ཨ་རིའི་སྲིད་འཛིན་སྦུཤ་རྒྱ་ནག་ཏུ་ཕེབས་ཐོན་གྱི་སྐོར།

༄༅༎ཨ་མི་རི་ཀའི་སྲིད་འཛིན་ ཇོརཇ་སྦུའུ་ཤེ་མཆོག་རྒྱ་ནག་ཏུ་ཨོ་ལིམ་པིག་ཆེད་ཕེབས་ཐོན་གནང་ཟིན་པ་དང་ ལྦ་ཤིང་ཊོན་པོསཊི་གསར་ཤོག་གིས་བཅར་འདྲིར་བཀའ་ལན་གནང་པའི་སྐབས་ འཛམ་གླིང་ནང་རྒྱ་ནག་གི་གནས་བབ་ཇི་ཡིན་ཐད་དགོངས་ཚུལ་བཟང་ངན་གཉིས་ལྡན་ཞིག་གསུངས་པ་དང་ཆབས་ཅིག་ རྒྱ་ནག་དང་མུ་མཐུད་ལས་དོན་འབྲེལ་ལམ་དགོས་རྒྱུ་ནི་གལ་འགངས་ཆེན་པོ་ཡིན་པ་འགྲེལ་བརྗོད་གནང་འདུག

ལྦ་ཤིང་ཊོན་པོསཊི་གསར་ཤོག་གིས་ སྲིད་འཛིན་སྦུའུ་ཤེ་མཆོག་ལ་བཅར་འདྲི་ཞུས་པ་དེ་གཟའ་མིག་དམར་ཉིན་འདོན་སྤེལ་བྱས་ཡོད་པ་དང་ དེའི་ནང་ རྒྱ་ནག་གཞུང་གིས་བྱ་ཀོ་རི་ཡ་དང་ཨི་རན་གྱི་རྡུལ་ཕྲན་ལས་འཆར་བཀག་སྡོམས་ཆེད་འབད་བརྩོན་གནང་པར་བསྡོད་བསྔགས་གནང་པ་དང་སྦྲགས་ སྲིད་འཛིན་སྦུའུ་ཤེ་མཆོག་གིས་ ཁོང་སྲིད་འཛིན་གནང་ཡུན་གྱི་འདས་པའི་ལོ་བརྒྱད་ཀྱི་དུས་ཚོད་དེའི་རིང་ རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་ཡར་རྒྱས་ཕྱིན་ཡོད་ཚུལ་བརྗོད་ཐུབ་རྒྱུ་ཧ་ཅང་ཁག་པོ་ཡིན་པ་འགྲེལ་བརྗོད་གནང་འདུག

སྲིད་འཛིན་སྦུའུ་ཤེ་མཆོག་གིས་ རྒྱ་ནག་གཞུང་ནས་ཨོ་ལིམ་པིག་མ་ཚུགས་སྔོན་སྲུང་སྐྱོབ་ཀྱི་གྲ་སྒྲིག་ཤུགས་ཆེ་ཞིག་བྱེད་བཞིན་པ་དེ་ནི་ རྒྱ་ནག་གཞུང་གི་དབུ་འཁྲིད་ཚོས་དགོས་ངེས་ཞིག་ཡིན་པ་བརྗོད་བཞིན་ཡོད་ན་ཡང་ འགྲོ་བ་མིའི་ཐོབ་ཐང་དོན་གཉེར་བ་ཚོས་འདི་ནི་ གཞུང་དང་ལྟ་བ་མི་མཐུན་མཁན་ཚོའི་ཐོག་དྲག་གནོན་བྱ་རྒྱུའི་ལག་ཆ་ཞིག་ཏུ་ངོས་འཛིན་བྱེད་བཞིན་ཡོད་པ་འགྲེལ་བརྗོད་གནང་འདུག སྲིད་འཛིན་སྦུའུ་ཤེ་མཆོག་གིས་ རྒྱ་ནག་གི་འགོ་འཁྲིད་ཚོས་ འཇིགས་བསྐུལ་དྲག་སྤྱོད་པའི་གཏོར་རྒོལ་འབྱུང་སྲིད་པར་ཚད་ལས་བརྒལ་བའི་དྭོགས་པ་རྣམ་རྟོག་གནང་གི་འདུག་ཅེས་དང་ ངའི་རེ་བར་སྲུང་སྐྱོབ་ཀྱི་གྲ་སྒྲིག་དེ་ཙམ་ཡོད་པ་དང་ཆབས་གཅིག་ རྩེད་འགྲན་གྱི་ཚོར་ཤུགས་མི་ཉམས་པ་བྱེད་དགོས་པ་དེ་ཡིད་འཇགས་བྱེད་དགོས་པ་དང་ གལ་ཏེ་དུས་ཟིང་གི་རྣམ་པ་འདྲ་འབྱུང་ཚེ་ དོན་རྐྱེན་དེ་དག་ལ་དྲག་རྩུབ་དང་དྲག་ལས་མིན་པའི་ཐོག་ནས་གདོང་ལེན་བྱེད་དགོས་ཀྱི་རེད་ཅེས་གསུངས་འདུག

གཟའ་ཉི་མའི་ཉིན་ སྲིད་འཛིན་སྦུའུ་ཤེ་མཆོག་དང་རྒྱ་ནག་གི་སྲིད་འཛིན་ ཧུ་ཇིན་ཏའོ་རྣམ་གཉིས་མཇལ་འཕྲད་གནང་རྒྱུ་ཡིན་ཞིང་ དེའི་གོང་སྲིད་འཛིན་སྦུའུ་ཤེ་མཆོག་ པེ་ཅིང་དུ་ཡོད་པའི་ཡེ་ཤུའི་ཆོས་ཁང་ཞིག་གི་ནང་ཐུགས་སྨོན་ཕྱག་འཚལ་གནང་རྒྱུ་ཡིན་ཞིང་ དེ་རྗེས་སྲིད་འཛིན་གྱི་མཚན་ཐོག་ནས་ ཆོས་དད་རང་དབང་གི་ཐོབ་ཐང་གོང་འཕེལ་གཏོང་དགོས་པའི་འབོད་བསྐུལ་གྱི་གསལ་བསྒྲགས་ཤིག་གནང་རྒྱུ་ཡིན་འདུག

སྲིད་འཛིན་སྦུའུ་ཤེ་མཆོག་ནས་ རྒྱ་ནག་གི་སྲིད་འཛིན་ཧུ་ཇིན་ཏའོ་མཇལ་འཕྲད་སྐབས་ འགྲོ་བ་མིའི་ཐོབ་ཐང་གི་གནས་བབ་དང་ ཆོས་དད་རང་དབང་གི་གནད་དོན་སྐོར་བཀའ་མོལ་ལྷུགས་པོ་གནང་རྒྱུ་ཡིན་པ་གསུངས་པར་མ་ཟད་ རྒྱ་ནག་གི་སྲིད་འཛིན་གྱི་ངོས་ནས་སྲིད་འཛིན་སྦུའུ་ཤེ་གྱི་བཀའ་མོལ་ལ་གསན་འཇོག་དང་ དོན་གཉེར་ལྡན་པའི་ཐོག་ནས་དགོངས་བཞེས་གནང་རྒྱུར་ཡིད་ཆེས་གནང་གི་ཡོད་ཅེས་གསུངས་འདུག།