བོད་ནང་གི་འབྲོག་པ་གྲོང་ཁྱེར་དུ་སྤོ་རུ་བཅུག་པའི་གནད་དོན་སྐོར།

༄༅༎སུད་སི་གྲོང་ཁྱེར་ཇི་ནི་ལྦའི་ནང་ཚུགས་བཞིན་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཚོགས་ཐེངས་དགུ་པའི་ཐོག་གཞུང་འབྲེལ་མིན་པའི་ཚོགས་པའི་སྐུ་ཚབ་ནས་བོད་ནང་གི་གནད་དོན་སྐོར་གཏམ་བཤད་སྤེལ་རྒྱུར་རྒྱ་ནག་གཞུང་གིས་འགོག་རྐྱེན་བཟོ་ཐབས་བྱས་ཡོད་ཀྱང་ལམ་ལྷོང་བྱུང་མེད་པ་རེད།

དེ་ཡང་ཕྱི་ཚེས་༨ནས་འགོ་ཚུགས་སྟེ་སུད་སི་གྲོང་ཁྱེར་ཇི་ནི་ལྦའི་ནང་ཚོགས་བཞིན་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐོག་གཞུང་འབྲེལ་མིན་པའི་ཚོགས་སྡེ་ཁག་གིས་བོད་ཀྱི་གནད་དོན་དེ་གླེང་སློང་ཡོངས་ཐབས་སུ་འབད་བརྩོན་གནང་ཏེ། ད་རེས་ཚེས་༡༠ཉིན་འཇར་མན་གྱི་གཞུང་འབྲེལ་མིན་པའི་ཚོགས་སྡེའི་སྐུ་ཚབ་ནས་ འཛམ་གླིང་མཉམ་འབྲེལ་རྒྱལ་ཚོགས་ཀྱི་ཡུལ་མིའི་འགྲོ་བ་མིའི་ཐོབ་ཐང་གནས་སྟངས་ཐོག་ཞིབ་འཇུག་གནང་མཁན་དང་ཁོང་གི་ཕྱག་རོགས་གཉིས་ནས་བོད་ཀྱི་འབྲོག་པ་གྲོང་ཁྱེར་ནང་གནས་སྤོས་ཀྱི་གནད་དོན་ཐོག་ཞིབ་འཇུག་གནང་ཏེ་རྒྱ་ནག་གཞུང་ལ་གནད་དོན་དེའི་ཐོག་ལན་འདེབས་དགོས་པའི་གྲོས་གཞི་འགྲོ་བ་མིའི་ཐོབ་ཐང་ལྷན་ཚོགས་སུ་བཏོན་ཡོད་པ་བཞིན། གནད་དོན་དེའེི་ཐོག་གླེང་མོལ་གནང་རྒྱུའི་གོ་སྐབས་ཟིན་ནས་གྲོས་ཚོགས་ཀྱི་ལྷན་ཚོགས་ཐོག་རྒྱ་ནག་གཞུང་གིས་བོད་ནང་གི་འབྲོག་པ་ཚོ་གྲོང་ཁྱེར་དང་གྲོང་སྤེ་ཁག་ནང་གནས་སྤོས་བྱེད་བཅུག་པའི་རྐྱེན་ལས། འབྲོག་པ་ཚོའི་འཚོ་བའི་གནས་སྟངས་ཇེ་སྡུག་ཏུ་འགྲོ་བཞིན་པ་སོགས་ཀྱི་ཐོག་གཏམ་བཤད་སྤེལ་ཡོད་པ་དང༌། ཡིན་ནའང་གཏམ་བཤད་མ་སྤེལ་སྔོན་རྒྱ་ནག་གཞུང་གིས་གནད་དོན་དེ་དང་འགྲོ་བ་མིའི་ཐོབ་ཐང་ལྷན་ཚོགས་ཐོག་གྲོས་མོལ་བྱེད་ཡས་ཀྱི་བརྗོད་གཞིའི་དབར་འབྲེལ་བ་མེད་ལུགས་བརྗོད་ནས་ གཏམ་བཤད་གནང་རྒྱུའི་གོ་སྐབས་མེད་པ་བཟོ་རྒྱུ་ལྷན་ཚོགས་སུ་གནོན་ཤུགས་སྤྲད་ཡོད་ན་ཡང་། དེ་ལམ་ལྷོང་མ་བྱུང་བར་ཚེས་བཅུའི་ཉིན་གྱི་འགྲོ་བ་མིའི་ཐོབ་ཐང་ལྷན་ཚོགས་ཐོག་གཞུང་འབྲེལ་མིན་པའི་འཇར་མན་གཞུང་འབྲེལ་མིན་པའི་ཚོགས་སྡེའི་སྐུ་ཚབ་ཀྱི་མིང་ཐོག་ནས་གོང་ཞུས་བོད་ནང་གི་འབྲོག་པ་གནས་སྤོས་ཀྱི་གནད་དོན་དེའི་ཐོག་གཏམ་བཤད་སྤེལ་ཐུབ་པ་བྱུང་ཡོད་པ་རེད།