རྒྱ་ནག་ཏུ་བསྐྱོད་པའི་གནམ་གྲུའི་ནང་གོ་མཚོན་དང་འབར་རྫས།

༄༅༎རྒྱ་གར་གཞུང་གིས་ཡུ་ཨེ་ཨི་ཟེར་བའི་དཀྱིལ་ཤར་ཨེ་ཤེ་ཡའི་ཁ་ཆེའི་རྒྱལ་ཁབ་ཀྱི་དམག་གི་དབོར་འདྲེན་གནམ་གྲུ་ཞིག་རྒྱ་གར་བརྒྱུད་རྒྱ་ནག་ནང་བསྐྱོད་པའི་ལམ་བར་རྒྱ་གར་གྱི་གྲོང་ཁྱེར་ཀོལ་ཀ་ཊ་གནམ་ཐང་དུ་གནམ་གྲུར་སྣུམ་བླུགས་ནས་བབས་པའི་སྐབས་རྒྱ་གར་གྱི་གནམ་ཐང་བདེ་འཇགས་མི་སྣས་གནམ་གྲུའི་ནང་རྒྱུན་ལྡན་གྱི་བརྟག་དཔྱད་བྱེད་པའི་སྐབས་གནམ་གྲུ་དེའི་ནང་གོ་མཚོན་དང་འབར་རྫས་ཀྱི་རིགས་ཡོད་པ་ཤེས་རྟོགས་བྱུང་ནས་གནམ་གྲུ་གཏོང་མཁན་དང་འབྲེལ་ཡོད་ལས་བྱེད་མི་བརྒྱད་ཡོད་པ་རྣམས་བཀག་ཉར་བྱས་ཡོད་པའི་སྐོར་རྒྱ་གར་གྱི་གནམ་ཐང་བདེ་འཇགས་དཔོན་རིགས་ནས་འགྲེལ་བརྗོད་གནང་བཞག

ཡུ་ཨེ་ཨི་ཟེར་བའི་དཀྱིལ་ཤར་ཨེ་ཤེ་ཡའི་ཁ་ཆེའི་རྒྱལ་ཁབ་དེའི་དམག་གི་དབོར་འདྲེན་གནམ་གྲུ་དེ་བཞིན་གོང་ཞུས་ཡུལ་གྲུའི་ཨ་སྦུ་རྡ་སྦི་ནས་རྒྱ་ནག་གི་ཧུ་པེ་ཞིང་ཆེན་གྱི་ཧན་དབྱང་ས་གནས་སུ་བསྐྱོད་པའི་ལམ་བར་རྒྱ་གར་གྱི་ཀོལ་ཀ་ཊ་གྲོང་ཁྱེར་ནང་གནམ་གྲུར་སྣུམ་བླུགས་རྒྱུར་བབས་ཆོག་པའི་ཆོག་མཆན་བྱུང་བ་ཞིག་ཡིན་པ་དང་ཡིན་ནའི་གནམ་གྲུ་དེའི་ནང་དངོས་ཟོག་ག་རེ་དབོར་འདྲེན་བྱེད་མིན་ཁ་གསལ་གང་ཡང་མེད་ཅིང་རྒྱ་གར་གནམ་ཐང་གི་བདེ་འཇགས་སྲུང་སྐྱོབས་མི་སྣས་གནམ་གྲུ་དེའི་ནང་འབར་རྫས་དང་གོ་མཚོན་རིགས་ཡོད་པ་བརྟག་དཔྱད་བྱེད་པའི་སྐབས་ཤེས་རྟོགས་བྱུང་ནས་གནམ་གྲུ་གཏོང་མཁན་དང་གནམ་གྲུའི་ནང་གི་འབྲེལ་ཡོདམི་སྣ་ཚོས་གནམ་གྲུའི་ནང་འབར་རྫས་དང་གོ་མཚོན་དབོར་འདྲེན་བྱེད་དགོ་སདོན་གཞུང་འབྲེལ་གྱི་འབྲེལ་བཤད་གསལ་པོ་ཞིག་རྒྱབ་ཐུབ་ཀྱི་མེད་པར་བརྟེན་ནས་རྒྱ་གར་གཞུང་གིས་མི་དེ་དག་བཀག་ཉར་བྱས་ཡོད་པའི་སྐོར་གནམ་ཐང་གི་བདེ་འཇགས་སྲུང་སྐྱོབས་དཔོན་རིགས་ནས་ཕེ་རན་སི་གསར་འགྱུར་བརྒྱུད་ལམ་ལ་འགྲེལ་བརྗོད་གནང་བཞག