ཨ་རིའི་སྲིད་འཛིན་ནས་རྒྱའི་འགྲོ་བ་མིའི་ཐོབ་ཐང་ལ་ཐུཌ་འཚབ།

༄༅༎ཨ་རིའི་སྲིད་འཛིན་ཇོ་ཇེ་སྦུའུ་ཤེ་མཆོག་གིས་རྒྱ་ནག་གི་སྲིད་འཛིན་ཧུ་ཅིན་ཏའོ་དང་མཇལ་འཕྲད་མ་གནང་བའི་སྔ་ནུབ་ཏུ་རྒྱ་ནག་གི་འགྲོ་བ་མིའི་ཐོབ་ཐང་དང་ ཆོས་དང་རང་དབང་ལ་ཐུགས་འཚབ་གཏིང་ཟབ་ཡོད་ལུགས་གསུངས་གནང་འདུག ཨ་རིའི་སྲིད་འཛིན་གྱིས་བདུན་རེའི་ནང་རླུང་འཕྲིན་ཐོག་གསུང་འཕྲིན་ཞིག་འཆར་ཅན་གནང་སྲོལ་ཡོད་ཅིང་ཨ་མི་རི་ཀས་རྒྱ་ནག་གཞུང་གི་བྱེད་ཕྱོགས་ལ་བློ་འཚབ་གནང་གི་ཡོད་པ་གསལ་པོ་གཏམ་བཤད་བྱེད་ཀྱི་ཡོད་ཅེས་དང་ རྒྱ་ནག་གི་ནུས་པ་ཡོངས་རྫོགས་མངོན་དུ་འགྱུར་བར་བྱེད་པར་ མི་མང་ལ་ཡིད་ཆེས་གནང་སྟེ་རྒྱ་ནག་གཞུང་གིས་རང་དབང་ཆེ་རུ་གཏོང་གལ་ཆེ་བ་ཤིན་ཏུ་གསལ་པོ་བཟོས་ཡོད་ཅེས་སྲིད་འཛིན་སྦུའུ་ཤེ་མཆོག་གིས་གསུངས་གནང་འདུག ཨ་རིའི་སྲིད་འཛིན་གྱི་སྐབས་འདིའི་གཞུང་དོན་ཕྱོགས་བསྐྱོད་རིང་ད་བར་སྔ་རྗེས་ལན་གསུམ་རྒྱ་ནག་ལ་སྐྱོན་བརྗོད་གནང་ཡོད་ཅིང་ རྒྱ་ནག་མི་མང་ལ་གཏམ་བརྗོད་རང་དབང་དང་ ཆོས་དད་རང་དབང་ཐོབ་ན་ འབྱུང་འགྱུར་རྒྱ་ནག་ལ་ཉེན་ཚབས་བཟོ་ཉེན་མེད་པ་དང་ མི་མང་དེ་དག་གིས་དུས་རབས་ཉི་ཤུ་རྩ་གཅིག་པའི་རྒྱ་ནག་རྒྱལ་ཁབ་ཆེན་པོ་འཛུགས་སྐྲུན་བྱེད་ངེས་ཡིན་པ་ངོས་རང་རྒྱ་ནག་ཏུ་བལྟ་སྐོར་བྱེད་རིང་ངེས་པ་རྙེད་བྱུང་ཞེས་ཨ་རིའི་སྲིད་འཛིན་སྦུའུ་ཤེ་མཆོག་གིས་གསུངས་གནང་འདུག

རེས་གཟའ་ཉི་མའི་ཉིན་ཨ་མི་རི་ཀའི་སྲིད་འཛིན་སྦུའུ་ཤེ་མཆོག་ཡེ་ཤུའི་མཆོད་ཁང་དུ་ཕེབས་སྐབས་ཆོས་དད་རང་དབང་སྐོར་གཏམ་བཤད་གནང་ངེས་པ་ཡིན་པ་རེད་ ཨ་རིའི་སྲིད་འཛིན་མཆོག་གིས་རྒྱ་ནག་གི་སྲིད་འཛིན་ཧུ་ཅིན་ཏའོ་དང་སྲིད་བློན་ལྦེན་ཅ་པའོ་གཉིས་སོ་སོར་མཇལ་འཕྲད་གནང་འཆར་ཡོད་པ་རེད༎