རྒྱ་ནག་གི་དངོས་ཟོག་ཕྱིར་བཙོང་ཚག་ཚད་ཆུང་དུ་ཕྱིན་སྐོར།

༄༅༎རྒྱ་ནག་གི་དངོས་ཟོག་ཕྱིར་བཙོང་ཚག་ཚད་ཕྲན་བུ་ཆུང་དུ་ཕྱིན་ཡོད་པ་དང་དེས་འཛམ་གླིང་ཡུལ་གྲུ་གཞན་ཁག་གི་དཔལ་འབྱོར་ཉམ་པ་སླར་གསོའི་རྣམ་པ་ཐོན་གྱི་ཡོད་པ་རེད། རྒྱ་གཞུང་གིས་དཔལ་འབྱོར་ཉམ་པ་སླར་གསོའི་ཆེད་དུ་གཞུང་གྲོན་ཨ་སྒོར་ཐེར་འབུམ་༥༩༦བཏང་དང་གཏོང་བཞིན་པའི་དབང་གིས་དཔལ་འབྱོར་སླར་གསོར་ཕན་ནུས་ཆེན་པོ་འབྲེལ་ཡོད་ཅིང་འདས་པའི་ཟླ་ཤས་དང་བསྡུར་ན་རྒྱ་ནག་གི་དངོས་ཟོག་ཕྱིར་བཙོང་དང་ནང་འདྲེན་གཉིས་ཀར་ཚག་ཚུད་ཆུང་དུ་ཕྱིན་པ་དེས་ཡུལ་གྲུ་གཞན་གྱི་དཔལ་འབྱོར་སླར་གསོ་ཡོང་གི་ཡོད་པའི་རྟགས་མཚན་དུ་ངོས་འཛིན་བྱེད་ཀྱི་ཡོད་པ་རེད། དེང་འཛམ་གླིང་ནང་དཔལ་འབྱོར་སྟོབས་ཤུགས་ཨང་གསུམ་པ་རྒྱ་ནག་ཡིན་པར་ངོས་འཛིན་བྱེད་ཀྱི་ཡོད་ཅིང་རྒྱ་ནག་གཞུང་གི་དངོས་ཟོག་ཕོག་ཆེ་འཛམ་གླིང་ཡུལ་གྲུ་དུ་མའི་ནང་ཕྱིར་བཙོང་བྱེད་ཀྱི་ཡོད་སྟབས་བར་ལམ་ཕྱིར་བཙོང་གི་བསྡོམས་འབོར་ཆག་པའི་དཀའ་ངལ་འཕྲད་པར་བརྟེན་རྒྱ་ནག་གཞུང་གིས་ཕྱིར་བཙོང་ཁྲལ་བབས་བཅོག་འཁྲི་བྱས་པ་མ་ཟད་ཕྱིར་བཙོང་དངོས་ཟོག་གི་སྒོ་ཁྲལ་ཕྱིར་སློག་བྱ་རྒྱུའི་དངུལ་འབོར་ཡང་སྤར་ཆ་བྱས་ཡོད་པ་རེད།

དེ་བཞིན་རྒྱ་ནག་གི་དངུལ་ཡུའན་གྱི་རིན་གོང་རྒྱ་ནག་གིས་གཏན་འབེབས་བྱེད་ཀྱི་ཡོད་སྟབས་བར་ལམ་ཌོ་ལར་དང་འཛའ་སྒྱུར་སྤར་ཆ་མེད་པར་རྒྱ་ནག་གི་དངུལ་གྱི་འཛའ་ཐང་དམའ་པོར་བཞག་སྟེ་ཕྱིར་བཙོང་བྱེད་མཁན་ཚོང་པར་གཙང་ཁེ་མཐོ་བ་དང་ཕྱི་རྒྱལ་ཡུལ་དུ་རྒྱ་ནག་གི་དངོས་ཟོག་རིན་གོང་དམའ་བོར་མཁོ་སྤྲོད་ཐུབ་པ་བཟོ་ཐབས་བྱེད་བཞིན་པ་རེད། གང་ལྟར་རྒྱ་ནག་གཞུང་གི་དཔལ་འབྱོར་ནི་རྒྱ་ནག་ནང་བཟོས་པའི་དངོས་ཟོག་ཕྱིར་བཙོང་གི་དཔལ་བྱོར་འདུ་འགོད་ལ་རག་ལུས་ཀྱི་ཡོད་པས་རྒྱ་ནག་གི་དཔལ་འབྱོར་འཕེལ་རྒྱས་རྒྱུན་གནས་ཐུབ་ཐབས་སུ་དངོས་ཟོག་ཕྱིར་བཙོང་ལ་འཕེལ་རྒྱས་འགྲོ་དགོས་ཀྱི་ཡོད་ཅིང་རྒྱ་ནག་གི་དངོས་ཟོག་ཕྱིར་བཙོང་ལ་འཕར་ཆ་ཡོང་གི་ཡོད་པའི་རྣམ་པ་ཐོན་གྱི་ཡོད་པའི་སྐོར་དཔལ་འབྱོར་རིག་པ་ཚོས་འགྲེལ་བརྗོད་གནང་འདུག།