རྒྱ་ནག་ནང་ངོ་རྒོལ་སྤེལ་ཆོག་པའི་སྙན་ཞུ་འབུལ་དགོས་པའི་སྐོར་།

༄༅༎རྒྱ་ནག་ནང་ཨོ་ལིམ་པིག་རྩེད་འགྲན་རིང་ལ་ངོ་རྒོལ་གྱི་ལས་འགུལ་རིགས་སྤེལ་རྒྱུའི་འཆར་གཞི་ཡོད་པའི་རྒྱ་མི་རིགས་དང་ཕྱི་རྒྱལ་བ་ཚོས་ངེས་པར་དུ་ཉིན་མ་ལྔའི་གོང་ལ་ཆོག་མཆན་ཞུ་རྒྱུའི་སྙན་ཞུ་ཕུལ་དགོས་པའི་སྐོར་རྒྱ་ནག་གི་རྩེད་འགྲན་བདེ་འཇགས་དཔོན་རིགས་ཀྱིས་གསུངས་ཡོད་པ་རེད།

རྒྱ་ནག་གཞུང་ལ་སྐྱོན་བརྗོད་བྱེད་མཁན་དང་ཆབ་སྲིད་ཀྱི་ལྟ་སྤྱོད་མི་མཐུན་མཁན་ཚོས་གསུངས་ན། ཉེ་ཆར་རྒྱ་ནག་གཞུང་གིས་པེ་ཅིང་གི་སྤྱི་གླིང་ཁག་གསུམ་ནང་གཞུང་གིས་བཀའ་ཁྲོལ་ཡོད་པའི་ངོ་རྒོལ་ལས་འགུལ་སྤེལ་རྒྱུའི་གོ་སྒྲིག་བྱས་པའི་སྐོར་བཤད་པ་དེར་སྐྱོན་བརྗོད་བྱེད་པ་དང་ལྷག་པར་དུ་ཁོང་ཚོས་རྒྱ་ནག་གཞུང་གིས་བོད་ཐོག་འཛིན་པའི་སྲིད་ཇུས་དང་དེ་བཞིན་སུའུ་ཌའན་གཞུང་གིས་ཌར་ཕུར་ས་གནས་ནང་མི་བསད་ཁྱག་སྦྱོར་གྱི་བྱ་སྤྱོད་སྤེལ་བཞིན་པར་རྒྱ་ནག་གཞུང་གིས་རྒྱབ་སྐྱོར་བྱེད་པའི་སྲིད་ཇུས། གསར་འགྱུར་ལས་རིགས་ཁག་དང་ཆབ་སྲིད་ཀྱི་ལས་འགུལ་ཁག་ཐོག་དམ་བསྒྲགས་བྱེད་པའི་སྲིད་ཇུས་ཁག་ཐོག་སྐྱོན་བརྗོད་བྱེད་ཀྱི་ཡོད་པ་རེད།  ཡིན་ནའང་པེ་ཅིང་ཨོ་ལིམ་པིག་རྩེད་འགྲན་གོ་སྒྲིག་ཚོགས་ཆུང་གི་བདེ་འཇགས་འགན་འཛིན་ལིའུ་ཧྲའོ་ལྦུ་ཡིས་ངོ་རྒོལ་ལས་འགུལ་སྤེལ་མཁན་ཚོས་ངེས་པར་དུ་ངོ་རྒོལ་བྱེད་ཆོག་པའི་ཆོག་མཆན་གྱི་སྙན་ཞུ་ངོ་རྒོལ་ལས་འགུལ་སྤེལ་རྒྱུའི་ཉིན་མ་ལྔའི་གོང་ལ་ཡིག་ཐོག་ཏུ་སྙན་ཞུ་ཕུལ་དགོས་པ་དང་སྙན་ཞུ་དེ་ཡང་དོ་དག་རང་ཉིད་ཀྱིས་འབྲེལ་ཡོད་རྒྱ་ནག་གི་དཔོན་རིགས་ལ་ཕུལ་དུ་ཡོང་དགོས་པ་དང་གལ་ཏེ་ངོ་རྒོལ་བྱེད་མཁན་ཕྱི་རྒྱལ་བ་ཡིན་ཚེ་ངེས་པར་དུ་རྒྱ་ཡིག་ཐོག་བྲིས་པའི་ཆོག་མཆན་གྱི་སྙན་ཞུ་པེ་ཅིང་གྱི་སྤྱི་དམངས་བདེ་འཇགས་ལས་ཁང་གི་ས་མཚམས་ཀྱི་ལས་དོན་སྡེ་དུ་ཕུལ་དགོས་པའི་སྐོར་བཤད་ཡོད་པ་རེད།