་སྐོར་ཤིང་ཧཱ་གསར་ཤོག་ཐོག་གནས་ཚུལ་སྤེལ་ཡོད་པ་དེ་རིང་ཕེ་རན་སི་གསར་འགྱུར་ལས་ཁང་གིས་ལུང་འདྲེན་བྱས་ཡོད་པ་རེད།

རེས་གཟའ་སྤེན་པའི་ཉིན་རྒྱ་ནག་གི་ཧན་ནན་ཞིང་ཆེན་གྱི་ལིན་ཀྲོའུ་གྲོང་ཁྱེར་ནང་གི་ལྕགས་དང་ངར་ལྕགས་བཟོ་གྲྭའི་ལས་བཟོ་བ་ཚོས་མོ་ཊའི་འགྲིམས་འགྲུལ་གྱི་འགྲོ་ལམ་ཆེ་ཤོས་དེ་བཀག་སྟེ་ངོ་རྒོལ་བྱས་པ་དང་ཁོང་ཚོའི་དགོས་འདུན་གཙོ་བོ་ནི་ཟླ་རེའི་ལས་ཀའི་གླ་ཆ་དང་སྨན་བཅོས་དང་ཉེན་སྲུང་འགན་ལེན་གྱི་གུན་གསབ་སྤྲོད་དགོས་པ་དེ་བཞིན་བཟོ་གྲྭ་ནས་ལས་མེད་དུ་གྱུར་བའི་ལས་བཟོ་བ་ཚོར་གུན་གསབ་སྤྲོད་དགོས་པའི་སྐོར་ཡིན་ཞིང་རྒྱ་ནག་ནང་ལོ་ལྟར་བཞིན་བཟོ་པ་དང་ཞིང་པ།ལས་མེད་སོགས་ལས་རིགས་རྣམ་གྲངས་མི་འདྲ་བར་བཞུགས་མཁན་མི་དམངས་སྟོང་ཕྲག་མང་པོས་ངོ་རྒོལ་ལས་འགུལ་སྤེལ་བ་མཐོང་རྒྱུ་ཡོད་པ་དང་ལྷག་པར་དུ་དེང་སྐབས་རྒྱལ་སྤྱིའི་དཔལ་འབྱོར་གྱི་གནས་སྟངས་དཀའ་ཚེགས་ཅན་དུ་གྱུར་བར་བརྟེན་ནས་རྒྱ་ནག་གཞུང་གིས་དམིགས་བསལ་རྒྱ་ནག་གི་ལས་བཟོ་བར་གླ་ཆ་དུས་ཐོག་ཏུ་སྤྲོད་མི་ཐུབ་པ་དང་ཚོང་ལས་འཕེལ་རྒྱས་ཉམས་རྒུད་དུ་འགྲོ་བ།ལྷག་པར་དུ་ལས་མེད་ཀྱི་གྲངས་འབོར་འཕེལ་རྒྱས་འགྲོ་བའི་དཀའ་ངལ་ཆེ་རུ་འགྲོ་རྒྱུ་ཡིན་པ་བློ་འཚབ་ཆེན་པོ་བྱེད་བཞིན་ཡོད་པ་རེད༎