རྒྱ་ནག་དང་དཀྱིལ་ཤར་ཡུལ་གྲུ་བསྡུར་རྒྱུ་མེད་ལུགས།

༄༅༎དེ་རིང་རྒྱ་ནག་གི་སྲིད་བློན་ལྦེན་ཅ་པའོ་ཡིས་རྒྱ་ནག་དང་དཀྱིལ་ཤར་ཡུལ་གྲུའི་ནང་གི་ཟིང་འཁྲུག་གཉིས་དབར་བསྡུར་བ་བྱེད་ཡག་མེད་སྐོར་གསུང་ཡོད་རུང། ཡུལ་ཐང་འཕར་ཆ་དང་དེ་མིན་གནད་དོན་གལ་ཆེ་མང་པོ་ཞིག་གིས་རྒྱ་ནག་གཞུང་ལ་ཉེན་ཁ་བཟོ་གི་ཡོད་པའི་ངོས་ལེན་གནང་བཞག།

དེང་སྐབས་རྒྱ་ནག་ནང་བཟའ་བཅའི་ཐང་གཞི་འཕར་བ་དང༌། ལྐོག་ཟ་རུལ་སུངས༌། ཁོར་ཡུག་ཉམ་ཆགས། ཁང་པ་རྒྱབ་མཁན་ཚོས་ས་ཞིང་བཙན་འཁྲོག་སོགས་ཀྱི་དཀའ་ངལ་མང་པོ་ཞིག་ལ་གཞུང་འཛིན་རྒྱ་ནག་དམར་ཤོག་ཚོགས་པས་གདོང་ལེན་བྱེད་བཞིན་ཡོད་པ་རེད། དེར་བརྟེན་རྒྱ་ནག་གི་འགོ་འཁྲིད་ཚོས་གོང་ཞུས་དཀའ་ངལ་དང༌། དམངས་གཙོ་མེད་པའི་གནས་སྟངས་ཀྱིས་ཀྲུ་ནི་ཤི་ཡ། ཨི་ཇིབཏ། ལི་བི་ཡ་ནང་མང་ཚོགས་ཀྱི་སྒེར་ལངས་བྱས་པའི་གནས་སྟངས་དང་གཅིག་མཚུངས་རྒྱ་ནག་ནང་དུའང་ཟིང་འཁྲུག་ལངས་སྲིད་པའི་བློ་འཚབ་དང་འཇིགས་སྣང་བྱེད་བཞིན་ཡོད་པ་རེད། འོན་ཀྱང་སྲིད་བློན་ལྦེན་ཅ་པའོ་ཡིས་ རྒྱ་ནག་དང་དཀྱིལ་ཤར་ཡུལ་གྲུའི་དབར་བསྡུར་བ་བྱས་ན་འགྲིག་གི་མེད་སྐོར་གསུང་བཞག།