བོད་ནང་ཨོ་ལིམ་པིག་རྩེད་འགྲན་དཔལ་འབར་རྒྱུགས་སྤྲོད་སྐོར།

༄༅༎ཁ་ས་རྒྱ་ནག་གཞུང་གིས་བོད་ནང་རྒྱ་ནག་གི་ཨོ་ལིམ་པིག་རྩེད་འགྲན་གྱི་དཔལ་འབར་སྐོར་བསྐྱོད་ཀྱི་འགྲོ་ལམ་འགྱུར་བ་བཏང་བའི་གནས་ཚུལ་གསལ་བསྒྲགས་བྱས་པ་དང་དེ་རིང་བཙན་བྱོལ་ནང་གི་གཞུང་འབྲེལ་མ་ཡིན་པའི་ཚོགས་པ་ལྔས་གོ་སྒྲིག་གནང་བའི་རྒྱ་གར་ནས་བོད་བར་གོམ་བགྲོད་གནང་མཁན་གྱི་མི་གྲངས་ལྔ་བཅུ་རྣམས་བོད་ཀྱི་ས་མཚམས་ཀྱི་ས་འབྲེལ་དུ་འབྱོར་བའི་སྐབས་རྒྱ་གར་ཉེན་རྟོག་པས་འཛིན་བཟུང་བྱས་ཡོད་པ་རེད།

བཞུགས་སྒར་དུ་རྟེན་གཞི་བྱས་པའི་བོད་ཀྱི་གཞོན་ནུ་ལྷན་ཚོགས་དང་བུད་མེད་ལྷན་ཚོགས། དགུ་བཅུ་གསུམ་ལས་འགུལ་ཚོགས་པ། བོད་རྒྱལ་ཡོངས་དམངས་གཙོ་ཚོགས་པ། བོད་རང་བཙན་སློབ་ཕྲུག་ཚོགས་པ་ལྔས་ཁ་སྔོན་ཕྱི་ཟླ་གསུམ་པའི་ཚེས་༡༠ བོད་མིའི་རང་དབང་སྒེར་ལངས་ཉིན་མོར་རྒྱ་གར་ནས་བོད་བར་བསྐྱོད་རྒྱུའི་གོམ་བགྲོད་ལས་འགུལ་འགོ་བཙུགས་ཏེ་ད་བར་ཉིན་གྲངས་༡༠༠ འགྲོ་གི་ཡོད་ཅིང་། ཡིན་ནའང་བར་ལམ་རྒྱ་གར་ཉེན་རྟོག་པས་གོམ་བགྲོད་པ་༢༦༡ བཀག་འགོག་བྱས་ཏེ་ཧི་མ་ཅལ་མངའ་སྡེའི་ཁུལ་དུ་བསྐྱལ་བའི་རྗེས་སླར་ཡང་ཕྱི་ཟླ་ལྔ་པའི་ཚེས་༡༤ ཉིན་ཚོགས་པ་ལྔའི་ཚོགས་མི་ལྔ་བཅུས་བོད་བར་གྱི་གོམ་བགྲོད་བསྐྱར་གསོ་གནང་སྟེ་དེ་རིང་སྔ་དྲོའི་རྒྱ་གར་གྱི་ཚོུད་༩ དང་ཕྱེད་ཀ་ཙམ་ལ་གོམ་བགྲོད་པ་རྣམས་བོད་ཀྱི་ས་མཚམས་དང་མཐའ་ཉེ་བའི་རྒྱ་གར་གྱི་རྡར་ཆུ་ལ་ཞེས་པའི་ས་ཁུངས་སུ་འཛུལ་བཞིན་པའི་སྐབས་ཉེན་རྟོག་པ་༢༠༠ ཡོང་སྟེ་བཙན་དབང་གི་སྒོ་ནས་མོ་ཊའི་ནང་བླུགས་ཏེ་འཛིན་བཟུང་བྱས་ཡོད་པ་དང་ད་ལྟའི་འཆར་ཁོང་རྣམས་ས་གནས་ག་པར་བཙན་ཁྲི་བྱ་མིན་གནས་ཚུལ་ཤེས་རྟོགས་མེད་པ་རེད། དེ་བཞིན་ཁ་ས་རྒྱ་ནག་གི་ཨོ་ལིམ་པིག་རྩེད་འགྲན་གྱི་དཔལ་འབར་སྐོར་བསྐྱོད་ཀྱི་དཔོན་རིགས་ལི་ལི་ཁྲེ་ཡིས་དཔལ་འབར་ཐོག་མར་ཉི་མ་གསུམ་རིང་ཤིན་ཅང་དུ་འཁྱེར་རྒྱུར་དང་དེ་ནས་བོད་ཕྱོགས་སུ་འཁྱེར་རྒྱུ་ཡིན་ལུགས་བཤད་དེ་རྒྱ་ནག་གཞུང་གིས་དཔལ་འབར་སྐོར་བསྐྱོད་ཀྱི་འཆར་གཞི་གསར་པ་ད་ལྟ་བར་གསང་བ་བྱས་པ་མ་ཟད། ད་དུང་དཔལ་འབར་བོད་ནང་དུས་ཚོད་ག་དུས་འབྱོར་གྱི་ཡོད་མེད་དང་སྐོར་བསྐྱོད་བྱེད་ཡུལ་གྱི་འགྲོ་ལམ་གསར་པ་ག་རེ་ཡིན་མིན་གསལ་པོ་གསལ་བསྒྲགས་བྱེད་ཀྱི་མེད་པ་རེད།