སྐུ་པར་སྒྲིག་གཤོམ་བྱེད་མི་ཆོག་པ།

༄༅༎ཉེ་ཆར་བོད་ཀྱི་ས་ཁུལ་ཁག་ཅིག་ནང་རྒྱ་ནག་གཞུང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་སྒྲིམ་གཤོམ་བྱ་ཆོག་པ་དང། ༸གོང་ས་མཆོག་ལ་མཚན་སྨོད་་ཞུ་མི་དགོས་པ། དགོན་པའི་ནང་དུ་འགྲེམས་འཇོག་བྱས་པའི་དམག་མི་ཉུང་དུ་བཏང་བའི་གནས་ཚུལ་ཐོན་པར་བརྟེན་ནས་ཁག་ཅིག་གིས་བཟང་ཕྱོགས་ཀྱི་འགྱུར་བ་ཞིག་ཡིན་པ་ངོས་འཛིན་བྱེད་མཁན་བྱུང་ཡོད་ཀྱང་ཕྱི་ཟླ་༦ཚེས་༢༨ ཉིན་ཨིན་ཇིའི་BBC དང་ཕ་རེནས་གསར་འགྱུར་ལས་ཁང་ལ་རྒྱ་ནག་དབུས་ཆོས་ལུགས་ལས་དོན་ཁང་གིས་ཏཱ་ལའི་བླ་མར་འཛིན་པའི་སྲིད་ཇུས་ལ་འགྱུར་བ་མེད་པའི་སྐོར་གྱི་མགྱོགས་འཕྲིན་ཞིག་བཏང་ཡོད་པའི་སྐོར་བཀོད་སྤེལ་བྱས་ཡོད་པ་རེད།
བར་ལམ་རྒྱ་ནག་གཞུང་གིས་བོད་ཀྱི་ས་ཁུལ་ཁག་ཅིག་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་སྒྲིག་གཤོམ་ཆོག་པའི་བཀོད་ཁྱབ་བཏང་ཚུལ་གསར་འགྱུར་བརྒྱུད་ལམ་ཁག་ཁ་ཤས་ཐོག་བཀོད་སྤེལ་བྱས་པ་མ་ཟད། རྒྱལ་སྤྱིའི་སྐད་ཡིག་གསར་འགྱུར་བརྒྱུད་ལམ་ཁག་ཏུའང་བཀོད་སྤེལ་བྱས་ཡོད་པའི་ཁར་ད་དུང་བོད་ཀྱི་ས་ཁུལ་གཞན་དག་ནང་ལའང་སྲིད་ཇུས་དེ་བརྒྱུད་བསྒྲགས་བྱ་རྒྱུའི་འཆར་གཞི་ཡོད་ལུགས་ཀྱི་གནས་ཚུལ་བཀོད་སྤེལ་བྱས་ཡོད་ལ་གནས་ཚུལ་དབྱེ་ཞིབ་པ་ཁག་ཤས་ཀྱིས་ཀྱང་འགྱུར་བ་དེ་ནི། བློ་ཡུལ་ལས་འདས་པའི་རྒྱ་ནག་གཞུང་གིས་བོད་ཐོག་ལ་འཛིན་པའི་སྲིད་ཇུས་ལ་འགྱུར་ལྡོག་བཏང་བ་དེ་ཡིས་བོད་ནང་གི་ཛ་དྲག་གི་དཀའ་ངལ་ཞི་འཇམ་དུ་འགྲོ་རྒྱུ་ཡིན་པའི་ཚོད་དཔགས་ཀྱང་གནང་མཁན་བྱུང་ཡོད་པ་རེད། འོན་ཀྱང་རྒྱ་ནག་དབུས་ཆོས་ལུགས་ལས་དོན་ཁང་གིས་ཨིན་ཇིའི་བརྙན་འཕྲིན་ལས་ཁང་BBC ལ་མགྱོགས་འཕྲིན་ཐོག་གནས་ཚུལ་ཞིག་མཁོ་སྤྲོད་བྱས་པ་ཞིག་ཕྱི་ཟླ་༦ཚེས་༢༨ རེས་གཟའ་པ་སངས་ཉིན་BBC གསར་འགྱུར་ལས་ཁང་གིས་གསར་འགྱུར་ཐོག་བཀོད་སྤེལ་བྱས་པའི་ནང། རྒྱ་ནག་གཞུང་གིས་ཏཱ་ལའི་བླ་མར་འཛིན་པའི་སྲིད་ཇུས་ནི་ཁ་གསལ་དང་བརྟན་པོ་རེད། ཏཱ་ལའི་བླ་མའི་སྐུ་པར་སྒྲིག་གཤོམ་ཆོག་པའི་སྲིད་ཇུས་དེ་འདྲ་ཞིག་རྩ་བ་ནས་ལག་བསྟར་བྱས་མེད་ཅེས་བཀོད་ཡོད་པ་ལུགས་ལུང་འདྲེན་བྱས་ཡོད་པ་རེད།།