ཨོ་སོ་ཀྲོ་ལི་ཡའི་གྲོས་ཚོཌ་འཐུས་མིར་རྒྱ་གཞུང་གིས་སྐྱོན་བརྗོད།

༄༅༎ཨོ་སོ་ཀྲོ་ལི་ཡའི་གྲོས་ཚོགས་ཀྱི་འཐུས་མིའི་ཚོགས་ཆུང་ཞིག་བཞུགས་སྒར་རྡ་རམ་ས་ལར་ཆེད་བཅར་གྱིས་བོད་ཀྱི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་ཞུས་པར་རྒྱ་ནག་གཞུང་གིས་ཁོང་ཁྲོ་ཆེན་པོའི་ཐོག་ནས་སྐྱོན་བརྗོད་ཞུས་འདུག

གྲོས་ཚོགས་གོང་འོག་གཉིས་ཀའི་འཐུས་མི་ལས་གྲུབ་པའི་ཨོ་སོ་ཀྲོ་ལི་ཡའི་སྐུ་ཚབ་ཚོགས་ཆུང་འདི་ལྟ་བུ་ཞིག་གཞུང་འབྲེལ་གྱི་ཐོག་ནས་བཞུགས་སྒར་རྡ་རམ་ས་ལར་འཚམས་གཟིགས་གནང་བ་ནི་ད་རེས་ཐོག་མ་དེ་ཡིན་ཞིང་ཨོ་སོ་ཀྲོ་ལི་ཡའི་རྒྱལ་ས་ཁེན་སྦེ་ར་ནང་ཡོད་པའི་རྒྱ་ནག་གཞུང་ཚབ་ཁང་བརྒྱུད་རྒྱ་ནག་གཞུང་གིས་ཁོང་རྣམ་པའི་འཚམས་གཟིགས་འདི་ནི་རྒྱ་ནག་གི་ནང་སྲིད་ལ་ཐེ་བྱུས་བྱས་པ་ཞིག་ཡིན་ལུགས་བརྗོད་དེ་སྐྱོན་བརྗོད་ཞུས་འདུག

ཨོ་སོ་ཀྲོ་ལི་ཡའི་གྲོས་ཚོགས་ཀྱི་འཐུས་མི་རྣམས་ནས་ཕྱི་ཟླ་བདུན་པའི་ཚེས་གཉིས་ཉིན་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་ཞུས་གནང་ཡོད་ཅིང་སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་ནས་རྒྱ་ནག་གཞུང་གིས་བོད་ཐོག་སྲོག་ཐོག་གི་ཉེས་ཆད་ལྟ་བུའི་སྲིད་བྱུས་ཤིག་བཟུང་བཞིན་ཡོད་པ་བཀའ་གནང་བར་མ་ཟད་རྒྱ་ནག་མི་དམངས་ལ་ཡང་གཞི་རྩའི་རང་དབང་མེད་པ་བཀའ་གནང་འདུག

སྨྲ་བརྗོད་ཀྱི་རང་དབང་མེད་པ་དང་གསར་འགོད་ཀྱི་རང་དབང་མ་སྤྲད་པར་སོ་སོའི་མི་དམངས་ཆེད་ངག་མུན་ནག་གི་ནང་བཞག་བཞིན་པ་དེ་ནི་བཟང་སྤྱོད་ལས་འགལ་བ་ཞིག་ཡིན་པར་དགོངས་ཀྱི་ཡོད་ཅེས་བཀའ་གནང་འདུག

༸གོང་ས་༸སྐྱབས་མགོན་ཆེན་པོ་མཆོག་ནས་ཆུ་ཚོད་གཅིག་ལྷག་རིང་གྲོས་ཚོགས་ཀྱི་འཐུས་མི་རྣམས་དང་མཇལ་འཕྲད་གནང་སྐབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཨོ་སོ་ཀྲོ་ལི་ཡའི་གྲོས་ཚོགས་ཀྱི་འཐུས་མི་བཞུགས་སྒར་རྡ་རམ་ས་ལར་ཆེད་ཕེབས་གནང་པ་དང་བོད་དོན་ཐད་རྒྱབ་སྐྱོར་གནང་པར་ཐུགས་རྗེ་ཆེ་ཞུ་གནང་མཛད་པ་ཆབས་གཅིག་༸གོང་ས་༸སྐྱབས་མགོན་ཆེན་པོ་མཆོག་ནས་བོད་དོན་ཐད་རྒྱབ་སྐྱོར་གནང་པ་དེ་ནི་ངེས་པར་དུ་བོད་པར་ཕྱོགས་ཞེན་ཡོད་པ་མཚོན་པ་ཞིག་མིན་པར་དེ་ནི་བདེན་པ་ལ་རྒྱབ་སྐྱོར་གནང་པ་ཞིག་ཏུ་ངོས་འཛིན་ཞུ་གི་ཡོད་ཅེས་བཀའ་གནང་འདུག

ད་རེས་ཀྱི་ཨོ་སོ་ཀྲོ་ལི་ཡའི་གྲོས་ཚོགས་ཀྱི་སྐུ་ཚབ་ཚོགས་ཆུང་གི་དབུ་འཁྲིད་ལས་རྩོལ་ཚོགས་པའི་གྲོས་ཚོགས་འོག་མའི་འཐུས་མི་སྐུ་ཞབས་མའེ་ཁལ་ཌེན་སྦི་མཆོག་གིས་གྲོས་ཚོགས་ཀྱི་འཐུས་མི་ཁག་གཅིག་འདི་ལོའི་ནང་རྒྱ་ནག་ཏུ་གཞུང་འབྲེལ་འཚམས་གཟིགས་སུ་ཕེབས་སྐབས་བོད་དུ་ཡང་ཕེབས་འདོད་ཡོད་པ་གསུངས་འདུག