རྒྱ་ནག་གི་ཕྱི་སྲིད་བློན་ཆེན་གཞོན་པ་བྱང་ཀོ་རི་ཡར་ཕེབས་ཡོད་པ།

༄༅༎རྒྱ་ནག་གི་ཕྱི་སྲིད་བློན་ཆེན་གཞོན་པ་ཁྲང་ཁྲི་ཅུན་བྱང་ཀོ་རིའི་ནང་འཚམས་འདྲི་གཟིགས་སྐོར་དུ་ཕེབས་ཡོད་པའི་གནས་ཚུལ་ཐོན་འདུག

རེས་གཟའ་ཉི་མའི་ཉིན་ཁོང་དང་བྱང་ཀོ་རི་ཡའི་ཕྱི་སྲིད་བློན་ཆེན་ཀིམ་ཀའི་གྭལྦན་དང་མཇལ་འཕྲད་ཀྱིས་ཡུལ་གཉིས་ཀྱི་མཛའ་འབྲེལ་ཟབ་ཏུ་གཏོང་རྒྱུའི་སྐོར་གྲོས་མོལ་གནང་ཡོད་ལུགས་ཨེ་ཨེཕྤི་གསར་ལས་ཁང་གིས་བྱང་ཀོ་རི་ཡའི་གཞུང་འབྲེལ་བརྒྱུད་ལམ་Korean News Agencyཞེས་པ་ལུང་འདྲེན་གྱིས་གནས་ཚུལ་སྤེལ་འདུག། དབུལ་ཞིང་ཕོངས་པའི་དམར་པོའི་རྒྱལ་ཁབ་དེར་དཔལ་འབྱོར་དང་ཆབ་སྲིད་སོགས་གང་ཅིའི་ཐད་མཐུན་འགྱུར་རེ་བཅོལ་བྱེད་ཡུལ་རྒྱ་ནག་ཁོ་ན་ཡིན་པ་རེད། དེ་མ་ཟད་བྱང་ཀོ་རི་ཡའི་རྡུལ་ཕྲན་གོ་མཚོན་ཀྱི་དཀའ་རྙོག་སེལ་ཐབས་ཆེད་བཙུགས་པའི་རྒྱལ་ཁབ་སམ་ཚོགས་པ་དྲུག་གི་གཙོ་སྐྱོང་བྱེད་མཁན་ཡང་རྒྱ་ནག་ཡིན་པ་རེད། ཀོ་རི་ཡ་གཉིས་ཐོག་རྒྱ་ནག་དང་ཨ་རི་ ར་ཤི་ཡ་ ཉི་ཧོང་བཅས་ལས་གྲུབ་པའི་ཚོགས་པ་དེ་ཕྱི་ལོ་༢༠༠༨ལོ་ནས་ཚོགས་འདུ་འཚུགས་ཐུབ་མེད་པ་རེད༎