རྒྱ་ནག་ནི་འཛམ་གླིང་ནང་གསར་འགོད་རང་དབང་སྡུག་ཤོས།

༄༅༎ཕྱི་ལོ་ཉིས་སྟོང་དགུ་ཟླ་བ་ལྔ་པའི་ཚེས་གཅིག་རེས་གཟའ་པ་སངས་ཀྱི་ཉིན་ཨ་མེ་རི་ཀའི་ནང་རྟེན་གཞི་བྱས་པའི་འགྲོ་བ་མིའི་ཐོབ་ཐང་ཚོགས་པ་རང་དབང་ཁང་པ་ཞེས་པས་འཛམ་གླིང་ནང་གསར་འགོད་རང་དབང་གི་གནས་སྟངས་སྐོར་གྱི་སྙན་ཐོ་ཞིག་དེ་རང་འགྲེམས་སྤེལ་གནང་ཡོད་པ་དང༌། དེའི་ནང་རྒྱ་ནག་གི་གསར་འགོད་རང་དབང་གི་གནས་སྟངས་ཇེ་སྡུག་ཏུ་ཕྱིན་ཡོད་པའི་སྐོར་འཁོད་ཡོད་པ་རེད། རང་དབང་ཁང་པ་ཞེས་པའི་འགྲོ་བ་མིའི་ཐོབ་ཐང་ཚོགས་པས་བཏོན་པའི་ལོ་འཁོར་སྙན་ཐོ་དེའི་ནང་འཛམ་གླིང་རྒྱལ་ཁབ་༡༩༥ཡོད་པའི་ནང་ནས་གསར་འགོད་རང་དབང་ཡོད་པའི་རྒྱལ་ཁབ་༧༠དང་། གསར་འགོད་ཕྱེད་རང་དབང་མེད་པའི་རྒྱལ་ཁབ་༦༡དང་གསར་འགོད་རང་དབང་མེད་པའི་རྒྱལ་ཁབ་༦༤ཡོད་པ་དབྱེ་འབྱེད་བྱས་ཡོད་པ་དང་། དེའི་ནང་ནས་གསར་འགོད་རང་དབང་སྡུག་ཤོས་ཀྱི་ཡུལ་གྲུ་སའུ་སྡི་ཨ་རཱ་བི་ཡ་དང་ ཝེཏ་ནཱམ། ཏུ་ནི་སི་ཡ། ཏུརྐ་མེ་ནིསྟཱན། ཨི་ཇིཔྚ་བཅས་ཡིན་པ་རེད། སྙན་ཐོ་དེའི་ནང་རྒྱ་ནག་གནང་གསར་འགོད་རང་དབང་གི་གནས་སྟངས་དེ་ཧ་ཅང་གི་ཛ་དྲག་པོ་ཡོད་པ་དང་རྒྱ་ནག་གཞུང་གིས་ཕྱི་ལོ་ཉིས་སྟོང་བརྒྱད་ལོར་པེ་ཅིང་དུ་ཨོ་ལིམ་པིཀས྄་རྒྱལ་སྤྱིའི་རྩེད་འགྲན་སྤེལ་བའི་རྗེས་རྒྱ་ནག་ནང་གསར་འགོད་རང་དབང་ལ་འགན་ལེན་བྱ་རྒྱུའི་ཁས་ལེན་བྱས་ཡོད་ན་ཡང་ཁ་བཤད་ལག་བསྟར་མ་བྱས་པར་འཛམ་གླིང་ནང་ནས་གསར་འགོད་རང་དབང་ལ་བཙན་གནོན་བྱེད་མཁན་གྱི་ལམ་དུ་བསྐྱོད་རྒྱུའི་འདེམས་ཁ་བྱས་ཡོད་པ་འཁོད་ཡོད་འདུག།