༸གོང་ས་མཆོག་གིས་ཕང་ལི་ཌིའི་སྐུ་ཟླར་ཐུགས་གསོའི་གསུང་འཕྲིན།

༄༅།།བོད་ཀྱི་བླ་ན་མེད་པའི་དབུ་འཁྲིད་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཨ་རིར་གནས་སྡོད་རྒྱ་ནག་གི་འགྲོ་བ་མིའི་ཐོབ་ཐང་དང་མང་གཙོ་དོན་གཉེར་ཅན་ཕང་ལཱི་ཌི་འདས་གྲོངས་སུ་གྱུར་པར་ཐུགས་གསོའི་འཚམས་འཕྲིན་བསྩལ་གནང་མཛད་འདུག།
དེ་ཡང་༧གོང་ས་༧སྐྱབས་མགོན་ཆེན་པོ་མཆོག་ནས་ ཕྱི་ལོ་ ༢༠༡༢ ཟླ་ ༤ ཚེས་ ༩ རེས་གཟའ་ཟླ་བའི་ཉིན་ཕང་ལི་ཌི་འདས་པོ་དེའི་སྐུ་ཟླ་ལི་ཤུ་ཕྲིན་(Li Shuxian)ལ་བསྩལ་བའི་ཐུགས་གསོའི་གསུང་འཕྲིན་དེའི་ནང༌། སྐུ་ཉིད་ཀྱི་སྐུ་ཟླ་སྐུ་ཞབས་ཕང་ལི་ཌི་་འདས་གྲོངས་སུ་གྱུར་བའི་གནས་ཚུལ་ཐོན་པར་ངོས་ལ་ཧ་ཅང་བློ་ཕམ་བྱུང། ཁོང་ནི་དྲང་བདེན་འཚོལ་ཆེད་སྨྲ་བརྗོད་རང་དབང་དང་མང་གཙོའི་ཐོབ་ཐང་ནི་མེད་དུ་མི་རུང་བ་ཞིག་ཏུ་ཡིད་ཆེས་བརྟན་པོ་གནང་མཁན་ཞིག་ཡིན་ལ། ཁོང་གིས་དཔའ་མཛངས་ལྡན་ཞིང་ངལ་བ་ཁྱད་བསད་ཀྱིས་རྒྱ་རིགས་མང་ཚོགས་སྤྱི་དང་ལྷག་པར་གཞོན་སྐྱེས་ཚོར་གནད་དོན་དེའི་སྐོར་གོ་རྟོགས་རྒྱ་ཆེ་སྤེལ་གནང་མཁན་ཞིག་ཀྱང་ཡིན་པ་རེད། ཁོང་འདས་གྲོངས་སུ་གྱུར་བའི་གནས་ཚུལ་ཐོས་པར་ངོས་ལ་ཧ་ཅང་བློ་ཕམ་བྱུང་ཞེས་བཀའ་གནང་འདུག།
ད་དུང་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་གསོའི་འཚམས་འཕྲིན་དེའི་ནང༌། ༧གོང་ས་༧སྐྱབས་མགོན་ཆེན་པོ་མཆོག་དང་ཕང་ལི་ཌིའི་དབར་གྱི་མཇལ་འཕྲད་ཐོག་མ་དེ་ཕྱི་ལོ་ ༡༩༩༡ ལོར་ཨ་མི་རི་ཀའི་ནང་ཚུགས་པའི་འགྲོ་བ་མིའི་ཐོབ་ཐང་ལྷན་ཚོགས་ཤིག་གི་སྐབས་མཇལ་འཕྲད་བྱུང་བ་བཀའ་གནང་འདུག་ཅིང༌། ༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས། སྐབས་དེར་ངེད་གཉིས་དབར་བསམ་ཚུལ་མཐུན་པའི་གནད་དོན་དང་སེམས་འཚབ་ཡོད་པའི་གནད་དོན་མང་དག་ཅིག་གི་ཐོག་ཕན་ཚུན་གོ་བསྡུར་དང་བསམ་ཚུལ་བརྗེ་ལེན་བྱ་རྒྱུ་བྱུང་བར་མ་ཟད། ། དམ་པ་ཁོང་གི་ཕྱི་གསལ་ནང་གསལ་དང་རང་དབང་ལྡན་པའི་རྒྱ་ནག་ཞིག་བསྐྲུན་རྒྱུའི་རེ་བ་དང་འཆར་སྣང་དེར་ངོས་ཀྱིས་སྙིང་ཐག་པ་ནས་ཡི་རང་བསྔགས་བརྗོད་ཞུ་རྒྱུ་ཡིན། ཞེས་བཀའ་གནང་འདུག།