ཨ་རིའི་ཕྱི་སྲིད་དྲུང་ཆེས་ཨེ་ཤེ་ཡའི་ཡུལ་གྲུར་འཚམས་གཟིགས།

༄༅༎ཨ་རིའི་ཕྱི་སྲིད་དྲུང་ཆེ་ལྕམ་ཧི་ལ་རི་ཀི་ལིན་ཊོན་མཆོག་གི་ཐེངས་འདིའི་ཨེ་ཤེ་ཡའི་ཡུལ་གྲུ་ཁག་གི་ནང་གཟིགས་བསྐོར་དུ་ཕེབས་བཞིན་པའི་ཐོག་མར་རེས་གཟའ་ཟླ་བའི་ཉིན་ཉི་ཧོང་དུ་ཕེབས་འབྱོར་གནང་སྟེ་དེ་གར་ཉི་ཧོང་དང་ཨ་མི་རི་ཀའི་དབར་གཞུང་འབྲེལ་ཇེ་བཟང་དུ་གཏོང་རྒྱུའི་ཐོག་གཞན་ཡང་བྱང་ཀོ་རི་ཡའི་རྡུལ་ཕྲན་ལས་གཞི་སོགས་ཀྱི་ཐོག་བཀའ་བསྡུར་གནང་འཆར་ཡོད་པ་རེད།

ཉི་ཧོང་གཞུང་གི་མགྲིན་ཚབ་པ་ཀྲ་ཀི་ཡོ་ཀ་ལྦ་མུ་ར་ཡིས་གསུང་དོན་ལ་ཉི་ཧོང་གིས་ཨ་རི་མཉམ་དུ་བྱང་ཀོ་རི་ཡའི་གནད་དོན་སོགས་ཀྱི་ཐད་བཀའ་གྲོས་གནང་རྒྱུ་ཡིན་ལུགས་གསུང་ཡོད་པ་རེད། ཨ་རིའི་ཕྱི་སྲིད་དྲུང་ཆེ་ཧི་ལ་རི་ཀི་ལིན་ཊོན་མཆོག་ཉི་ཧོང་ནང་ལྷོ་ཀོ་རི་ཡ་དང་དེ་རྗེས་ཨིན་ཌོ་ནེ་ཤི་ཡ་དེ་རྗེས་རྒྱ་ནག་ཏུ་གཟིགས་བསྐོར་གནང་རྒྱུའི་འཆར་གཞི་ཡོད་པ་རེད། ཨ་རིའི་ཕྱི་སྲིད་དྲུང་ཆེ་མཆོག་ཐོག་མར་ཨ་རི་ནས་ཕེབས་ཐོན་མ་གནང་གོང་དུ་ཨ་རིའི་གྲོང་ཁྱེར་ནིའུ་ཡོག་ཏུ་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པ་དང་ཨ་རིའི་རྒྱལ་ས་ལྦ་ཤིང་ཀྲོན་དུ་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་།རྒྱལ་སྤྱིའི་ཉེས་ཡངས་ཚོགས་པ།རང་དབང་ཁང་པ།འགྲོ་བ་མིའི་ཐོབ་ཐང་དང་པོ།རྒྱ་ནག་ནང་འགྲོ་བ་མིའི་ཐོབ་ཐང༌།ས་མཚམས་མེད་པའི་གསར་འགོད་ཚོགས་པ་སོགས་ཐོུང་གིས་ཨ་རིའི་ཕྱི་སྲིད་དྲུང་ཆེ་ཧི་ལ་རི་ཀི་ལིན་ཊོ་མཆོག་གིས་རྒྱ་ནག་ནང་གཟིགས་བསྐོར་གནང་སྐབས་རྒྱ་ནག་གི་དཔོན་རིགས་ཚོ་དང་ལྷན་དུ་ཡུལ་གྲུ་གཉིས་ཚོང་ལས་དཔལ་འབྱོར་སོགས་ཀྱི་འབྲེལ་བའི་གནད་དོན་ཁོ་ན་མ་ཡིན་པར་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་གནད་དོན་དེ་ཚོ་སྣང་ཆུང་དུ་བཞག་ཐབས་མེད་པའི་སྐོར་འབོད་སྐུལ་ཞུས་གནང་ཡོད་པ་སོགས་གནས་ཚུལ་ཐོན་བཞག།