རྒྱ་ནག་གི་རྩོམ་པ་པོ་གཉིས་ལ་ཉེས་བཙུགས།

༄༅༎རྒྱ་ནག་གི་ཉེན་རྟོག་པས་རྒྱ་ནག་གི་རྩོམ་པ་པོ་རན་ཡུན་ཕེ་དང་ ཏིང་མའོ་གཉིས་ཟི་ཁྲོན་ཞིང་ཆེན་ནང་ཟླ་བ་སྔོན་མ་འཛིན་བཟུང་བྱས་ཏེ་ད་ཆ་དངོས་སུ་མེ་ཏོག་ཀུན་དྰའི་དམངས་གཙོའི་ལས་འགུལ་དང་འབྲེལ་བ་ཡོད་པའི་དོགས་གཞིའི་འོག་རྒྱ་ནག་གི་སྲིད་དབང་མགོ་རྟིང་སློག་ཐབས་བྱས་པའི་ནག་ཉེས་བཙུགས་པ་རེད་ཅེས་འགྲོ་བ་མིའི་ཐོབ་ཐང་ཚོགས་པ་གཉིས་ཀྱིས་དེ་རིང་གསར་འགོད་པར་འགྲེལ་བརྗོད་བྱས་ཡོད་པ་རེད་ ཧོང་ཀོང་ནང་རྟེན་གཞི་བྱས་པའི་འགྲོ་བ་མིའི་ཐོབ་ཐང་དང་དམངས་གཙོའི་ལྟེ་གནས་ཁང་གིས་བརྗོད་དོན་ལྟར་ན་ ཨ་རབ་མི་རིགས་ཀྱི་རྒྱལ་ཁབ་ཁག་ནང་དེང་སྐབས་མེ་ཏོག་ཀུན་དྰའི་དམངས་གཙོའི་ལས་འགུལ་སྤེལ་བཞིན་པ་ནས་དཔེ་བླངས་ཏེ་ རན་ཡུན་ཕེ་དང་ ཏིང་མའོ་གཉིས་ཀྱིས་རྒྱ་ནག་ནང་ལའང་སྲིད་དབང་མགོ་རྟིང་སློག་རྒྱུའི་དམིགས་ཡུལ་བཟུང་སྟེ་ དེ་འདྲ་བའི་ལས་འགུལ་སྤེལ་རྒྱུའི་ཀུན་སློང་སྤེལ་གྱི་ཡོད་ལུགས་ རྒྱ་ནག་གཞུང་གིས་ནག་ཉེས་བཙུགས་ཡོད་པ་རེད་ ཡང་དྲ་རྒྱའི་ཐོག་ལ་བསམ་ཚུལ་བཏོན་མཁན་ཏིང་མའོ་ཡིས་༡༩༨༩ལོའི་གནམ་བདེ་སྒོ་མོ་ཆེའི་ཐང་ཆེན་ཐོག་གི་དམངས་གཙོའི་ལས་འགུལ་ནང་ལའང་མཉམ་ཞུགས་བྱས་པར་བརྟེན་སྐབས་དེར་ཁོང་བཙོན་འཇུག་བྱས་པ་རེད་ཅེས་ཀྱང་ཚོགས་པ་དེ་ཡིས་བརྗོད་འདུག

རྩོམ་པ་པོ་དང༌རྩོམ་བྲིས་དུས་དེབ་ཀྱི་རྩོམ་སྒྲིག་པ་རན་ཕུན་ཕེའི་ཐོག་ལ་བཀལ་བའི་ནག་ཉེས་དེ་བཞིན་ཁོང་གི་སྐུ་ཟླར་གཟའ་ཟླ་བའི་ཉིན་སྤྲད་ཡོད་པ་རེད་ འོན་ཀྱང་རྒྱ་ནག་ནང་མེ་ཏོག་ཀུན་དའི་དམངས་གཙོའི་འབོད་སྒྲ་དང་ རན་ཕུན་ཕེའི་དབར་འབྲེལ་བ་ག་རེ་ཡོད་མེད་གསལ་པོ་མེད་པ་རེད།