བོད་པའི་བུ་མོོ་ཞིག་རྒྱ་་དམག་གིས་མེ་མདའ་བརྒྱབ་སྟེ་བསད་པ།

༄༅༎འདི་ལོ་ཕྱི་ཟླ་༥ པའི་ཚེས་༢༠ ཉིན་རྒྱལ་ས་ལྷ་སའི་ནང་བོད་རིགས་བུ་མོ་ཞིག་རྒྱ་ནག་གཞུང་གི་དམག་མིས་རྒྱབ་ནས་སྒྲ་མེད་མེ་མདའ་བརྒྱབ་སྟེ་བསད་ཡོད་པའི་གསར་འགོད་གསལ་བསྒྲགས་ཤིག་བོད་གཞུང་མང་ཛ་དྲག་ལས་འགུལ་ཚོགས་ཆུང་གིས་སྤེལ་འདུག

གྲོང་གསེབ་ཀྱི་བུ་མོ་ཕྱུ་བ་གྱོན་ཞིང་མགོ་རས་དཀྲིས་པ་ཞིག་གཙུག་ལག་ཁང་གི་ནང་རང་གི་སྤུན་མཆེས་གྲ་པ་ཞིག་ཐུག་འཕྲད་ཆེད་བསྐྱོད་སྐབས་ གཙུག་ལག་ཁང་གི་ཤིང་རའི་སྒོ་འགྲུམ་དུ་དམག་མིས་བཀག་ཡོད་པ་རེད་ བུ་མོ་དེ་དང་དམག་མིས་བར་ཕྲན་བུ་ཤོད་རེས་བྱུང་རྗེས་དམག་མིས་རྒྱབ་ཕྱོགས་ནས་སྒྲ་མེད་མེ་མདའ་བརྒྱབ་སྟེ་བུ་མོ་དེ་ས་ལ་གྱལ་འདུག་

ཉེ་འཁོར་མི་འགའ་ཤིག་གིས་བུ་མོ་དེ་རྨས་ཏེ་བྲང་ཁོག་ནས་ཁྲག་ཐོན་པ་མཐོང་སྐབས་དོ་སྣང་བྱས་ཀྱང་དམག་མིས་མེ་མདའ་བསྟན་ནས་མི་དེ་དག་ཁ་ཐོར་བཏང་བའི་རྗེས་སུ་བུ་མོ་དེའི་ཕུང་པོ་དམག་མིས་འཁྱེར་ཕྱིན་འདུག བུ་མོ་དེའི་སྐྱེས་ཡུལ་ལྷོ་ཁ་ནས་ཡིན་ལུགས་ཙམ་ལས་དེ་མིན་གྱི་གནས་ཚུལ་ད་ལྟ་ཤེས་རྟོགས་མེད་ལུགས་བཙན་བྱོལ་བོད་གཞུང་མང་ཛ་དྲག་ལས་འགུལ་ཚོགས་ཆུང་གིས་གསར་འགོད་གསལ་བསྒྲགས་ནང་བཀོད་འདུག དེང་ཁམས་དཀར་མཛེས་ཁུལ་དང་ལྷ་ས་ཁུལ་དུ་རྒྱ་ནག་གཞུང་གིས་དམ་བསྒྲགས་ཆེན་པོ་བྱེད་བཞིན་པ་རེད་ ཡང་སྟོད་མངའ་རིས་ཁུལ་དུ་ཡང་རྒྱ་ནག་གཞུང་གིས་བོད་རིགས་ཚོར་དམིགས་བསལ་དམ་བསྒྲགས་ཅི་ཆེ་བྱེད་བཞིན་པའི་གནས་ཚུལ་འདི་ནས་ཤེས་རྟོགས་ཐུབ་ཡོད་པ་རེད༎