མཚོ་བོད་མཐོ་སྒང་ས་ཁུལ་གྱི་ཁོར་ཡུག་སྲུང་སྐྱོབ་ཀྱི་འཆར་གཞི།

༄༅༎རྒྱ་ནག་དབུས་གཞུང་གིས་བོད་དང་མཚོ་སྔོན་ཞིང་ཆེན་མཐོ་སྒང་ས་ཁུལ་གྱི་ཁོར་ཡུག་སྲུང་སྐྱོབ་ཀྱི་འཆར་གཞིར་ཆོག་མཆན་སྤྲད་ཡོད་འདུག

རྒྱ་ནག་དབུས་གཞུང་གི་ཆེས་མཐོའི་དཔོན་རིགས་ཀྱི་ལྷན་ཚོགས་ཐོག་བོད་ནང་མཚོ་སྔོན་གྱི་མཐོ་སྒང་ས་གནས་ཀྱི་ཁོར་ཡུག་ལ་སྲུང་སྐྱོབ་བྱ་རྒྱུའི་མ་འོངས་ལོ་ངོ་བཅུ་གྲངས་གཉིས་རིང་གི་ལས་དོན་འཆར་གཞིའི་ཐོག་གྲོས་མོལ་བྱས་པ་བརྒྱུད་འདི་རིང་གཟའ་ལྷག་པའི་ཉིན་འཆར་གཞི་དེར་གྲོས་ཐག་བྱུང་ཡོད་པའི་སྐོར་རྒྱ་ནག་གཞུང་འབྲེལ་ཤིན་ཧའ་གསར་འགྱུར་བརྒྱུད་ལམ་གྱིས་སྤེལ་བའི་གནས་ཚུལ་ནང་འཁོད་འདུག    གནས་ཚུལ་ནང་མུ་མཐུད་འཁོད་པར་གཞིགས་ན་ ལྷན་ཚོགས་དེ་བཞིན་རྒྱ་ནག་གི་སྲིད་བློན་དབུན་ཅའ་བའོ་ཡིས་གཙོ་སྐྱོང་གནང་ཡོད་པ་དང་ རྒྱ་ནག་གི་ནུབ་ཕྱོགས་ས་ཁུལ་གྱི་ཁོར་ཡུག་ལ་སྲུང་སྐྱོབ་ཅེས་པའི་ལས་འཆར་དེའི་ནང་ བོད་དང་མཚོ་སྔོན་ ཡུན་ནན་ ཀན་སུའུ་  ཤིན་ཅང་བཅས་མངའ་ཁུལ་ནང་མ་འོངས་ལོ་ངོ་བཅུ་གྲངས་གཉིས་ཙམ་རིང་ཁོར་ཡུག་ལ་སྲུང་སྐྱོབ་བྱ་རྒྱུ་དེ་ནི་རྒྱ་ནག་རྒྱལ་ཁབ་ཀྱི་སྐྱེས་དངོས་གནས་སྟངས་རིག་པ་བདེ་འཇགས་ཐོག་གལ་འགངས་ཆེན་པོ་ཞིག་ཆགས་ཀྱི་ཡོད་པ་རེད་ ལྷན་ཚོགས་ཀྱི་རྗེས་ལྷན་ཚོགས་སྐོར་གསལ་བསྒྲགས་ཤིག་ཕྱིར་བསྒྲགས་གནང་ཡོད་པའི་ནང་ ད་རེས་རྒྱ་ནག་དབུས་གཞུང་གིས་མཐོ་སྒང་དང་ནུབ་ཕྱོགས་ས་ཁུལ་གྱི་ཁོར་ཡུག་ལ་སྲུང་སྐྱོབ་བྱ་རྒྱུའི་ལས་འཆར་ལ་གྲོས་མོལ་གནང་ཏེ་ གྲོས་ཐག་བྱུང་བ་དེས་ཁོར་ཡུག་སྲུང་སྐྱོབ་ཙམ་མ་ཟད་དེས་མ་འོངས་ས་འཚམས་གནད་དོན་དང་མི་རིགས་གཅིག་སྒྲིལ་ སྤྱི་ཚོགས་ཀྱི་གནས་སྟངས་བཟང་དུ་འགྲོ་རྒྱུ་སོགས་ཀྱི་ཐད་དོན་སྙིང་ལྡན་པའི་འཆར་གཞི་ཞིག་ཡིན་ལུགས་འཁོད་ཡོད་འདུག