འཛམ་གླིང་ནང་ཚོང་དོན་རང་དབང་ཆེ་ཤོས་ཀྱི་ཡུལ་གྲུ་ཧོང་ཀོང༌།

༄༅༎ཨ་རིའི་རྒྱལ་ས་ལྦ་ཤིན་ཀྲོན་དུ་རྟེན་གཞི་བྱས་པའི་ཧེ་རི་ཀྲེཇ་ཐེབས་རྩས་འཛམ་གླིང་ནང་ཚོང་དོན་རང་དབང་ཤུགས་ཆེ་ཤོས་ཀྱི་ཡུལ་གྲུའི་མིང་ཐོ་ཞིག་འདོན་སྤེལ་བྱས་ཡོད་པའི་ནང་ ཧོང་ཀོང་དེ་བཞིན་འཛམ་གླིང་ནང་ནས་ཚོང་ལས་རང་དབང་ལྡན་པའི་ཡུལ་གྲུ་ཨང་དང་པོ་དེ་ཡིན་པ་དང་དེ་རྗེས་སིང་ག་པོར་དང་ ཨོའོ་སེ་ཀྲོ་ལི་ཡ་ ནིའུ་ཛི་ལན་ཡིན་པའི་སྐོར་ལྦོལ་སི་ཀྲིརིཏ་ཇར་ནལ་ཞེས་པའི་གསར་ཤོག་ཐོག་དེ་རིང་གནས་ཚུལ་སྤེལ་འདུག

ཐེབས་རྩ་ཁང་དེས་འཛམ་གླིང་ནང་ནས་ཚོང་དོན་རང་དབང་ལྡན་པའི་ཡུལ་གྲུ་བཟང་ཤོས་དང་སྡུག་ཤོས་ཀྱི་མིང་ཐོ་འདོན་སྤེལ་བྱས་པའི་ནང་  གོང་ཞུས་ཧོང་ཀོང་སོགས་ཡུལ་གྲུ་བཞི་ཕུད་ དེ་མིན་སུད་ཛི་ལན་དྲི་དང་ ཁེ་ན་དྲ་ ཨ་ཡར་ལེན་དྲི་ དྲེན་མཀ་ ཨ་རི་སོགས་འཛམ་གླིང་ནས་ནས་ཚོང་དོན་རང་དབང་ལྡན་པའི་ཡུལ་གྲུ་རྩེ་གྲས་བཅུ་མིང་འདོན་བྱས་ཡོད་པ་དང་ ཚོང་དོན་རང་དབང་ཡོད་མེད་ཀྱི་འཛམ་གླིང་ཡུལ་གྲུ་༡༧༩མིང་འདོན་བྱས་པ་ནས་རྒྱ་ནག་དེ་བཞིན་ཚོང་དོན་རང་དབང་གི་རྒྱལ་ཁབ་མིང་འདོན་བྱས་པའི་ཨང་༡༣༥པ་དེ་ཡིན་ཞིང་ ཚོང་དོན་རང་དབང་རྩ་བ་ནས་མེད་པའི་རྒྱལ་ཁབ་ཁིའུ་སྦ་དང་ཛིམ་སྦབ་ལྦེ་ བྱང་ཀོ་རི་ཡ་བཅས་ཡིན་པ་མིང་འདོན་བྱས་ཡོད་པ་རེད་ ཐེབས་རྩ་ཁང་དེས་ཞིབ་འཇུག་བྱས་པའི་ནང་འཛམ་གླིང་ཁྱོན་ཡོངས་སུ་ཚོང་དོན་རང་དབང་གི་གནས་སྟངས་ན་ནིང་ལས་ཡར་རྒྱས་ཕྱིན་ཡོད་པ་དང་ ལྷག་པར་དུ་ཨ་ཕེ་རི་ཀའི་ཡུལ་ཁག་གི་ཚོང་དོན་རང་དབང་གནས་སྟངས་བཟང་ཕྱོགས་སུ་བསྐྱོད་ཡོད་པའི་སྐོར་གསལ་སྟོན་གནང་ཡོད་པ་རེད་