རྒྱ་ནག་གིས་བལ་ཡུལ་ལ་འཛུགས་སྐྲུན་ལས་འཆར་རོགས་དངུལ།

༄༅༎རྒྱ་ནག་གིས་བལ་ཡུལ་ལ་གཞུང་ལམ་གསར་རྒྱག་དང་གཞི་རྩའི་འཛུགས་སྐྲུན་ལས་འཆར་ཆེད་བལ་སྒོར་ཐེར་འབུམ་བདུན་དང་དུང་ཕྱུར་ལྔ་དང་བྱེ་བ་བཞིའི་རོགས་རམ་དང་དངུལ་བུན་གཏོང་རྒྱུའི་ཁས་ལེན་བྱས་འདུག།

རེས་གཟའ་ཟླ་བའི་ཉིན་བལ་ཡུལ་ནང་ལྟ་སྐོར་ལ་འབྱོར་བའི་རྒྱ་ནག་གི་ཚོང་ལས་བློན་ཆེན་གཞོན་པ་ཕུའུ་ཀྲི་དབྱང་དང་བལ་ཡུལ་གྱི་ནོར་སྲིད་དྲུང་ཆེ་ར་མེཤ་ལྦོར་པར་སརྡ་ཀ་ནལ་རྣམ་གཉིས་ཀྱིས་རྒྱ་ནག་ཕྱོགས་ནས་བལ་ཡུལ་ལ་རོགས་རམ་བྱ་རྒྱུའི་མཐུན་གྲོས་ཐོག་མིང་རྟགས་བཀོད་གནང་བཞག།

རྒྱ་ནག་གིས་བལ་ཡུལ་མཉམ་མཛའ་མཐུན་གྱི་འབྲེལ་བ་གོང་མཐོར་གཏོང་རྒྱུ་དང༌། རྒྱལ་ཁབ་གཉིས་དབར་དཔལ་འབྱོར་དང་འཕྲུལ་རིགས་ལས་དོན་ཐད་མཉམ་འབྲེལ་གོང་འཕེལ་གཏོང་ཐབས་སུ་ རྒྱ་ནག་གཞུང་གིས་བལ་ཡུལ་ལ་རོགས་དངུལ་བལ་སྒོར་ས་ཡ་༥༤༧མཁོ་འདོན་བྱ་རྒྱུའི་ཁས་ལེན་བྱས་ཡོད་པ་རེད། དེ་བཞིན་རྒྱ་ནག་གཞུང་གིས་རྒྱ་ནག་གི་ཕྱིར་ཚོང་ནང་འདྲེན་དངུལ་ཁང་བརྒྱུད་བལ་ཡུལ་ནང་གི་ཏྲི་ཤུ་ལི་གཙང་པོའི་ཐོག་ཆུ་ཤུགས་གློག་ཁང་གསར་རྒྱག་གི་ལས་གཞིའི་དོན་དུ་དངུལ་བུན་བལ་སྒོར་ཐེར་འབུམ་བདུན་སྔ་གཡར་བྱ་རྒྱུའི་ཁས་ལེན་བྱས་ཡོད་ཅིང༌། ཆུ་ཤུགས་གློག་ཁང་དེ་གསར་རྒྱག་ཟིན་མཚམས་བལ་ཡུལ་ནང་གློག་མི་འདེངས་བའི་དཀའ་ངལ་དེ་ཆུང་དུ་འགྲོ་རྒྱུ་ཡིན་པ་དང༌། འཛུགས་སྐྲུན་ལས་འཆར་དེ་ལོ་བཞིའི་ནང་མཇུག་སྒྲིལ་ཐུབ་རྒྱུའི་ཚོད་དཔག་བྱེད་བཞིན་ཡོད་པ་རེད། བལ་ཡུལ་གྱི་སྲིད་བློན་ཇ་ལ་ནཐ་ཀ་ནལ་ཡིས་ རྒྱ་ནག་དང་བལ་ཡུལ་མཉམ་མཐུན་གྲོས་ཁག་གསུམ་བཞག་པ་དེར་རྒྱ་ནག་གཞུང་ལ་ཐུགས་རྗེ་ཆེ་ཞུས་གནང་སྟེ། བལ་ཡུལ་ནང་གློག་ཤུགས་མཁོ་འདོན་ཐད་ད་དུང་རྒྱ་ནག་ངོས་ནས་རོགས་རམ་མང་ཙམ་བྱ་དགོས་རྒྱུའི་འབོད་སྐུལ་ཡང་གནང་འདུག།