ཨ་རིས་རྒྱ་ནག་ལ་འགྲོ་བ་མིའི་ཐོབ་ཐང་ཐད་སྐྱོན་བརྗོད།

༄༅༎གཟའ་པ་སངས་ཉིན་ཨ་མི་རི་ཀའི་ཕྱི་སྲིད་དྲུང་ཆེ་ལྕམ་ཧི་ལ་རི་ཀིལན་ཊན་མཆོག་གིས་ རྒྱ་ནག་གི་སྒྱུ་རྩལ་པ་གྲགས་ཅན་ཨེ་ལྦེ་ལྦེ་ལ་སོགས་པ་འདི་ལོ་རྒྱ་ནག་གཞུང་གིས་འཛིན་བཟུང་བྱས་པའི་རྒྱ་མི་འགྲོ་བ་མིའི་ཐོབ་ཐང་དང་མང་གཙོ་དོན་གཉེར་བ་མི་སྣ་བཅུ་ཕྲག་ལྷག་ཅིག་འཕྲལ་དུ་གློད་གྲོལ་དགོས་པའི་དགོས་འདུན་བཏོན་གནང་འདུག་པར་མ་ཟད་རྒྱ་ནག་གི་འགྲོ་བ་མིའི་ཐོབ་ཐང་གི་གནས་བབས་ཇེ་སྡུག་ཏུ་འགྲོ་བཞིན་ཡོད་པ་གསུངས་འདུག།

ཨ་མི་རི་ཀའི་ཕྱི་སྲིད་ལས་ཁུངས་ཀྱིས་ལོ་ལྟར་འགྲོ་བ་མིའི་ཐོབ་ཐང་གི་གནས་སྟངས་ཞིབ་འཇུག་གནང་པའི་གྲུབ་ཐོའི་ནང་ རྒྱ་ནག་གཞུང་གིས་སྔ་ལོ་ནས་འགྲོ་བ་མིའི་ཐོབ་ཐང་དོན་གཉེར་བ་ཚོའི་ཐོག་དམ་དྲག་བྱེད་ཤུགས་ཆེ་རུ་བཏང་པ་དང་ བོད་དང་ཤར་ཏུར་ཀིསི་ཐན་གྱི་ནང་ དྲག་སྣོན་ཚད་ལས་བརྒལ་བའི་སྲིད་བྱུས་མུ་འཐུད་ལག་བསྟར་བྱེད་བཞིན་ཡོད་པ་འཁོད་འདུག།

ཕྱི་ལོ་༢༠༡༡གི་ལོ་གསར་པ་འདིའི་ནང་དཀྱིལ་ཤར་ཡུལ་གྲུའི་སྲིད་དབང་གཅིག་སྡུད་ཀྱི་ཡུལ་གྲུ་ཁག་གཅིག་གི་ནང་མི་མང་སྒེར་ལངས་ཀྱི་ལས་འགུལ་ཤུགས་ཆེ་སྤེལ་བའི་གནས་ཚུལ་འདི་བྱུང་མ་ཐག་རྒྱ་ནག་གི་འགོ་འཁྲིད་ཚོས་ རྒྱ་ནག་ནང་གི་འགྲོ་བ་མིའི་ཐོབ་ཐང་དང་མང་གཙོ་དོན་གཉེར་བ་ཚོའི་ཐོག་དམ་དྲག་བྱེད་ཤུགས་ཆེ་རུ་བཏང་ཞིང་ གནད་དོན་དབྱེ་ཞིབ་པ་མང་པོས་བྱ་སྤྱོད་དེས་རྒྱ་ནག་གི་འགོ་འཁྲིད་ཚོར་རྒྱལ་ཁབ་སྐྱོང་བའི་གདེང་སྤོབས་ཧ་ཅང་ཆུང་ཆུང་ལས་མེད་པ་མཚོན་གྱི་ཡོད་པ་བརྗོད་བཞིན་ཡོད་པ་རེད།།

ཨ་མི་རི་ཀའི་ཕྱི་སྲིད་དྲུང་ཆེ་ལྕམ་ཀི་ལིན་ཊེན་མཆོག་གིས་རྒྱ་ནག་ནང་ཕྱི་ལོ་༢༠༡༡གི་ཆ་ཤས་དང་པོ་འདིའི་ནང་འགྲོ་བ་མིའི་ཐོབ་ཐང་གི་གནས་བབས་ཇེ་སྡུག་ཇེ་ཞེན་དུ་འགྲོ་བཞིན་ཡོད་པའི་མངོན་རྟགས་གསལ་པོ་ཐོན་བཞིན་ཡོད་པ་རེད་ཅེས་དང་ ཨ་མི་རི་ཀའི་ངོས་ནས་  སྟོབས་ཤུགས་ལྡན་པ་དང་འབྱོར་པ་ཆེ་བའི་རྒྱ་ནག་ཞིག་འབྱུང་རྒྱུར་དགའ་བསུ་ཞུ་གི་ཡོད་ འོན་ཀྱང་རྒྱ་ནག་གཞུང་གིས་ཨེ་ལྦེ་ལྦེ་སོགས་སྒྱུ་རྩལ་བ་དང་ བརྩོམ་པ་པོ་ ཁྲིམས་རྩོད་པ་ དེ་མིན་མཁས་པའི་མི་སྣ་ཉེས་མེད་འཛིན་བཟུང་བྱེད་བཞིན་པ་དེ་ནི་ གཞི་རིམ་གྱི་ཁྲིམས་དང་མི་མཐུན་པ་ཞིག་ཡིན་སྟབས་ ང་ཚོས་ཁོང་ཚོ་གློད་འགྲོལ་དགོས་རྒྱུར་རྒྱ་ནག་གཞུང་ལ་ཛ་དྲག་གི་འབོད་བསྐུལ་ཞུ་རྒྱུ་ཡིན་ཞེས་གསུངས་འདུག།