རྒྱ་ནག་ཀན་སུའུ་ལུང་ནན་ཁུལ་དུ་ཟིང་ཆ་ལངས་བ།

༄༅༎ཀན་སུའུ་ཤར་ལྷོའི་ལུང་ནན་གྲོང་ཁྱེར་ལྦུའུ་ཏུའུ་ཁུལ་དུ་གཟའ་འཁོར་དེའི་ཚེས་བཅུ་བདུན་ཉིན་སྔ་དྲོ་ནས་འགོ་ཚུགས་པའི་ཟིང་ཆ་དེ་མུ་མཐུད་དེ་རེས་གཟའ་མིག་དམར་དགོང་མོ་གཞི་ནས་ཞོད་འཇགས་བཏང་བ་རེད། གཞུང་ཕྱོགས་ཀྱི་གསར་འགོད་ལས་རིགས་པས་ཟིང་ཆའི་ནང་མང་ཤོས་ལ་མི་ཉིས་སྟོང་ཡས་མས་ཞུགས་ཡོད་པ་འགྲེལ་བཤད་བྱས་ཡོད་པ་དང་མིག་མཐོང་ལག་ཟིན་བྱུང་བའི་མིས་བཤད་ཡག་བྱས་ན་མི་ཁྲི་བརྒལ་ཡོད་པ་རེད། རྒྱ་ནག་གཞུང་གི་དཔོན་རིགས་ནས་ད་ལམ་ཉིན་གཉིས་ཀྱི་ཟིང་ཆའི་ནང་མི་དྲུག་བཅུ་ཙམ་ལ་རྨས་སྐྱོན་བྱུང་ཡོད་པ་རེད་ཟེ་བཤད་ཡོད་པ་དང་ཤིན་ཧ་གསར་ལས་ཁང་གིས་སྤེལ་བའི་གསར་འགྱུར་གཏོང་སྤེལ་དུ་དེ་རིང་རེས་གཟའ་ལྷག་པའི་སྔ་དྲོར་ལུང་ནན་ཁུལ་གྱིས་སྒྲིག་སྲོལ་གཞི་རྩའི་ཆ་ནས་རྒྱུན་ལྡན་སླར་གསོ་བྱུང་བ་བཀོད་ཡོད། ད་རེས་ལུང་ནན་དུ་གྲོང་ཁྱེར་ལས་ཁུངས་ལ་གདོང་མཆོངས་བྱེད་པའི་དོན་རྐྱེན་དེ་ནི་གྲོང་ཁྱེར་འཛུགས་བསྐྲུན་ཆེད་ཁང་པ་བཤིག་ཧྲལ་གྱིས་ལུང་ནན་གྲོང་ཁྱེར་སྲིད་འཛིན་ལྟེ་གནས་གནས་སྤོས་བྱེད་པའི་གནད་དོན་ལ་གོ་བསྡུར་བྱས་དོན་མི་དམངས་ནས་གོ་ཐོས་བྱུང་རྗེས་གྲོང་ཁྱེར་ལས་ཁུངས་སུ་ཞུ་གཏུགས་བྱེད་པར་ཡོང་ནས་ཟིང་ཆ་ལངས་ཏེ་སྲིད་གཞུང་ནས་ཉེན་རྟོག་པ་སྟོང་ཕྲག་ཁ་ཤས་བཏང་ནས་མིག་ཆུ་ཤོར་བྱེད་དུག་རྫས་གཏོར་བ་དང་ཉེན་རྟོག་པའི་གློག་རྒྱུགས་གཞུས་པ་བཅས་ཀྱིས་མང་ཚོགས་ཁ་གཏོར་བཏང་བས་མི་མང་པོར་རྨས་སྐྱོན་བྱུང་བ་བཅས་སྤྱི་ཚོགས་ཀྱི་སྒྲིག་སྲོལ་ལ་ཚབས་ཆེའི་ཟིང་ཆའི་དོན་རྐྱེན་དེ་ལངས་བ་ཞིག་ཡིན་པ་རེད།