རྒྱ་ནག་གི་འགོ་ཁྲིད་འཕོ་འགྱུར་དང་རྒྱལ་ནང་བདེ་འཇགས།

ད་ལོ་སྟོན་ཁ་རྒྱ་ནག་དམར་ཤོག་ཚོགས་པའི་ཚོགས་ཆེན་སྐབས་རྒྱ་ནག་གི་སྲིད་འཛིན་ཧུ་ཅིན་ཐའོ་དང་སྲིད་བློན་ཝེན་ཅ་པའོ་གཉིས་ལས་འཁུར་དུས་ཡུན་གཙང་ནས་དགོངས་ཞུ་བྱ་དགོས་ཀྱི་ཡོད་པ་ལྟར། འཛམ་གླིང་ནང་ནས་མི་འབོར་ཆེ་ཤོས་རྒྱལ་ཁབ་རྒྱ་ནག་གི་འགོ་ཁྲིད་ལ་བརྗེ་འགྱུར་་འགྲོ་གི་ཡོད་པ་རེད། རྒྱ་ནག་གི་མཐོ་རིམ་གཞུང་འབྲེལ་དཔོན་རིགས་དང་ཉེན་རྟོག་པའི་དཔོན་རིགས་ཀྱི་ཚོགས་འདུ་ཞིག་གི་སར། རྒྱ་ནག་གི་བདེ་འཇགས་ཉེན་རྟོག་པའི་སྤྱི་ཁྱབ་Zhou Yongkang གིས།  ལྷིང་འཇགས་མེད་པའི་གནས་སྟངས་ཐོག་དྲག་གནོན་ཤུགས་ཆེ་བྱེད་དགོས་རྒྱུའི་བཀའ་བཏང་ཡོད་ལུགས་དེ་རིང་གི་རྒྱ་ནག་ཉིན་རེའི་གསར་ཤོག་གི་མདུན་ཤོག་ཐོག་གནས་ཚུལ་བཀོད་འདུག། Zhou ཡིས་ སྤྱི་ཚོགས་བརྟན་ལྷིང་དང་དུས་བདེ་སྲུང་སྐྱོབ་བྱེད་ཡག་དེ་རྒྱ་ནག་དམར་ཤོག་ཚོགས་པའི་ཚོགས་ཆེན་ཐེངས་༡༨པ་འགོ་འཛུགས་བྱ་རྒྱུར་ཧ་ཅང་དགོས་གལ་ཆེ་བའི་ཆ་རྐྱེན་གཙོ་བོ་དེ་རེད་ལ། སྲིད་གཞུང་རིམ་པས་ཨང་དང་པོར་རྩིས་དགོས་སའི་ཆབ་སྲིད་ཀྱི་ལས་འགན་གལ་ཆེ་ཞིག་ཀྱང་རེད་ཅེས་བརྗོད་ཡོད་པ་དང༌། ཡང་ཁོང་གིས་ཁ་བྲལ་རིང་ལུགས་དང་འཇིགས་སྐུལ་དྲག་འཐབ་རིང་ལུགས་ལ་ཁ་གཏད་གདོང་ལེན་བྱ་རྒྱུའི་ལས་དོན་གཏིང་གཟབ་ཏུ་བཏང་བ་བརྒྱུད་། རྒྱལ་ཁབ་ཀྱི་བདེ་འཇགས་ལ་གནོད་སྐྱོན་གཏོང་གཞིའི་བྱ་སྤྱོད་རིགས་སྤེལ་མཁན་རྒྱལ་ནང་དང་ཕྱི་ཕྱོགས་དགྲ་བོའི་སྟོབས་ཤུགས་ངན་འཇོམས་བྱ་རྒྱུའི་སྔོན་ཚུད་གྲ་སྒྲིག་ནན་པོ་བྱ་དགོས་རྒྱུ་ཡིན་སྐོར་འགྲེལ་བརྗོད་བྱས་འདུག།

Zhou གི་འགོ་ཁྲིད་པའི་ལས་ཁང་གིས་ རྒྱ་ནག་རྒྱལ་ཡོངས་ནང་གཞུང་དང་ཆབ་སྲིད་ལྟ་སྤྱོད་ལོགས་བཀར་འཛིན་མཁན་དང༌། བོད་དང་ཤར་ཏུར་ཀིསི་ཐན་བཅས་ཀྱི་ནང་རང་དབང་སྒེར་ལངས་བྱེད་མཁན་ཐོག་དྲག་གནོན་བྱ་རྒྱུའི་ལས་འགན་གཙོ་བོ་དེ་འཁྱེར་གྱི་ཡོད་པ་རེད།