སྐུའི་འཁྲུངས་ཡུལ་རྒྱ་ནག་གིས་བདག་མེད་བརྗེད་ཐབས་བྱས་པ།

༄༅༎བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་འཁྲུངས་ཡུལ་སྟག་འཚེར་རྒྱ་ནག་གིས་བདག་མེད་བརྗེད་ཐབས་བྱེད་ཀྱི་ཡོད་པའི་གནས་ཚུལ་ཞིག་ཐོན་འདུག

དེ་ཡང་ཨེ་ཨེཕ་པི་གསར་སྤེལ་ཁང་གིས་སྟག་འཚེར་ས་གནས་ནས་གནས་ཚུལ་སྤེལ་དོན་ལ་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་འཁྲུངས་ཡུལ་སྟག་འཚེར་ནི་མཚོ་སྔོན་གྱི་གྲོང་ཁྱེར་གཙོ་བོ་ཟི་ལིང་ནས་སྣུམ་འཁོར་ནང་ཆུ་ཚོད་གཉིས་ཀྱི་ས་གནས་སུ་རི་གཅིག་ནང་བཀོད་པ་ལྟ་བུར་གནས་ཡོད་ཅིང་རྒྱ་ནག་གིས་ཡུལ་བསྐོར་སྤྲོ་འཆམ་སོགས་ཀྱི་ཆེད་དུ་ལམ་གཞུང་དུ་སྟག་འཚེར་མིང་ཙམ་བཀོད་པའི་ལམ་རྟགས་མཐོང་རྒྱུ་མེད་པ་དང་ཡུལ་བསྐོར་སྤྲོ་འཆམ་པ་གཅིག་ཀྱང་སྟག་འཚེར་འགྲོ་རྒྱུར་རྒྱ་ནག་གིས་བཀའ་ཁྲོལ་གནང་གི་མེད་པ་དང་ཡུལ་བསྐོར་སྤྲོ་འཆམ་པ་རེ་ཟུང་གིས་བཀའ་ཁྲོལ་མེད་བཞིན་དུ་ས་ཁུལ་ནང་བསྐྱོད་པའི་སྐབས་ལམ་བུར་དུ་ཉེན་རྟོག་དམག་མིས་བཀག་ནས་ས་གནས་དེར་ཕེབས་ཆོག་གི་མེད་པའི་འགྲེལ་བརྗོད་བྱས་ནས་ཕྱིར་ལོག་བཏང་གི་ཡོད་པ་རེད་འདུག

དེ་ཙམ་དུ་མ་ཟད་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་ཀྱི་རང་དབང་སྒེར་ལངས་ཀྱི་ལོ་འཁོར་དུས་ཚིགས་ཐེངས་ལྔ་བཅུའི་ཐོག་གསུངས་འཕྲིན་མ་གནང་གོང་ནས་༸གོང་ས་མཆོག་གི་སྐུའི་འཁྲུངས་ཡུལ་སྟག་འཚེར་ཉེན་རྟོག་དམག་མིས་བལྟ་སྲུང་བྱེད་བཞིན་པ་ཡིན་པའི་གནས་ཚུལ་སྤེལ་འདུག རྒྱ་ནག་གིས་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་འཁྲུངས་ཡུལ་གྲོང་གསེབ་ནང་དམ་བསྒྲགས་དང་ཁོང་གི་སྐུ་དཔར་དད་རྟེན་དུ་བདག་ཉར་བྱེད་རྒྱུར་བཀག་འགོག་བྱས་པ་དང་གཅིག་མཚུངས་བོད་ནང་གི་བོད་མི་རྣམས་ཀྱིས་༸གོང་ས་མཆོག་ལ་དད་གུས་ལ་གནོད་འཚེ་གཏང་རྒྱུའི་འབད་བརྩོན་བྱེད་ཀྱི་ཡོད་ཀྱང་བོད་མི་རྣམས་ཀྱིས་རྒྱ་ནག་གི་དམ་བསྒྲགས་ཇེ་ཆེར་གཏོང་མིན་ལ་མ་ལྟོས་པར་དད་གུས་དང་ཡིད་ཆེས་མུས་མཐུད་ནས་ཡོད་པ་བཅས་ཀྱི་གནས་ཚུལ་ཐོན་འདུག།