བོད་ནང་གདུག་རྩུབ་དྲག་གནོན་ཆེ་རུ་བཏང་བར་སྐྱོན་བརྗོད།

༄༅༎རྒྱ་ནག་གཞུང་གིས་ ཨོ་ལིམ་པིག་རྩེད་འགྲན་རིང་ བོད་ནང་གདུག་རྩུབ་དྲག་གནོན་ཆེ་རུ་བཏང་ཡོད་པ་དེར་བོད་རང་དབང་ལས་འགུལ་ཞེས་པས་སྐྱོན་བརྗོད་གནང་འདུག

འདི་ལོ་ཕྱི་ཟླ་གསུམ་པའི་ནང་བོད་ཀྱི་ས་ཁུལ་ཡོངས་རྫོགས་ནས་རྒྱ་ནག་གཞུང་ལ་ངོ་རྒོལ་གྱི་ལས་འགུལ་སྤེལ་བ་དེས་རྒྱ་ནག་ལ་མིང་འཕྱས་ངནཔ་བྱུང་བ་བརྟེན་གདུག་རྩུབ་དྲག་གནོན་ཧ་ཅང་ཆེ་རུ་བཏང་ནས་གང་ལྟར་ཨོ་ལིམ་པིག་རྩེད་འགྲན་རིང་བོད་ས་ཡོངས་རྫོགས་བཙོན་ཁང་ལྟ་བུར་གྱུར་ཡོད་ལུགས་བོད་རང་དབང་ལས་འགུལ་གྱི་མགྲིན་ཚབ་པ་ མེཊེ་ལྦིཊི་ཁེསེ་ ཡིས་སྐྱོན་བརྗོད་གནང་འདུག རྒྱ་ནག་གཞུང་གིས་བོད་མིར་དྲག་གནོན་བྱས་པ་མ་བཟོད་པར་བོད་མི་དང་བོད་དོན་རྒྱབ་སྐྱོར་བ་ཚོས་ཨོ་ལིམ་པིག་རྩེད་འགྲན་གྱི་དཔལ་འབར་འཛམ་གླིང་གི་ཡུལ་གྲུ་མང་པོས་བསྐོར་བསྐྱོད་སྐབས་ངོ་རྒོལ་ཤུགས་ཆེ་བྱས་པ་དེས་རྒྱ་ནག་ལ་མིང་འཕྱས་ཆེན་པོ་བྱུང་ཡོད་རེད་ རྩེད་འགྲན་གྱི་སྔ་རོལ་དུ་རྒྱ་ནག་གིས་བོད་ནང་ཉེན་སྲུང་མི་སྣ་དང་དམག་མི་འབོར་ཆེན་འཕར་མ་བཏང་ནས་མི་མང་ཙམ་མ་ཡིན་པར་དགོན་སྡེ་ཁག་གི་གྲ་བཙུན་རྣམས་ལའང་སྡང་ཟུག་གི་སྲིད་བྱུས་ལག་བསྟར་བྱས་ཡོད་ལུགས་གོང་ཞུས་སྒྲིག་འཛུགས་ཀྱིས་སྐྱོན་བརྗོད་བྱས་འདུག རྒྱ་ནག་གི་ཕྱི་སྲིད་ལས་ཁུངས་ནས་སྐྱོན་བརྗོད་དེ་རིགས་ལ་ལན་འདེབས་རྩ་བ་ནས་བྱས་མེད་ཀྱང་ རྒྱ་ནག་ཉིན་རེའི་གསར་ཤོག་ཐོག་ཆེད་རྩོམ་ཞིག་སྤེལ་བའི་ནང་ བོད་ནང་དོན་རྐྱེན་སྐོར་ཕྱིའི་རྒྱལ་ཁབ་ཚོས་དྲང་བདེན་མི་ཡིན་པའི་སྐྱོན་བརྗོད་བྱས་ཡོད་ལུགས་སྐྱོན་བརྗོད་བྱས་ཡོད་འདུག།