རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་ལ་ཐུགས་འཚབ།

༄༅༎ཨོའོ་སི་ཀྲོ་ལི་ཡའི་སྲིད་བློན་མཆོག་གིས་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་ཐུགས་འཚབ་ཆེན་པོས་རྒྱ་ནག་གི་ཆེས་མཐོའི་དབུ་ཁྲིད་ཁག་གི་ལྷན་དུ་མཇལ་འཕྲད་སྐབས་དེའི་སྐོར་བཀའ་མོལ་གནང་རྒྱུ་ཡིན་ལུགས་གསལ་སྟོན་གནང་འདུག

སང་ཉིན་རེས་གཟའ་ལྷག་པ་ནས་བཟུང་བདུན་ཕྲག་གཅིག་གི་རིང་ཨོའོ་སི་ཀྲོ་ལི་ཡའི་སྲིད་བློན་ཇུ་ལིན་ཇི་ལདྲ་མཆོག་ཉི་འོང་དང་ ལྷོ་ཀོ་རི་ཡའ་ རྒྱ་ནག་བཅས་ནང་ཨོའོ་སི་ཀྲོ་ལི་ཡའི་འཛུགས་སྐྲུན་ཡར་རྒྱས་དང་ བདེ་འཇགས་ དེ་བཞིན་ཚོང་དོན་གྱི་ལས་དོན་བཅས་ཀྱི་ཆེད་དུ་གོང་ཞུས་རྒྱལ་ཁབ་ཁག་ནང་འཚམས་གཟིགས་ཏུ་ཕེབས་ཀྱི་ཡོད་པ་རེད་ སྲིད་བློན་ཇི་ལདྲ་མཆོག་གིས་ད་རེས་རྒྱ་ནག་ནང་འཚམས་གཟིགས་གནང་རྒྱུན་རིང་ཉེ་ཆར་རྒྱ་ནག་དབུས་ཆབ་སྲིད་གྲོས་ཚོགས་ཀྱི་ཚོགས་གཙོ་ཅའ་ཆིང་ལིན་ཨོའོ་སི་ཀྲོ་ལིི་ཡའི་ནང་ཕེབས་པའི་སྐབས་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་གཏོང་དགོས་པའི་སྐོར་འབོད་སྐུལ་ཞུས་གནང་བ་བཞིན་ད་རེས་རྒྱ་ནག་གི་སྲིད་འཛིན་ཧུའུ་ཅིང་ཐོའོ་དང་ སྲིད་བློན་ལྦུན་བཅའ་བའོ་རྣམ་གཉིས་མཇལ་འཕྲད་གནང་སྐབས་སུ་ཡང་དེ་ལྟར་བསྐྱར་དུ་འབོད་སྐུལ་ཞུ་རྒྱུ་ཡིན་ཞེས་གསལ་སྟོན་གནང་ཡོད་པ་རེད་ དེ་བཞིན་ཡང་ལྕམ་ཇི་ལདྲ་མཆོག་གིས་ད་རེས་རྒྱ་ནག་གི་དབུ་ཁྲིད་ཚོ་དང་མཇལ་འཕྲད་གནང་རྒྱུའི་དུས་ཡུན་དེའི་ནང་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་གཙོ་བོར་འགྱུར་བའི་དེ་མིན་གྱི་གནད་དོན་མང་པོའི་ཐོག་བཀའ་མོལ་ཞུས་ནས་རྒྱ་ནག་དང་ལྷན་དུ་དགེ་མཚན་ལྡན་པའི་འབྲེལ་ལམ་སྐྲུན་ཐུབ་པ་གནང་རྒྱུ་ཡིན་ཞེས་གསལ་སྟོན་གནང་འདུག