རྒྱ་ནག་ཏུ་ངར་ལྕགས་བཟོ་གྲྭའི་ལས་བཟོ་བ་ཚོས་ངོ་རྒོལ།

༄༅༎རྒྱ་ནག་གཞུང་གིས་གཉེར་བཞིན་པའི་ངར་ལྕགས་བཟོ་གྲྭ་ཞིག་སྒེར་གྱི་བཟོ་གྲྭར་ཚོང་འགྱུར་བྱས་པ་དེར་བཟོ་གྲྭའི་ལས་བཟོ་བ་ཚོས་ངོ་རྒོལ་ལས་འགུལ་སྤེལ་བ་མ་ཟད་བཟོ་གྲྭའི་དཔོན་རིགས་ཤིག་ཀྱང་ཉིན་མ་བཞིའི་རིང་བཟོ་གྲྭའི་ནང་བཀག་པའི་རྗེས་སྒེར་ལ་ཚོང་འགྲེམས་བྱ་རྒྱུ་ཕྱིར་འཐེན་བྱས་ཡོད་པ་དང་དེ་ནི་འདས་པའི་ཟླ་བ་གཅིག་ནང་ལ་གཞུང་གིས་གཉེར་བཞིན་པའི་ངར་ལྕགས་བཟོ་གྲྭ་སྒེར་བདག་ཅན་དུ་འགྱུར་རྒྱུར་ལས་བཟོ་བ་ཚོས་བཀག་འགོག་ཐུབ་པའི་ལས་དོན་ལམ་ལྷོང་བྱུང་བ་ཐེངས་གཉིས་པ་དེ་ཡིན་པ་རེད།

དེ་ཡང་རྒྱ་ནག་གཞུང་གིས་གཉེར་བཞིན་པའི་ངར་ལྕགས་བཟོ་གྲྭ་སྒེར་བདག་ཅན་དུ་འགྱུར་བ་དེའི་ཐོག་ནས་ལས་བཟོ་མང་པོ་ཞིག་ལས་མེད་དུ་འགྱུར་བ་མ་ཟད་གུན་གསབ་ཉུང་ཉུང་ལས་སྤྲོད་ཀྱི་མེད་པའི་དཀའ་རྙོག་ཡོང་གི་ཡོད་ཅིང་རེས་གཟའ་སྤེན་པའི་ཉིན་རྒྱ་ནག་གི་དབུས་ཧེ་ནན་ཞི་ཆེན་གྱི་ལིན་ཀྲོའུ་གྲོང་ཁྱེར་གཞུང་གི་འཕྲིན་གཏོང་དྲ་རྒྱའི་ཐོག་གནས་ཚུལ་སྤེལ་བའི་ནང་རེས་གཟའ་མིག་དམར་ནས་ལིན་ཀྲོའུ་ངར་ལྕགས་བཟོ་གྲྭའི་མདུན་དུ་ལས་བཟོ་བ་བཞི་བརྒྱ་ལྷག་འདུ་འཛོམས་ཀྱིས་བཟོ་གྲྭ་ཚོང་འགྲེམས་བྱས་པར་ངོ་རྒོལ་བྱས་པ་དང་ལས་མེད་དུ་གྱུར་བའི་ལས་བཟོ་ཚོར་གུན་གསབ་ཆེ་ཙམ་དགོས་པའི་དགོས་འདུན་བཏོན་པ་མ་ཟད་གཞུང་གི་ངར་ལྕགས་བཟོ་གྲྭའི་ཡན་ལག་བཟོ་གྲྭའི་བལྟ་རྟོགས་པ་དང་འཛིན་སྐྱོང་ལས་ཁང་གི་དཔོན་རིགས་ཏུང་ཀྲང་དབྱིན་ཟེར་བ་བཟོ་གྲྭ་ནས་འགྲོ་བསྐྱོད་བྱེད་དུ་མི་བཅུག་པར་བཀག་འགོག་བྱས་པའི་གནས་ཚུལ་བྱུང་བའི་རྗེས་དེ་རིང་རེས་གཟའ་ཉི་མའི་ཉིན་ཧེ་ནན་ཞིང་ཆེན་གྱི་དཔོན་རིགས་ནས་བཟོ་གྲྭ་ཚོང་འགྲེམས་ཕྱིར་འཐེན་བྱ་དགོས་པའི་བཀོད་ཁྱབ་བཏང་བའི་གནས་ཚུལ་བཀོད་ཡོད་པ་རེད༎