བོད་རིཌ་ལས་བྱེད་ཚོར་ཉིན་ལྟར་གླུ་གཞས་སྦྱོང་བརྡར་སྤྲོད་བཞིན།

༄༅༎དེང་སྐབས་བོད་ཀྱི་རྒྱལ་ས་ལྷ་སའི་ནང་རྒྱ་གཞུང་ལས་ཁུང་ཁག་ནང་ལས་དོན་མཚམས་འཇོག་བྱེད་བཅུག་ནས་ཉིན་ལྟར་བཞིན་ལས་བྱེད་པ་ཚོར་གླུ་གཞས་སྦྱོང་བརྡར་བྱེད་བཅུག་གི་ཡོད་པའི་གནས་ཚུལ་འདུག

ལས་ཁུང་ཁག་གི་ལས་བྱེད་པ་དང་རྒན་ཡོལ་ཞུས་ཟིན་པའི་བོད་མི་ཚོ་ནམ་རྒྱུན་གླུ་གཞས་གཏོང་ཤེས་མིན་ལ་མ་ལྟོས་པར་བཙན་བཀའ་བཏང་ནས་མཉམ་གཞས་དང་རྐྱང་གཞས་སོགས་ཉིན་ལྟར་སྦྱོང་བརྡར་བྱེད་བཅུག་གི་ཡོད་པའི་ཁུངས་ལྡན་གནས་ཚུལ་ཞིག་བོད་ནས་མིང་འདོན་གནང་འདོད་མེད་པའི་མི་སྣ་ཞིག་གིས་འདི་ག་རླུང་འཕྲིན་ཁང་ལ་འགྲེལ་བརྗོད་གནང་འདུག

དེ་ལྟར་བྱེད་དགོས་པའི་དམིགས་ཡུལ་ནི་ཕྱི་ཟླ་ལྔ་པའི་ཚེས་གཅིག་གི་ཉིན་རྒྱལ་སྤྱིའི་ངལ་རྩོལ་དུས་ཆེན་སྲུང་བརྩི་ཞུ་ཕྱིར་གླུ་གཞས་འགྲན་བསྡུར་གྱི་བྱེད་སྒོ་ཞིག་འཛུགས་རྒྱུའི་འཆར་གཞིའི་འོག་བྱས་པ་ཞིག་ཡིན་པ་དང་ལས་བྱེད་པ་གླུ་གཞས་རྩ་བ་ནས་གཏོང་མྱོང་མེད་མཁན་ལའང་འབྲེལ་ཡོད་ལས་ཁུངས་ཀྱི་འགོ་ཁྲིད་ཚོས་རྐྱང་གཞས་ངེས་པར་དུ་གཏང་དགོས་པའི་བཙན་བཀའ་གཏོང་བཞིན་ཡོད་པ་མ་ཟད་གཞས་དེ་ཚོ་གུང་ཁྲན་ཏང་ལ་སྟོད་གླུ་དང་རྒྱལ་ཞེན་གྱི་ནང་དོན་མཚོན་པའི་རིགས་གཏང་དགོས་ཀྱི་ཡོད་པ་རེད༎