རྒྱ་གཞུང་གིས་ལོ་གསར་སྲུང་བརྩི་བྱ་དགོས་པའི་བཙན་བཀའ།

༄༅༎ཉེ་ལམ་བོད་ཀྱི་མདོ་སྟོད་སྨད་ཀྱི་ས་ཁུལ་མང་པོའི་ནང་། རྒྱ་ནག་གཞུང་གིས་དམ་བསྒྲགས་དང་དྲག་གནོན་ལ་ངོ་རྒོལ་བྱ་ཆེད། བོད་མི་བཅུ་ཕྲག་གཉིས་ལྷག་ཙམ་གྱིས་རང་ལུས་ཞུགས་འབུལ་གནང་བ་མ་ཟད། ཞི་བའི་ངོ་རྒོལ་བྱེད་མཁན་བོད་མི་ཁག་ཅིག་ལ་རྒྱ་ནག་གཞུང་གི་ཉེན་རྟོག་པས་མེ་མདའ་བརྒྱབ་སྟེ་དམར་གསད་བཏང་བའི་ཡིད་སྐྱོའི་གནས་ཚུལ་བྱུང་བར་མྱ་ངན་དང་གདུང་སེམས་མཉམ་བསྐྱེད་ཞུ་ཆེད། བོད་ཤར་ཕྱོགས་ཁམས་ཀྱི་ས་ཁུལ་མང་པོའི་ནང་འདི་ལོའི་ལོ་གསར་སྲུང་བརྩི་བྱ་རྒྱུ་མེད་པའི་སྦྱར་ཡིག་རིམ་པ་བཞིན་ཐོན་བཞིན་ཡོད་པར་བརྟེན། ཁམས་ཀྱི་ས་ཁུལ་དཀར་མཛེས་དང༌། བྲག་མགོ། སྡེ་དགེ་བཅས་པའི་ནང་། རྒྱ་ནག་གཞུང་གིས་བོད་མི་རྣམས་ལ་རྒྱ་མིའི་སྒོར་མོ་ཉིས་སྟོང་ཙམ་སྤྲད་ནས་ལོ་གསར་སྲུང་བརྩི་བྱེད་དགོས་པའི་སྐུལ་སློང་བྱེད་བཞིན་ཡོད་ཀྱང༌། བོད་མི་རྣམས་ཀྱི་ངོས་ལེན་གནང་གི་མེད་པའི་སྐོར་བོད་ནས་གནས་ཚུལ་མཁོ་སྤྲོད་གནང་མཁན་ཞིག་གིས། འདི་གའི་ཨོས་ཀྲོལོ་ཡའི་གསར་འགོད་པ་ནོར་བུ་དགྲ་འདུལ་ལགས་སུ་ངོ་སྤྲོད་གནང་འདུག།